ރިޔާސީ ބަޔާން އިއްވެވި ދުވަހެވެ. ރައީސް ޑރ.މުހައްމަދު މުއިއްޒުގެ ފުރަތަމަ ރިޔާސީ ބަޔާންކަަމަށް ވުމާއި އެކު އަޅުގަނޑުވެސް ނިކަން ކަނުލާ އެ ވާހަކަތައް އަޑު އަހަން ހުރީމެވެ. ރިޔާސީ ބަޔާނުގެ ރާގައި ވައްޓަފާޅީގެ ވާހަކަ އެހެން ދުވަހަކަށް ބާއްވާނަމެވެ. އެ ރިޔާސީ ބަޔާނުން ކިތަންމެ ކިތަންމެ ކަމެއް ފެނުނެވެ.
މިއަދު ދައްކަން މިއުޅެނީ ރިޔާސީ ބަޔާނުގައި ދެއްކެވި ވާހަކައަކަށް ވުރެ ބޮޑަށް ނުދައްކާ ވާހަކައެކެވެ. ތަރައްޤީގެ ބޮޑެތި އަމާޒުތަކާއި ކުރައްވާ އުންމީދުތަކުގެ ވާހަކަ އަށް އެމަނިކުފާނުގެ ބަޔާނުން ފުދޭވަރަކަށް ވަގުތު ހުސްކުރެއްވިއެވެ، ޓޫރިޒަމްގެ ދާއިރާގެ އަމާޒުތަކުގެ ތަފްސީލް ދެއްވިއެވެ. އެގޮތުން ފަތުރުވެރިކަން ތަރައްޤީކުރުމަށް ކުރާނެ މަސައްކަތްތައް ވިދާޅުވެެދެއްވިއެވެ.
މީގެ އިތުރުން ބައިނަލްއަޤުވާމީ ބޮޑެތި މަހާސިންތާތަކާއި ޙަފްލާތައް ބޭއްވޭ މަންޒިލަކަށް ރާއްޖެ ހަދަން މައިސް ޓޫރިޒަމް ތަޢާރުފްކުރާނެ ވާހަކަ ވިދާޅުވިއެވެ. ހަމައެހެންމެ ރާއްޖޭގައި ކުރެވިދާނެ ޞިނާޢީ އާ މަސައްކަތްތަކާއި، ކުރެވިދާނެ އައު އިންވެސްޓްމަންޓްތައް ވަރަށް ގިނަ. ކަމަށާއި އެކަމަށް ޝައުގުވެރިވާ މީހުންވެސް ތިބިކަމަށް ވިދާޅުވިއެވެ.
އާދައިގެ މަތިން ރަސްމާލެގެ ވާހަކަ ވެސް ތަކުރާރުކުރެއްވިއެވެ. އެތަން ތަރައްޤީކުރުމުގެ ހުވަފެނުގެ ތަސްވީރު ކުރައްސަވާލައްވާ އެ ވާހަކަ ވެސް ވަރަށް ޝައުގުވެރިކަމާއި އެކު ދެއްކެވިއެވެ. މީގެއިތުރުން، ރާއްޖޭގައި ބުރިޖުތަކާއި ކޯޒްވޭތަކުން ގުޅުވައިލައިގެން އާބާދުކުރެވެން ހުރި މިފަދަ އެތައް ސަރަޙައްދެއް ގުޅުވައިލުމުގެ ޢަމަލީ މަސައްކަތް ފަށާނެ ކަމަށް ވެސް ވިދާޅުވިއެވެ. އެންމެ ބޮޑު މަޝްރޫޢެއްގެ ގޮތުގައި ކުރިއަށްދާނީ އައްޑޫ ސިޓީގެ ރަށްތައް މި ދައުރުގައި ބުރިޖަކުން ގުޅުވައިލުން ކަމަށް ވެސް ވިދާޅުވިއެވެ.
