މަންޑޭގެ "ޕެންޓް ހައުސް"ގައި: ދޮޅުލައްކަ ރުފިޔާއަށް ދޭ ގަހަނާ، ބައިލައްކަ ރުފިޔާގެ އަތް ދަބަސް، ނުކަނޑައިހުރި 200 ސެންޓު ފުޅި!

އެއީ އެއް ދުވަސްވަރެއްގައި ރާއްޖޭގެ ވަރަށް މަޝްހޫރު ވިޔަފާރިވެރިއެކެވެ. އާންމުންނަށް ބޮޑެތި އެހީތެރިކަންވެސް ފޯރުކޮށްދެމުން ދިޔަ ޒުވާން ވިޔަފާރިވެރިއެކެވެ. ރާއްޖޭގެ ބޮޑެތި ނޫސްތަކުގެ ފަލަ ސުރުޚީތަކުގައި "ހަސަން މަމްދޫހު"ގެ ނަން ދިޔައީ ވިދައި ބަބުޅަމުންނެވެ. އެހެންނަމަވެސް އެ ވިދުންތައް މާގިނަ ދުވަހަކު ނުއެއް ދެމެހެއްޓުނެވެ. އެ އަލިގަދަ ވިދުންތައް ފަޑުވެގެން ގޮސް، މިއަދު މަމްދޫހު ލޭބަލްކުރެވެނީ ރާއްޖޭގައި މިހާތަނަށް ހިންގި އެންމެ ބޮޑު އެއް އޮޅުވާލުން ހިންގި ފަރާތުގެ ގޮތުގައެވެ. އާންމު ވިޔަފާރިވެރިއަކު ހިންގި އެންމެ ބޮޑު މަނީ ލޯންޑްރިންގެ މައްސަލަ ހިންގި މީހާގެ ގޮތުގައެވެ.

މަމްދޫހުގެ މި މައްސަލައަކީ ކޮބައިކަން ނުބުންޏެއްކަމަކު، ގިނަ މީހުންނަށް މަމްދޫހު އެނގެންފެށީ ވެސް ކޭޕާކުގެ މައްސަލަ ފެންމަތިވި ހިސާބުންނެވެ. ހުޅުމާލޭގައި އަޅަން ހަވާލުކުރި މަތީ ފެންވަރުގެ ހައުސިން މަޝްރޫއެއް ނުވަތަ މިކްސްޑް ޔޫސް ރެޒިޑެންޝަލް ކޮމްޕްލެކްސްއެއްގެ ތެރެއިން، އެތަން ތަރައްގީކުރުމަށް ހަވާލުކުރި ހަންބޯ މޯލްޑިވްސްގެ ވެރިޔާގެ ހައިސިއްޔަތުން އެތައް ރައްޔިތުންގެ ފައިސާ، އޮޅުވާލައިގެން މަކަރާ ހީލަތުން ނެގި ހިސާބުންނެވެ. ހަންބޯ މޯލްޑިވްސްގެ ނަމުގައި ހަދާފައިވާ ފޯޖު ލިޔުންތަކެއް ބޭނުން ކޮށްގެން، މަކަރާއި ހީލަތުން އެޕާޓްމަންޓުތައް ވިއްކައި, ފައިސާއަށް ޚިޔާނާތްތެރިވި ކަމަށް ތުހުމަތުކުރެވުނު ހިސާބުންނެވެ.

ބުރާސްފަތި ދުވަހު އެ މައްސަލައިގެ އެންމެ ފަހުގެ މައުލޫމާތު ޕްރޮސެކިއުޓަރ ޖެނެރަލް، ހުސައިން ޝަމީމް ދެއްވަމުން ގެންދެވިއިރު، މަމްދޫހު ނުވަތަ މަންޑޭ އާންމުންގެ އަތުން ނެގިކަމަށް ބުނާ ފައިސާގެ ތަފްސީލުތައް ދިޔައީ ފެންމަތި ވަމުންނެވެ. މަންޑޭ ދިރިއުޅެމުން ދިޔަ މުއްސަނދި ދިރިއުޅުމުގެ ވާހަކަތައް ދިޔައީ ބޭޒާރު ވަމުންނެވެ.

