ޕްރައިމަރީން ބަލިވާ ކެންޑިޑޭޓުން މޮޅުވާ ކެންޑިޑޭޓާއެކު ކުރިއަށް ދިއުމަށް އެމްޑީޕީގެ ރައީސް އެދިވަޑައިގެންފި

ދިވެހިރައްޔިތުންގެ ޑިމޮކްރެޓިކް ޕާޓީ (އެމްޑީޕީ)ގެ ޕްރައިމަރީތަކުގައި ނޭދެވޭ ކަންކަން ހިނގާފައިވާ ކަމަށާއި، ނަމަވެސް ޕްރައިމަރީން ބަލިވާ ކެންޑިޑޭޓުން މޮޅުވާ ކެންޑިޑޭޓާއެކު ކުރިއަށް ދިއުމަށް އެޕާޓީގެ ރައީސް އަދި ކުރީގެ ރައީސް އިބްރާހިމް މުހައްމަދު ޞާލިހު ވިދާޅުވެއްޖެއެވެ.

20 ވަނަ ރައްޔިތުންގެ މަޖިލީހަށް ކެންޑިޑޭޓުން ހޮވުމަށް އެމްޑީޕީ ކުރިއަށްގެންދާ މަޖިލީސް ޕްރައިމަރީގެ ވޯޓުލުން ބައްލަވާލެއްވުމަށްފަހު ނޫސްވެރިންނަށް މަައުލޫމާތު ދެއްވަމުން ރައީސް ސާލިހު ވިދާޅުވީ، ކޮންމެ އިންތިޚާބަކާއި ގުޅިގެން ވެސް އެމްޑީޕީން ޕްރައިމަރީ ބާއްވާ ކަމަށާއި، ބައެއް ޕްރައިމަރީތަކުގެ ސަބަބުން ވަރަށް ނެދެވޭ ކަންކަން ހިނގާފައިވާ ކަމަށެވެ. ނަމަވެސް މިފަހަރުގެ މި ޕްރައިމަރީގައި ބަލިވާ ކެންޑިޑޭޓުން މޮޅުވާ ކެންޑިޑޭޓުންނާއެކު ކުރިއަށް ދިއުމަށް ރައީސް ސާލިހު އެދިވަޑައިގެންނެވިއެވެ.

ރައީސް ސާލިހު ވިދާޅުވީ ސިޔާސީ ކަންކަމުގައި އަބަދު މޮޅުނުވާނެ ކަމަށާއި، އޮންނާނީ ކުރިއަށް ދިއުން ކަމަށެވެ.

ޕާޓީއެއްގެ ޕްރައިމަރީއެއްގައި އިލެކްޝަން ކޮމިޝަންގެ ދަފްތަރަށް ވޯޓު ލާ ފުރަތަމަ ފަހަރުކަން ފާހަގަކުރައްވައި ރައީސް ޞާލިހު ވިދާޅުވީ ކޮމިޝަންގައި އޮންނަ ދަފްތަރަކީ އެންމެ ސައްހަ ދަފްތަރު ކަމަށެވެ. މިކަމުގެ ސަބަބުން މީގެ ކުރިން ދިމާވި މައްސަލަތައް މިފަހަރު ދިމާނުވާނެ ކަމަށް ރައީސް ޞާލިހު ވިދާޅުވިއެވެ.

ރައީސް ޞާލިހު ވިދާޅުވީ އިލެކްޝަން ދަފްތަރަށް ބަލައިގެން ވޯޓުލުން ކުރިއަށް ގެންދިއުމަކީ އެންމެ ރަނގަޅު ގޮތް ކަމަށާއި، ސުލްހަވެރިކަމާއެކު ވޯޓުލުން ކުރިއަށް ގެންދެވޭ މައިގަނޑު އެއްސަބަބަކީ ވެސް އެއީކަމަށެވެ. މިފަހަރުގެ އެމްޑީޕީގެ ޕްރައިމަރީ ތަފާތުކަން އެމަނިކުފާނު ފާހަގަކުރެއްވިއެވެ.