އެމްބާޕޭ ރެއާލް އަށް ބަދަލުވާން 100 މިލިއަން ޔޫރޯ ދޫކޮށްލަނީ
4 ފެބުރުއަރީ 2024 | އާދީއްތަ 11:39ރެއާލްއާއެކު އަންނަ ހަފުތާގައި ޕްރީ ކޮންޓްރެކްޓްގައި ސޮއިކުރާނެ: އީއެސްޕީއެން
ފްރާންސްގެ ކެޕްޓަން ކީލިއަން އެމްބާޕޭ
ފްރާންސްގެ ކެޕްޓަން ކީލިއަމް އެމްބާޕޭ ރެއާލް މެޑްރިޑަށް ބަދަލުވުމަށްޓަކައި ޕީއެސްޖީން ލިބެންޖެހޭ ލޯޔަލިޓީ ބޯނަސް ދޫކޮށްލަން ނިންމައިފި ކަމަށް ރިޕޯޓްތައް ބުނަން ފަށައިފި އެވެ.
ފްރާންސްގެ މީޑިއާތަކާއި މަޝްހޫރު އީއެސްޕީއެން ބުނާ ގޮތުގައި ސީޒަން ނިމެންދެން ޕީއެސްޖީގައި މަޑުކޮށް، ކޮންޓްރެކްޓް ނިންމައިފިނަމަ ލޯޔަލިޓީ ބޯނަސްގެ ގޮތުގައި އެމްބާޕޭ އަށް 100 މިލިއަން ޔޫރޯ ދޭންޖެހޭނެ އެވެ.
ނަމަވެސް ރެއާލް މެޑްރިޑަށް ބަދަލުވާނެކަމުގެ ޔަގީންކަން ދިނުމަށް އެކުލަބުން ބޭނުންވާތީވެ އަންނަ ހަފުތާގައި އެކުލަބާއެކު ޕްރީ ކޮންޓްރެކްޓެއްގައި ސޮއިކުރަން އެމްބާޕޭ މިހާރު ވަނީ ނިންމާފަ އެވެ. ވަގުތީ މި އެގްރީމަންޓްގައި ސޮއިކޮށްފިނަމަ އޭނާ އަށް ލޯޔަލިޓީ ބޯނަސް ނުލިބޭނެ އެވެ.
ރިޕޯޓްތައް ބުނާ ގޮތުން އެމްބާޕޭ މިހާތު ބޭނުންވަނީ ރެއާލް އަށް ބަދަލުވާށެވެ. އެއީ އޭނާގެ ކުޑައިރުގެ ހުވަފެން ހަގީގަތަކަށް ހެދުމަށެވެ.
މި ސީޒަން ފެށުމުގެ ކުރިން ވެސް އޭނާ ވަނީ ރެއާލް އަށް ބަދަލުވާން މަސައްކަތް ކޮށްފަ އެވެ. ނަމަވެސް އެކަން ނުވީ ޕީއެސްޖީން ދޫނުކުރުމުންނެވެ. މިކަމާ ގުޅިގެން ޕްރީ ސީޒަނުގައި ބައިވެރިނުވެވޭ ގޮތަށް އޭނާ ސަސްޕެންޑްވެސް ކުރި އެވެ.
