މަންޑޭގެ މުދާތައް ހިފެހެއްޓުމަށް ނެރުނު އަމުރު ބާތިލުކުރާނެ ތަނެއް ނެތްކަމަށް ނިންމައިފި
ކޭޕާކްގެ 41 އެޕާޓްމެންޓް، 107 މީހަކަށް ވިއްކާފައިވޭ
ހައިކޯޓުގައި ކުރިއަށްގެންދިޔަ ޝަރީއަތުގައި މަންޑޭ ވާހަކަދައްކަނީ
ހުޅުމާލޭގައި ތަރައްގީކުރަމުން އަންނަ ކޭޕާކް ފްލެޓްތަކުގެ މައްސަލާގައި ގިނަ ތުހުމަތުތަކެއް އަމާޒުވެފައިވާ ހަސަން މަމްދޫހު (މަންޑޭ)ގެ މުދާތައް ހިފެހެއްޓުމަށް ނެރުނު އަމުރު ބާތިލުކުރާނެ ތަނެއްނެތް ކަމަށް ނިންމައިފިއެވެ.
ބުރާސްފަތި ދުވަހު ހައިކޯޓުން ވަނީ މަންޑޭގެ މުދާތައް ހިފެހެއްޓުމަށް ނެރުނު އަމުރު ބާތިލުކުރާނެ ތަނެއްނެތް ކަމަށް ނިންމައި ހުކުމްކޮށްފައެވެ.
މަންޑޭގެ މުދާތައް ފުލުހުން ހިފަހައްޓާފައިވަނީ ފޭކު ޑޮކިއުމެންޓްތައް އުފައްދައިގެން ކޭޕާކް އެޕާޓްމެންޓްތައް ވިއްކައިގެން ލިބުނު ފައިސާ ލޯންޑަރ ކޮށްގެން ހޯދާފައިވާ މުދާކަމަށް ތުހުމަތު ކުރެވޭތީއެވެ. މުދާތައް ހިފަހައްޓާފައިވަނީ ވެސް ކޯޓު އަމުރެއްގެ ދަށުންނެވެ. މި އަމުރު ބާތިލުކުރަން މަންޑޭގެ ފަރާތުން ހައިކޯޓަށް ހުށަހެޅި މައްސަލަ، އެ ކޯޓުގެ ރަޖިސްޓްރަރ ބޭރުކޮށްލާފައި ވަނީ، އިސްތިއުނާފީ ނުކުތާތައް އެއްވެސް ގާނޫނަކާ ނުވަތަ ގާނޫނީ އުސޫލަކާ ހަވާލާދީފައި ނުވާތީއެވެ. އަދި އެ މައްސަލަ ބަލައިގަނެވެން ނެތް ކަމަށް 03 ޑިސެންބަރު 2023ގައި ނިންމާފައިވެއެވެ.
ނަމަވެސް އެ ނިންމުން ފަނޑިޔާރުންގެ މަޖިލީހަށް ހުށައެޅުމުން ރަޖިސްޓްރަރގެ ނިންމުން ބާތިލުކޮށް، މައްސަލަ ބެލުމަށް ވަނީ ނިންމާފައެވެ.
މައްސަލަ ބެލުމަށްފަހު ބުރާސްފަތި ދުވަހު ނިންމާފައިވަނީ އެ އަމުރު ބާތިލުކުރަންޖެހޭ ތަނެއް ނެތްކަމަށެވެ.
ހަންބޯ ކޮމްޕެނީ ޕްރައިވެޓް ލިމިޓެޑުން ހުޅުމާލޭގައި ތަރައްގީކުރަމުންދާ ކޭޕާކް ރެޒިޑެންސްގެ އެޕާޓްމަންޓްތައް ވިއްކުމުގައި، އޮޅުވާލުމާއި މަކަރާއި ހީލަތް ހަދާފައިވާކަމަށް ތުހުމަތުކުރެވޭ މައްސަލާގައި، ދިވެހި ފުލުހުންގެ ޚިދުމަތުން ތަހުގީގު ފުރިހަމަކޮށް، ގެއްލުން ލިބުނު 51 މީހުންނާ ގުޅިގެން ދައުވާކުރުމަށް 12 ޑިސެންބަރު 2023ގައި ކްރިމިނަލް ކޯޓަށް ވަނީ ހުށަހަޅާފައެވެ. އެގޮތުން މަންޑޭގެ މައްޗަށް 104 ދައުވާއެއް ކުރުމަށް ކޯޓަށް ހުށަހަޅާފައިވެއެވެ. އަދި އެ މައްސަލައިގައި ދެން ހިމެނޭ ރ. އަލިފުށީ، ކިނާރާ، ޖައިޝާން ސައީދުގެ މައްޗަށް 97 ދައުވާއެއް ކުރުމަށް ކޯޓަށް ހުށަހަޅާފައިވެއެވެ.
މަންޑޭގެ މައްޗަށް ތުހުމަތުކުރެވޭ ޚިޔާނާތުގެ މި މައްސަލައިގައި ކޭޕާކްގެ 41 އެޕާޓްމެންޓް، 107 މީހަކަށް ވިއްކާފައިވެއެވެ.