މަންޑޭގެ މައްޗަށް ޖުމްލަ 225ށްވުރެ ގިނަ ދައުވާ ކުރުމަށް ޕީޖީން މަސައްކަތް ކުރަމުންދާއިރު، މިހާރުވެސް އޭނާގެ އަގުބޮޑު ޕެންޓް ހައުސްވީ ފުލުހުންގެ ބެލުމުގެ ދަށުގައެވެ. ޖުމްލަ 7.8 މިލިއަން ރުފިޔާގެ އެ ޕެންޓް ހައުސްއާ ގާތްގަނޑަށް އެއްވަރުގެ މުދާ އެ ޕެންޓް ހައުސްގައި ހުރިއިރު، އޭގެ ބައެއް މިސާލުތައްވެސް ޕީޖީ ޝަމީމު ވަނީ ވިދާޅުވެދެއްވާފައެވެ. އޭގެ ތެރޭގައި:

- ނުކަނޑައިހުރި 200އަށްވުރެ ގިނަ ސެންޓް ފުޅި

- މަތީ ބްރޭންޑްތަކުގެ އަތް ދަބަސްތައް، ބައެއް އެފަދަ ދަބަސްތަކުގެ އަގު 50،000 ރުފިޔާއަށް އަރާ

- ތަފާތު ވައްތަރުގެ އަގުބޮޑު ގަހަނާ. ބައެއް ގަހަނާތަކުގެ އަގު 10،000 ޑޮލަރު އަދި 25،000 ޑޮލަރަށް އަރާ.

މި ނޫނަސް، މަންޑޭ އެ ފައިސާ ހޯދި ކަމަށް ބެލެވޭ ބައެއް ގޮތްތައްވެސް ތަހުގީގުން ހޯދާފައިވާ ކަމަށް ޕީޖީ ވިދާޅުވިއެވެ. އެގޮތުން ޖުމްލަ 41 އެޕާޓްމެންޓެއް 107 މީހަކަށް ވިއްކާފައިވާ ކަމަށާއި، އޭގެ ތެރެއިން އޭނާގެ ޕެންޓް ހައުސް ގަނެފައިވަނީ 4 މީހަކަށް ވިއްކި 2 އެޕާޓްމެންޓަކުން ލިބުނު ފައިސާއިން ކަން ތަހުގީގަށް ވަނީ ހާމަވެފައެވެ.

މި ހުރިހާ މައްސަލަތަކާއެކު މަންޑޭގެ މައްޗަށް ޖުމްލަ 225 ދައުވާއެއް ކުރުމަށް ޕީޖީން ތައްޔަރުވަމުންދާއިރު، އޭގެތެރޭގައި ޕީޖީން ބޭނުންވަނީ ކޮންމެ މީހެއްގެ މައްސަލައެއް ވަކިވަކި މައްސަލަތަކެއް ގޮތުގައި ކޯޓަށް ހުށަހެޅުމަށެވެ. އެގޮތުން ބަލާއިރު، މައިގަނޑު ގޮތެއްގައި މަންޑޭގެ މައްޗަށް ކުރެވޭނެ ކަމަށް ބެލެވޭ ދައުވާތަކަކީ:

- ގާނޫނުލް އުގޫބާތުގެ 310 ވަނަ މާއްދާގެ ދަށުން، ސައްހަ ނޫން ލިޔުމެއް ދިނުމުގެ ކުށުގެ ދައުވާ

- ގާނޫނުލް އުގޫބާތުގެ 313 ވަނަ މާއްދާގެ ދަށުން، އޮޅުވާލުމުގެ ކުށުގެ ދައުވާ. އެއީ ވިޔަފާރީގެ މިންގަނޑުތަކާ ކަނޑައެޅިގެން ޚިލާފުވާތީއާއި އެނގި ހުރެ މީހުންނަށް އޮޅުވާލާފައިވާތީ.

- ޓެކުމުގެ ކުށުގެ ދައުވާ

- މަނީލޯންޑްރިންއާއި ޓްރަރިޒަމް ފައިނޭންސް ކުރުން ހުއްޓުވުމުގެ ގާނޫނުގެ 53 ވަނަ މާއްދާގެ ދަށުން، މަނީ ލޯންޑްރިންގެ ދައުވާ

އެހެންނަމަވެސް، މި ދައުވާތައް އޭނާ ދޮގުކުރެއެވެ. އެގޮތުން އޭނާ ބުނާގޮތުން ނަމަ، ރައްޔިތުންގެ ފައިސާ ހިފައިގެން ފިލައިގެން އުޅެނީ އެ މަޝްރޫއު ހިންގާ ކުންފުނި ކަމަށްވާ ހަންބޯ މޯލްޑިވްސްގެ މައި ހިއްސާދާރެވެ.