ފްލެޓް މައްސަލައިގައި އޮޅުން ބޮޅުން ބޮޑުވެ އަނެއްކާ ވެސް އާއްމުން ހައުސިން މިނިސްޓްރީ އަށް ގޮސް މުޒާހަރާކޮށްފިއެވެ.

29 މޭއި 2025 ވަނަ ދުވަހު ހައުސިން މިނިސްޓަރ އަބްދުﷲ މުއްތަލިބް ބޭއްވި ނޫސްވެރިންގެ ބައްދަލުވުމެއްގައި ވަނީ ސަރުކާރުން އަމަލު ކުރާނީ 15 ނޮވެމްބަރ 2023 ވަނަ އަހަރު ނެރެފައިވާ ފްލެޓް ލިސްޓަށް ކަމަށް ވިދާޅުވެފައެވެ.

އެ ލިސްޓުގައި ފްލެޓް ލިބޭނެ ކަމަށް ބުނެފައިވާ މީހުންގެ ތެރެއިން އެގްރީމެންޓް ދީފައި ތިބި އެތައް ބަޔަކު ތިބި ކަމަށް އިއްސެ ވިދާޅުވިއެވެ. އޭގެ ތެރެއިން ކުރީ ސަރުކާރުން އެގްރީމެންޓް ދިން މީހުންނާއި ނުދޭ މީހުން ވެސް އެބަތިއްބެވެ. އަދި އެގްރީމެންޓް ލިބުނު މީހުންނާއި ނުލިބޭ މީހުން ވެސް ޕޯޓަލް އިން ދައްކާ ގޮތުން ފްލެޓް ލިބުމަށް "އެލިޖިބްލް"އެވެ.

ފްލެޓް ލިބުނު މީހުންގެ ހައްގުތައް ހޯދައިދިއުމަށް އިސްކޮށް މަސައްކަތްކުރައްވާ ނާއިފް ވިދާޅުވީ ހައުސިން މިނިސްޓްރީ އަށް ބުރާސްފަތި ދުވަހު 70 އެއްހާ މީހުން ގޮސްފައިވާ ކަމަށެވެ. އެގްރީމެންޓް ނުލިބޭ މީހުން ބޭނުންވީ އެގްރީމެންޓް ނުލިބޭ މީހުންނަށް އެލިޖިބްލް ނަމަ، ފްލެޓް ލިބޭނެތޯ ނޫންތޯ ސާފުކުރުމަށް ކަމަށް ނާއިފް ވިދާޅުވިއެވެ. އަދި އެގްރީމެންޓް ލިބުނު މީހުން ބޭނުންވީ ޕޯޓަލް އަޕްޑޭޓް ނުވާތީ އެކަން ސާފުކުރުމަށް ކަމަށް ނާއިފް ވިދާޅުވިއެވެ.

މުޒާހަރާގެ ބައިވެރިންނަށް މައުލޫމާތު ދެއްވަމުން ހައުސިން މިނިސްޓްރީގެ ޕަރމަނަންޓް ސެކެރެޓަރީގެ މަޤާމުގައި ހުންނެވި ބޭފުޅަކު ވަނީ އެންމެ ފުރަތަމަ ފްލެޓް ދިނުމުގައި އިސްކަން ދެނީ އެގްރިމެންޓް ލިބިފައިވާ މީހުންނަށް ކަމަށް ވިދާޅުވެފައެވެ. އެގްރިމެންޓް ލިބުނު މީހުންގެ މައްސަލަ ފުރަތަމަ ހައްލުކޮށްދެއްވާނެ ކަަމަށް އޭނާ ވަނީ ވިދާޅުވެފައެވެ. އަދި އޭގެ ފަހުން އެގްރިމެންޓް ނުލިބޭ މީހުންނަށް ދިމާވެފައިވާ މައްސަލަތައް ބަލާނީ އެއަށް ފަހުގައި ކަމަށް ޕީއެސް އާއި ހަވާލާދީ ނާއިފް ވިދާޅުވިއެވެ.

ޖުލައި 10ގެ ފަހުން އެގްރިމެންޓް ނުލިބޭކަމުގެ ލިޔުން ވެސް ފޮނުވާފައި ނުވާކަން ނާއިފް ފާހަގަކުރެއްވިއެވެ. އެކަން ލިޔުންތައް ފޮނުވުން ހުއްޓާލީ ފްލެޓް ލިބުނު މީހުންގެ ހައްގުތައް ހޯދައިދިނުމަށް މަސައްކަތް ކުރާ ޖަމިއްޔާއިން ނޫސްވެރިންގެ ބައްދަލުވުމެއް ބޭއްވި ހިސާބުން ފެށިގެން ކަމަށް ނާއިފް ވިދާޅުވިއެވެ. އެހެންނަމަވެސް ފްލެޓް ނުލިބޭ މީހުންނަށް ލިޔުން ފޮނުވާ ނުނިމޭނެ ކަމަށް ހައުސިން މިނިސްޓްރީން ވަނީ އާއްމުންނަށް މައުލޫމާތުދެމުން ބުނެފައެވެ.