ސައިންޓިފިކް ދިރާސާތަކަށް އިންޑިއާ ކަނޑުގައި އޮތް ޗައިނާގެ އުޅަނދަކީ އދ.ގެ ގަވައިދުތަކަށް ތަބާވާ އުޅަނދެއް: ޗައިނާ
ބެއިޖިން އިން މިހެން ބުނެފައި މިވަނީ އިންޑިއާގެ ދެކުނުގެ ކަނޑުގެ ސަރަހައްދުން އެ ބޯޓު ދަތުރުކުރުމުން މީޑިއާގެ ސަމާލުކަން އެކަން އައިސްފައިވާ ދަނޑިވަޅެއްގައެވެ.
ޒިއަންގް ޔަންގް ހޮންގް 3
ސައިންޓިފިކް ދިރާސާތަކަށް އިންޑިއާ ކަނޑުގައި އޮތް ޗައިނާގެ އުޅަނދަކީ އދ.ގެ ގަވައިދުތަކާ އެއްގޮތަށް އަމަލު ކުރަމުންދާ އުޅަނދެއްކަމަށް ޗައިނާއިން ބުނެފިއެވެ.
ޗައިނާއިން އަންގާރަ ދުވަހު ބުނީ އިންޑިއާ ކަނޑުގެ ދެކުނުގައި އޮތް އެ ގައުމުގެ އުޅަނދަކުން އދގެ ގާނޫނުގެ ދަށުން "ސައިންޓިފިކް ރިސާޗް" ކޮށްފައިވާ ކަމަށެވެ.
ޗައިނާގެ ޚާރިޖީ ވުޒާރާގެ ތަރުޖަމާނު ވަންގް ވެންބިން ބެއިޖިންގައި ނޫސްވެރިންނާ ވާހަކަ ދައްކަވަމުން ވިދާޅުވީ، ޗައިނާއިން ކަމާގުޅުންހުރި ކަނޑުގެ ސަރަހައްދުގައި ހިންގާ ސައިންޓިފިކް ރިސާޗް ހަރަކާތްތަކަކީ ސުލްހަވެރި ބޭނުމެއްގައި ކުރިއަށް ގެންދާ ހަރަކާތްތަކެއް ކަމަށާއި އޭގެ ބޭނުމަކީ އިންސާނިއްޔަތަށް ކަނޑުގެ ސައިންޓިފިކް ވިސްނުމަށް އެހީތެރިކަން ފޯރުކޮށްދިނުން ކަމަށެވެ.
ޒިއަންގް ޔަންގް ހޮންގް 3 އާ ބެހޭ ގޮތުން ވަންގް ވިދާޅުވި ގޮތުގައި މި ހަރަކާތްތަކަކީ އދ.ގެ ކޮންވެންޝަން އޮން ދަ ލޯ އޮފް ދަ ސީގެ ޝަރުތުތަކާ ވަރަށް ބޮޑަށް ފެތޭ ހަރަކާތްތަކެއް ކަމަށެވެ.
ޒިއަންގް ޔަންގް ހޮންގް 3 އާ ބެހޭ ގޮތުން ބެއިޖިން އިން މިހެން ބުނެފައި މިވަނީ އިންޑިއާގެ ދެކުނުގެ ކަނޑުގެ ސަރަހައްދުން އެ ބޯޓު ދަތުރުކުރުމުން މީޑިއާގެ ސަމާލުކަން އެކަން އައިސްފައިވާ ދަނޑިވަޅެއްގައެވެ.
ޗައިނާގެ މި އުޅަނދު ބަނދަރު ކުރުމުގެ ހުއްދަ ދިވެހިރާއްޖެއިން މިދިޔަ މަހުގެ ތެރޭގައި ދީފައިވާއިރު، ދިވެހިރާއްޖޭގެ ޚާރިޖީ ވުޒާރާއިން ނެރުނު ބަޔާނެއްގައި ވިދާޅުވީ ޗައިނާގެ އުޅަނދު ރާއްޖޭގައި ބަނދަރުކުރުމުގެ ހުއްދަ ދީފައިވަނީ އެ އުޅަނދަށް ބޭނުންވާ ބައެއް އަސާސީ ތަކެތި ލިބޭނެ ގޮތް ހަމަޖައްސައިދިނުމަށް ޗައިނާގެ ސަރުކާރުން ދިވެހި ސަރުކާރުގައި އެދިފައިވާތީކަމަށެވެ. އަދި ރާއްޖޭގައި ބަނދަރުކޮށްފައި އޮންނަ މުއްދަތުގައި ދިރާސާކުރުމުގެ އެއްވެސް މަސައްކަތެއް އެ އުޅަނދުން ކުރިއަށް ނުގެންދާނޭކަމަށްވެސް އެ ބަޔާނުގައެވެ.
ރާއްޖެއަކީ އަބަދުވެސް އެކުވެރި ގައުމުތަކުގެ އުޅަނދުތަކަށް މަރުހަބާ ކިޔާ ގައުމެއް ކަން ފާހަގަކުރައްވަމުން، ހާރިޖީ ވުޒާރާއިން ވިދާޅުވީ ސުލްހަވެރި ބޭނުމަކަށް ރާއްޖޭގައި ބަނދަރުކުރާ މަދަނީ އަދި އަސްކަރީ އުޅަނދުތަކަށްވެސް ރާއްޖެއިން އަބަދުވެސް ޚިދުމަތް ދޭކަމަށެވެ. އަދި މިކަމުގެ ސަބަބުން ރާއްޖެއާއި އެހެނިހެން ޤައުމުތަކާ ދެމެދު އޮންނަ ޚާރިޖީ ގުޅުން ވަރުގަދަވުމުގެ އިތުރުން، އެހެން ޤައުމުތަކުގެ މީހުންނަށް މަރުހަބާ ކިޔުމުގައި ދިވެހިން އަބަދުވެސް ދައްކަމުން އަންނަ ނަމޫނާ ސަގާފަތް ފެންނާނެކަމަށްވެސް ބަޔާނުގައިވެއެވެ.
ދިވެހިރާއްޖޭގެ ފޮރިން މިނިސްޓްރީގެ މި ބަޔާނުގައި އެގޮތަށް ވިދާޅުވެފައި ވީނަމަވެސް ވަންގް ވަނީ މެރިން ސައިންޓިފިކް ރިސާޗްގެ ދާއިރާއިން ރާއްޖެއާ އެކު ގާތް ގުޅުމެއް ބާއްވަމުން އަންނަ ކަމަށް ވިދާޅުވެފައެވެ.
"އިސްތިގުލާލާއި ޗައިނާ އާއި ރާއްޖޭގެ ރަހުމަތްތެރިކަމުގެ މައްޗަށް ބިނާކޮށް އަދި ބައިނަލްއަގްވާމީ ގާނޫނުތަކުގެ ކަމާ ގުޅޭ މާއްދާތަކާ އެއްގޮތްވާ ގޮތުގެ މަތިން ޗައިނާގެ ރިސާޗް އުޅަނދުފަހަރަށް ރާއްޖެއިން ފޯރުކޮށްދޭ ލުއިފަސޭހަކަމާއި އެހީތެރިކަން ބެއިޖިންއިން ބަލައިގަންނަ ކަމަށް އޭނާ ވިދާޅުވިއެވެ.
