މާރާމާރީއާއި ހުޅުޖެހުމުގެ ތުހުމަތު "ގަޓު" ޝައިނީ، ރައީސް މައުމޫނަށް ކުރައްވައިފި
ރައީސް މައުމޫން ޓެގްކޮށް ކުރެއްވި ޓްވީޓެއް
މިނިސްޓަރު ޝައިނީ، މާލޭގެ އެކި ސަރަހައްދުތަކުގެ ޒުވާނުންނާއެކު
މާރާމާރީއާއި ހުޅުޖެހުމުގެ ފަހަތުގައި ހުންނެވީ ކުރީގެ ރައީސް މައުމޫން އަބްދުލްގައްޔޫމް ކަމަށް ފިޝަރީޒް މިނިސްޓަރު ޑރ. މުހައްމަދު ޝައިނީ ތުހުމަތު ކުރައްވައިފި އެވެ.
ހަފްތާއެއްގެ ތެރޭގައި މާލޭގައި ގިނަ އަދަދެއްގެ މާރާމާރީ ހިންގައި، އެތައް ބަޔަކު ޒަހަމްކޮށް، ދެ މީހަކު ވަނީ މަރާލާފައެވެ. ހޯމަ ދުވަހުގެ ރޭ ގަރާޖެއްގެ ތެރޭގައި ހުރި ޒުވާނަކަށް ތޫނު އެއްޗަކުން ހަމަލާދީ މަރާލާފައިވާއިރު، ބުރާސްފަތި ދުވަުހުގެ އިރާކޮޅު ކެފޭއެއްގެ ތެރޭގައި އިން ޒުވާނަކަށް ތޫނު އެއްޗަކުން ދިން ހަމަލާއަށް ފަރުވާ ހޯދަމުންދަނިކޮށް ވަނީ މަރުވެފަ އެވެ.
ދާދި ފަހުން "ޒުވާނުންނާއެކު" ކާނިވަލުގައި "ގަޓު" ދެއްކެވި ޝައިނީ ވަނީ އެ ކަންކަމުގެ ތުހުމަތު ރައީސް މައުމޫނަށް ކުރައްވާފަ އެވެ.
ޝައިނީ ވިދާޅުވީ ވެރިކަމުގެ ދަހިވެތިކަމުގައި ގައުމު ހަލަބޮލިކުރުމަށް ޒުވާނުންގެ ފުރާނަ ދުއްވާލައި ތަންތާ ރޯކުރުމަކީ ގަބޫލުކުރެވޭނެ ކަމެއް ނޫން ކަމަށެވެ. ޝައިނީގެ އެ ޓްވީޓުގައި ރައީސް މައުމޫން ޓެގް ކުރައްވާފައިވެއެވެ.
ޝައިނީގެ ޓްވީޓުގައި ތަންތަނުގައި ރޯކުރުމުގެ ވާހަކަ ދައްކަވާފައިވާއިރު، ހޯމަ ދުވަހު ވަނީ މަޖިލިސް ފާހާނާއެއް ތެރޭ ރޯކޮށްލާފަ އެވެ. އެކަމާ ގުޅިގެން މަޖިލިސް ޖަލްސާތައް ވެސް ވަނީ މެދުކަނޑާލާފަ އެވެ. މިދިޔަ އަހަރުގެ ޖެނުއަރީ މަހު ރައީސް އަބްދުﷲ ޔާމީން ރިޔާސީ ބަޔާން ދެއްވަން ހަމަޖެހިފައިވަނިކޮށް، މަޖިލިސް ކުރާ ގޭގައި އަލިފާނުގެ ހާދިސާއެއް ހިނގި އެވެ. އެއަށްފަހު ރައީސް ޔާމީން ރިޔާސީ ބަޔާން ދެއްވީ ދަރުބާރުގޭގަ އެވެ.
ހަފްތާއެއްގެ ތެރޭގައި ދެ މީހުން މަރައި، ގެދޮރަށް ވަދެ ވަޅި ޖަހައި މާރާމާރީ ހިންގަމުންދާއިރު ޝައިނީ މިނިސްޓަރުކަން ކުރައްވާ ސަރުކާރުން އަދި މިހާތަނަށް އެއްޗެސް އެއްޗެއް ބުނެފައެއް ނުވެ އެވެ. މި ފަހުން ހިނގި ދެ މަރާ ގުޅިގެން އަދި މިހާތަނަށް އެއްވެސް މީހަކު ހައްޔަރުކޮށްފައިވެސް ނުވެ އެވެ.
ކުށްކުރުން ހުއްޓުވުމުގެ ބަދަލުގައި ސިޔާސީ މީހުން ހިފާހައްޔަރުކުރުމުގައި ފުލުހުންގެ ވަސީލަތާއި ވަގުތު ބޭނުންކުރާތީ ސޯޝަލް މީޑިއާގައި އެތައް ބަޔަކު ދަނީ ފުލުހުންނާއި ހޯމް މިނިސްޓްރީއަށް ފާޑު ކިޔަމުންނެވެ.
މިދިޔަ ޖުލައި މަހުގެ ތެރޭގައި މާލޭގެ އެކި ސަރަހައްދުތަކަށް ނިސްބަތްވާ ޒުވާނުންނާ ކާނިވަލުގައި ބައްދަލުކުރައްވައި ޝައިނީ ވިދާޅުވެފައިވަނީ ސަރުކާރުގައި "ގަޓު" އެބަހުރި ކަމަށާއި ޒުވާނުންނާއެކު ޒުވާނުން ބޭނުންވާ ކަންތައް ކުރުމަށް ގަޓު ހުރި ކަމަށެވެ.
"ހިތާމައަކީ ބައެއް ބޭފުޅުންނަށް އޮޅިވަޑައިގެން އުޅުއްވަނީ އަޅުގަނޑުމެން ތަންކޮޅެއް މަޑުމަޑުން، މައިތިރިކޮށް ތިބީމަ އަޅުގަނޑުމެންގެ ގަޓްސްއެއް ނުހުންނާނެއޭ. އަޅުގަނޑުމެންގެ ގަޓްސް އެބަހުރި. އިރާދަ ކުރެއްވިއްޔާ ތި ޒުވާނުންނާއެކު ޒުވާނުން ބޭނުންވާ ކަންތައް ކުރުމަށް އަޅުގަނޑުމެން ވެސް ގަޓްސް އެބަހުރި،" ޝައިނީ ވިދާޅުވެފައިވެއެވެ.