އެކަމަކު ކުރިން ވެސް ބުނިހެން މިއަދުގެ ރިޔާސީ ބަޔާނުން ފެންނާނެ ކަަމަށް ހީކުރި އެއް ވާހަކަ އެއް ރައީސްގެ ބަޔާނަކުން ނުފެނުނެވެ. އެ ވާހަކަ އަކީ ރަސްމާލެ އާއި މާލެ އަންޑަވޯޓަރ ޓަނެލްއަކުން ގުޅާލުމުގެ ވާހަކައެވެ. ބޮޑު ޓަނަލް އެއް އަޅާ ވާހަކަ މީގެ ކުރިން ވަރަށް ފުޅާ ޕްރޮޖެކްޓެއްގެ ގޮތުގައި އެ ވާހަކަދެއްކެވިއެވެ. އެހެންކަމުން އެ ވާހަކައިގެ އިތުރު ތަފްސީލަކަށް ހުރިހާ އެންމެންވެސް ތިބީ އުންމީދުކޮށްގެންނެވެ. އެހެނަސް އެ ޓަނަލްގެ ވާހަކަ އެއްގޮތަކަށް ވެސް ނުގެންނެވުމުން ހައިރާންވެއްޖެއެވެ.
އެހެންޏާ ފަހެ އެތައް އިންވެސްޓަރުންނެއް ރާއްޖެއަށް އިންވެސްޓްކުރަން ޝައުގުވެރިވާ ކަަމަށް ވިދާޅުވި އިރު އެންމެ ބޮޑު ޕްރޮޖެކްޓްތަކުގެ ލިސްޓުގައި ޓަނަލްގެ ވާހަކަ ނުގެންނެވުމުން ސުވާލު އުފެދެއެވެ. އެއީ ޖަޒުބާތުގައި ދެއްކެވި ވާހަކައަކީތޯ ނޫނީ މިހާރު އިހަށް އެ ޕްރޮޖެކްޓް މަޑު ޖެހުނީތޯ ވެސް ސުވާލު އުފެދުނެވެ. ރައީސް އެކަމަށް ދެއްވާ އިސްކަމާއި ކުރިން އެ ވާހަކަދެއްކެވި ޝައުގުވެރި ރާގަށް ބަލާ އިރު އެ ވާހަކަ މި ރިޔާސީ ބަޔާނުގައި ނުދައްކަންވީ ސަބަބެއް ނެތެވެ.
ރިޔާސީ ބަޔާނުގައި އެހާ ބޮޑު މަޝްރޫޢުއެއްގެ ވާހަކަ ނުދައްކާ ދޫކޮށްލެއްވި ސަބަބާއި މެދު ސުވާލު އުފެދެއެވެ. އެ ވިދާޅުވާ ޓަނެލް އެޅިދާނެ ކަމާއި މެދު ޙުދު މަނިކުފާނަށް ސުވާލު އުފެދުނީތޯ ނޫނީ އެއީ އެ ދުވަސްވަރު ސިޔާސީ ޖަޒުބާތުގައި ދެއްކެވި ވާހަކައެއްތޯ ސުވާލު އުފެދެއެވެ. އެހެން މި ދަންނަވަން ޖެހެނީ އޭރު އެ ދުވަސްވަރު ދިމާވީ މާލޭ ސިޓީގެ މޭޔަރ ކަމަށް ވާދަކުރެއްވި އާޒިމާ ޝަކޫރުގެ ކެމްޕެއިން ދުވަސްކޮޅާއި ކަމަށް ވުމެވެ. އެހެންވީމަ އެއީ ކެމްޕެއިނަށް ދެއްކެވި ދަޅައެއްތޯ ސުވާލު އުފެދެއެވެ. އެއީ މާލޭގެ މޭޔަރުކަމުގެ އިންތިޚާބު ބަދަލުކޮށްލަން ދެއްކެވި އަވާމެންދުރެއްތޯއެވެ؟ ނޫނީ އެކަން ކުރެވިދާނެ ކަމާއި މެދު ސުވާލު އުފެދި އެވާހަކަ ނުދެއްކުމުން އާއްމުން އެކަން ހަނދާން ނެތޭނެ ކަމަށް އުންމީދުކުރަނީތޯއެވެ؟
