މަޖިލިސް އިންތިޚާބު އެމްޑީޕީއިން ކާމިޔާބުކުރުމަށް އެކީގައި މަސައްކަތްކުރުމަކީ ކޮންމެހެން ބޭނުންތެރި ކަމެއް- ރައީސް ޞާލިހު
ހޮނިހިރު ދުވަހު ބޭއްވި އިންތިޚާބުގައި ޖުމުލަ 40 ދާއިރާއެއްގެ ޕްރައިމަރީ ބޭއްވިއިރު އެ ދާއިރާތަކަށް 149 ކެންޑިޑޭޓުން ވާދަކޮށްފައިވޭ
ކުރީގެ ރައީސް އަދި އެމްޑީޕީގެ ރައީސް އިބްރާހީމް މުޙައްމަދު ޞާލިޙު
ކުރިއަށް އޮތް ރައްޔިތުންގެ މަޖިލީހުގެ އިންތިޚާބު އެމްޑީޕީއިން ކާމިޔާބުކުރުމަށް އެކީގައި މަސައްކަތްކުރުމަކީ ކޮންމެހެން ބޭނުންތެރި ކަމެއް ކަަމަށް ކުރީގެ ރައީސް އިބްރާޙީމް މުހައްމަދު ޞާލިހު ވިދާޅުވެއްޖެއެވެ.
އެމަނިކުފާނު އެފަދައިން ވިދާޅުވީ އެކްސްގައި ކުރެއްވި ޕޯސްޓެއްގައެވެ.
މި އަހަރުގެ މަޖިލިސް އިންތިޚާބުގައި އެމްޑީޕީގެ ފަރާތުން ވާދަކުރާނެ ފަރާތްތައް ކަނޑައެޅުމަށް ހޮނިހިރު ބޭއްވި ޕާޓީގެ ޕްރައިމަރީން ދާއިރާތައް ކާމިޔާބު ކުރެއްވި ހުރިހާ ބޭފުޅުންނަށް ޞާލިހު ވަނީ މަރުޚަބާ ވިދާޅުވެފައެވެ. އަދި މަޖިލިސް އިންތިޚާބު އެމްޑީޕީއިން ކާމިޔާބު ކުރުމަށް ޕްރައިމަރީގައި ވާދަކުރެެއްވި ހުރިހާ ބޭފުޅުން އެކީގައި މަސައްކަތްކުރުމަކީ ކޮންމެހެން ބޭނުންތެރިކަމެއް ކަމުގައި އެ މަނިކުފާނު ވިދާޅުވިއެވެ.
މީގެ އިތުރުން ޕްރައިމަރީ އޮމާންކޮށް ރާވައި ކުރިއަށް ގެންދިޔުމުގައި ހަރަކާތްތެރިވި ޕާޓީގެ ހުރިހާ ބޭފުޅުންނާއި ވޯޓުލާން ދިޔަ ހުރިހާ މެންބަރުންނަށް އެ މަނިކުފާނު ޝުކުރު އަދާކުރެއްވިއެވެ.
ހޮނިހިރު ދުވަހު ބޭއްވި އެމްޑީޕީގެ އިންތިޚާބުގައި ޖުމުލަ 40 ދާއިރާއެއްގެ ޕްރައިމަރީ ބޭއްވިއިރު އެ ދާއިރާތަކަށް 149 ކެންޑިޑޭޓުން ވާދަކޮށްފައިވެއެވެ.
