މަންޑޭގެ މައްޗަށް ގާތްގަނޑަކަށް 225 ދައުވާ، އަންނަ ހަފްތާގައި ކޯޓަށް މައްސަލަ ވައްދަނީ

ހުޅުމާލޭގައި ތަރައްގީކުރަމުން އަންނަ ކޭ ޕާކް ފްލެޓްތަކުގެ މައްސަލާގައި ގިނަ ތުހުމަތުތަކެއް އަމާޒުވެފައިވާ ހަސަން މަމްދޫހު (މަންޑޭ)ގެ މައްޗަށް ގާތްގަނޑަކަށް 225 ދައުވާ އުފުލާނެ ކަމަށް ޕްރޮސެކިއުޓަރ ޖެނެރަލް ހުސައިން ޝަމީމް ވިދާޅުވެއްޖެއެވެ.

ބުރާސްފަތި ދުވަހު ޕީޖީން ބޭއްވި ނޫސްވެރިންގެ ބައްދަލުވުމުގައި ޕީޖީ ހުސައިން ޝަމީމް ވިދާޅުވީ ހަސަން މަމްދޫހާއި އިތުރު ބަޔަކު ބައިވެރިވެގެން ހަންބޯ ކޮންޕެނީ ޕްރައިވެޓް ލިމިޓެޑް މެޖޯރިޓީ ހިއްސާދާރުގެ ސޮއި ފޯޖު ކޮށްގެން ލިޔުންތަކެއް އުފައްދާފައިވާ ކަމަށެވެ. އަދި ބީއެމްއެލްގައި އޮތް ހަންބޯ ކޮންޕެނީގެ ނަމުގައި އޮތް ބޭންކް އެކައުންޓެއް ހުޅުވައި އިންޓަނެޓް ބޭންކް މެދުވެރިކޮށް ފުރިހަމަ ކޮންޓްރޯލް ހޯދައިގެން ބައެއްކަހަލަ މަކަރާއި ހީލަތު އަމަލުތަކެއް ކުރިކަމަށް ތުހުމަތު ކުރެވޭ ކަމަށެވެ.

Advertisement

ޝަމީމް ވިދާޅުވީ މިއަންނަ ހަފްތާގެ ކުރީކޮޅު މިމައްސަލަ ކޯޓަށް ހުށަހެޅޭނެ ކަމަށެވެ. މިމައްސަލާގައި މިހާތަނަށް ލިބިފައި ހުރި މައުލޫމާތުން އެކަނި ވެސް ގާތްގަނޑަކަށް 225 ދައުވާ މަމްދޫހުގެ މައްޗަށް އުފުލޭނެ ކަމަށް ޝަމީމް ވިދާޅުވިއެވެ. އަދި ވިދާޅުވީ އެއީ ކުށުގެ ޝިކާރައަކަށް ވި ބައެއް މީހުންގެ މައުލޫމާތުން ކަމަށެވެ.

މީގެ އިތުރުން ޝަމީމް ވިދާޅުވީ 41 އެޕާޓްމަންޓް ޖުމްލަ 107 މީހުންނަށް ވިއްކާފައިވާ ތަހުގީގަށް އެނގިފައިވާ ކަމަށެވެ.

ޝަމީމް ވިދާޅުވީ މިމައްސަލާގައި ގާނޫނު އުގޫބާތުގެ 310 ވަނަ މާއްދާގެ ދަށުން ސައްހަ ނޫން ލިޔުމެއް ދިނުމުގެ ކުށުގެ ދައުވާ އާއި، 313 ވަނަ މާއްދާގެ ދަށުން އޮޅުވާލުމުގެ ކުށުގެ ދައުވާ ކުރަން ވިސްނަމުންދާ ކަމަށެވެ. އެއީ ވިޔަފާރި އާއްމު މިންގަނޑުތަކާއި ކަނޑައެޅިގެން ހިލާފަށް އަމަލުކޮށްފައިވާތީ ކުރާ ދައުވާއެއް ކަމަށް ޝަމީމް ވިދާޅުވިއެވެ. އަދި ވިދާޅުވީ ޓެކުހުގެ ކުށުގެ ދައުވާއާއި މަނީ ލޯންޑަރިންނާއި ޓެރަރިޒަމް ފައިނޭންސް ހުއްޓުވުމުގެ ގާނޫނުގެ 53 މާއްދާގެ ދަށުން މަނީލޯންޑަރިން ކުށުގެ ދައުވާއެއް ވެސް ކުރުމަށް ވިސްނަމުންދާ ކަމަށެވެ.

މަމްދޫހުގެ އިތުރުން ރ.އަލިފުށި، ކިނާރާ، ޖައިޝާން ސައީދުގެ މައްޗަށް ވެސް ދައުވާ ކޮށްދިނުމަށް ހުށަހަޅާފައިވެއެވެ.

ހުޅުމާލޭގައި މިކްސްޑް ޔޫސް ރެޒިޑެންޝަލް ކޮމްޕްލެކްސްއެއް ތަރައްގީކުރުމަށް ހަންބޯ ޓެކް ކޮރެއާއާއި އާބަންކޯއާ ދެމެދު އެއްބަސްވުމުގައި ސޮއިކުރީ 09 އޮކްޓޫބަރު 2016ގައެވެ. އެ އެއްބަސްވުމަށްފަހު، ފްލެޓް ގަންނަން މީހުންނަށް އެހީތެރިވުމަށާއި މާކެޓްކުރުމަށް ރާއްޖޭގެ އޭޖެންޓެއްގެ ގޮތުގައި ހަންބޯ މޯލްޑިވްސް ހަމަޖެއްސިއެވެ.