ރަމަޟާން މަހުގެ ފަހު ދިހައެއްގައި ސަރުކާރު ބަންދުވާގޮތަށް ހަމަޖައްސައި، ރަސްމީ އިއުލާން ނެރެފި
މީގެ ކުރިން ސަރުކާރުން ވަނީ ރަމަޟާން މަހުގެ ފަހު 10، މި އަހަރުން ފެށިގެން ބަންދުވާނެ ކަމަށް އިއުލާންކޮށްފައި
ރައީސް އޮފީސް
މި އަހަރުން ފެށިގެން ރަމަޟާން މަހުގެ ފަހު ދިހައިގެ ދުވަސްތަކުގައި ސަރުކާރު ބަންދުވާ ގޮތަށް ސަރުކާރުން ހަމަޖައްސައި، އެކަމާގުޅޭ ރަސްމީ އިއުލާން އާއްމުކޮށްފިއެވެ.
މީގެ ކުރިން ސަރުކާރުން ވަނީ ރަމަޟާން މަހުގެ ފަހު 10، މި އަހަރުން ފެށިގެން ބަންދުވާނެކަން އިއުލާންކޮށްފައެވެ. އެގޮތަށް ނިންމާފައިވަނީ، އިސްލާމީ އުސޫލުތައް ގާއިމުކުރުމަށާއި ދީނީ ކަންތައްތަކަށް ރައްޔިތުންގެ ލޯބި ޖެއްސުމަށާއި ދީނީ ކަންކަމަށް އިސްކަން ދިނުމަށް ފުރުސަތު ދިނުމަށް ކަމަށް ސަރުކާރުން ވަނީ ބުނެފައެވެ.
މި އަހަރުގެ ރަމަޟާން މަހުން ފެށިގެން، ކޮންމެ އަހަރެއްގެ ރަމަޟާން މަހުގެ 20 ވަނަ ދުވަހުން ފެށިގެން އެ މަހުގެ ނިޔަލަށް ހިނގާ ދުވަސްތަކަކީ، ސަރުކާރު ބަންދު ދުވަސްތަކެއް ކަމަށް ހަމަޖައްސައި، އެކަމާ ގުޅޭ ރަސްމީ ދެންނެވުންރައީސުލްޖުމްހޫރިއްޔާގެ އޮފީހުން ވަނީ އާދިއްތަ ދުވަހު ނެރެފައެވެ. ސަރުކާރުން ބުނީ މިގޮތަށް މި ހަމަޖެއްސީ، ރާއްޖޭގައި އިސްލާމީ އުސޫލުތައް ގާއިމުކުރުމާއި، ދީނީ ކަންކަމަށް އިސްކަންދިނުމަށް ފުރުސަތު ދިނުމުގެ ގޮތުން، ރަމަޟާން މަހުގެ ފަހުދިހައިގެ ދުވަސްތައް ބަންދުކުރުމަކީ މި ސަރުކާރުގެ ރިޔާސީ ވައުދަކަށް ވާތީ ކަމަށެވެ.
ރަމަޟާން މަހުގެ ފަހުދިހައާ ގުޅިގެން ސަރުކާރު ބަންދުވާ ދުވަސްތަކުގައި، އެކިއެކި މުއައްސަސާތަކުން ރައްޔިތުންނަށް ކޮންމެހެން ދޭންޖެހޭ ޚިދުމަތްތައް، އެ މުއައްސަސާތަކުން ކަނޑައަޅާ ގޮތެއްގެ މަތިން ދިނުމުގެ އިންތިޒާމު ހަމަޖެއްސުމަށްވެސް ރައީސުލްޖުމްހޫރިއްޔާގެ އޮފީހުން ނެރުއްވި އިއުލާނުގައި ވެއެވެ.
މިކަމާ ގުޅޭގޮތުން ރައީސުލްޖުމްހޫރިއްޔާގެ އޮފީހުން މިހާރު ވަނީ، ރައްޔިތުންނަށް ކޮންމެހެން ބޭނުންވާ އަސާސީ އެކި ޚިދުމަތްތައް ދެމުން ގެންދާ ސަރުކާރުގެ މުއައްސަސާތަކާއި އަދި ކުންފުނިތަކާ ބައްދަލުކުރައްވައި، ރަމަޟާން މަހުގެ ފަހު ދިހައިގެ ދުވަސްތަކުގައި ޚިދުމަތްތައް ދެއްވުމުގައި ހަމަޖައްސަންޖެހޭ އިންތިޒާމުތައް ހަމަޖެއްސުމާމާ ގުޅޭގޮތުން މަޝްވަރާ ކޮށްފައި ކަމަށް ރައީސް އޮފީހުން ބުނެއެވެ. އަދި މި ދެންނެވި މުއައްސަސާތަކުން އެ ޚިދުމަތްތައް ދިނުމަށް ހަމަޖެހިފައިވާ ގޮތުގެ ތަފްސީލް، އެކި ވަސީލަތްތައް މެދުވެރިކޮށް، ރައްޔިތުންނަށް ވީހާވެސް ބޮޑަކަށް ސާފުކޮށްދިނުމަށާއި، އެކަންކަމުގެ މައުލޫމާތު ރައީސުލްޖުމްހޫރިއްޔާގެ އޮފީހާ ހިއްސާކުރުމަށްވެސް މި ބައްދަލުވުމުގައި އެދިވަޑައިގެންފައި ވެއެވެ.
ރަމަޟާންމަހަކީ، ކީރިތި ގުރުއާން ކިޔެވުމާއި ދުއާކުރުން ގިނަކޮށް، އަޅުކަންކުރުމުގައި ހީވާގިވުމާއެކު، އަނެކުންނަށް އެހީ ފޯރުވުމާއި ދީލަތިވުމުގައި އަތްތައް ހުޅުވައިލަންވީ މައްސަރެކެވެ.
