30 ދުވަސް ތެރޭ ކޭޕާކުގެ 4 އެޕާޓުމަންޓެއް ހަވާލުކުރުމަށް ނުވަތަ 2.9 މިލިއަން ރުފިޔާ ދެއްކުމަށް ސިވިލް ކޯޓުގެ ޙުކުމެއް
4 ސެޕްޓެމްބަރު 2025 | ބުރާސްފަތި 16:47ކޭޕާކު ފްލެޓުތަކަށް ފައިސާ ދިން މީހުންނަށް އެތައް ގެއްލުންތަކެއް ލިބިފައިވާތީ، އެމީހުންގެ ފަރާތުން ޕެޓިޝަނެއް ރައީސް އޮފީހަށް ހުށަހެޅި
ހުޅުމާލޭގައި ތަރައްގީކުރަމުން ދާ ކޭ ޕާކު ފްލެޓުތައް
30 ދުވަސް ތެރޭ ހަންބޯ މޯލްޑިވްސް ކުންފުނިން ވިއްކާފައިވާ ކޭޕާކުގެ 4 އެޕާޓުމަންޓެއް ހަވާލުކުރުމަށް ނުވަތަ 2.9 މިލިއަން ރުފިޔާ ދެއްކުމަށް ސިވިލް ކޯޓުން ޙުކުމްކޮށްފިއެވެ.
އެ ޙުކުމް ކޮށްފައި ވަނީ ބުދަ ދުވަހުއެވެ.
ގ.ކަކާގެއާގެ، އަލީ އާދަމް ސިވިލް ކޯޓަށް ހުށަހަޅާފައިވާ މައްސަލައިގައި KP708, KP706, KP507 އަދި KP505 އެޕާޓްމެންޓްތައް އޭނާ އާއި ހަވާލުކުރުމުގެ އަމުރަކަށް ވަނީ އެދިފައެވެ. އެހެން ނޫން ނަމަ އެ ހަތަރު އެޕާޓްމެންޓުގެ އަގަށްވާ 2.9 މިލިއަން ރުފިޔާ އަނބުރާ ދެއްކުމަށް އަމުރުކޮށްދިނުމަށް އޭނާ ވަނީ ސިވިލް ކޯޓުގައި އެދިފައެވެ.
މި މައްސަލައިގައި ބުނާ އެޕާޓްމެންޓުތަކުގެ އެއްބަސްވުމަކީ 3 އެޕްރީލް 2023ގައި ވެފައިވާ އެއްބަސްވުމެކެވެ.
ސިވިލް ކޯޓުގެ ޙުކުމްގައި ބުނެފައި ވަނީ އެ މައްސަލައިގައި ފާހަގަކުރެވޭ ކަންކަމަށް ރިއާޔަތްކުރާ އިރު، މި މައްސަލައިގައި ދައުވާ ކުރާ ފަރާތްތަކާއި، މާލެ/ކަކާގެއާގެ، އަލީ އާދަމް އާއި ހަމްބޯ ޕްރައިވެޓް ލިމިޓެޑާއި ދެމެދު ދިނުމަށް އެއްބަސްވެފައިވާ އެޕާޓްމެންޓް އެ ދައުވާ ކުރި ފަރާތަކަށް ޙުކުމްކުރާ ކަމަށް ބުނެފައެވެ. އަދި އެ މުއްދަތުގެ ތެރޭގައި އެ އެޕާޓްމެންޓް ހަވާލު ނުކުރެވޭ ނަމަ އެ މައްސަލައިގައި ހިމެނޭ 4 އެޕާޓްމަންޓް ގަތުމަށް ދައުވާ ލިބޭ ފަރާތަށް ދައްކާފައިވާ 2،900،000 (ދެމިލިއަން ނުވަ ލައްކަ ރުފިޔާ) 30 ދުވަހުގެ ތެރޭގައި އަނބުރާ ދައުވާ ކުރި ފަރާތްތަކަށް ދައްކަން ވެސް ވަނީ ޚުމުންކޮށްފައެވެ.
ހަންބޯ ކޮމްޕެނީ ޕްރައިވެޓް ލިމިޓެޑުން ހުޅުމާލޭގައި ތަރައްގީކުރަމުންދާ ކޭ-ޕާކް ރެޒިޑެންސްގެ އެޕާޓްމަންޓްތައް ވިއްކުމުގައި އޮޅުވާލުމާއި، މަކަރާއި ހީލަތް ހަދާފައިވާކަމަށް ތުހުމަތުކުރެވޭ މައްސަލާގައި، ދިވެހި ފުލުހުންގެ ޚިދުމަތުން ތަހުގީގު ފުރިހަމަކޮށް، ގެއްލުން ލިބުނު 51 މީހުންނާ ގުޅިގެން ދައުވާތައް ކުރުމަށް 2023 ވަނަ އަހަރު ވަނީ ހުށަހަޅާފައެވެ. ކޭޕާކު ފްލެޓުތަކަށް ފައިސާ ދިން މީހުންނަށް އެތައް ގެއްލުންތަކެއް ލިބިފައިވާތީ، އެމީހުންގެ ފަރާތުން ޕެޓިޝަނެއް ވެސް އޭރު ރައީސް އޮފީހަށް ހުށަހަޅާފައިވެއެވެ.
