ބައްސާމްގެ ޚިޔާނާތް: ފްލެޓަށް ކުލި ދެއްކުމާއި، ދެމަފިރިންގެ ހިއްސާ އޮންނަ ކުންފުންޏަކަށް ޚަރަދު ކުރި

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އަށް އެކި ފަރާތްތަކުން ލިބެމުން އައި ފައިސާ އިން އެފްއޭއެމްގެ ރައީސް ބައްސާމް އަދީލް ޖަލީލް ކުއްޔަށް ނަގައިގެން އުޅޭ ރެހެންދި ފްލެޓަށް ކުލި ދެއްކުމަށާއި ބައްސާމް އަދި އަނބިކަނބަލުން އާމިނަތު މައުރީނާގެ ހިއްސާ އޮންނަ ކުންފުންޏަކަށް ޚަރަދު ކުރިކަން ހާމަވެއްޖެ އެވެ.

އެކަން ހާމަވެފައި ވަނީ ބައްސާމާ ދެކޮޅަށް، ޕްރޮސެކިއުޓާ ޖެނަރަލް (ޕީޖީ) އޮފީހުން އުފުލުދައުވާތަކުގެތަފްސީލުންނެވެ. އެގޮތުން ބައްސާމްގެ މައްޗަށް މަނީ ލޯންޑަރިންގެ ދައުވާ އުފުލާފައިވާއިރު، އެ ދައުވާ އުފުލާފައި ވަނީ 9،999.00 (ނުވަހާސް ނުވަސަތޭކަ ނުވަދިހަ ނުވަ އެމެރިކާ ޑޮލަރު) އޭނާގެ އެކައުންޓަށް ޖަމާކޮށް، އެ ފައިސާގެ ތެރެއިން 1,910.00 (އެއްހާސް ނުވަސަތޭކަ ދިހަ އެމެރިކާ ޑޮލަރު) 2018 ސެޕްޓެންބަރު ދެ ވަނަ ދުވަހު އަމިއްލަ މީހެއްގެ އެކައުންޓަށް ޖަމާކޮށް، އޭނާގެ ޙިއްސާ އޮންނަ ކުންފުންޏެއް ކަމަށްވާ ގްލޭސިއަރ އިންވެޓްމަންޓްސް ޕްރައިވެޓް ލިމިޓެޑުގެ ކަންކަމަށް ބޭނުންކޮށްފައިވާތީ އެވެ.

އިކޮނޮމިކް މިނިސްޓްރީން ފެންނަ ގޮތުގައި ގްލޭސިއަރ އިންވެސްޓުމަންޓުގެ މެނޭޖިން ޑައިރެކްޓަރަކީ ބައްސާމް އެވެ. އަދި އެ ކުންފުނީގެ ހިއްސާދާރުންގެ ތެރޭގައި ހިމެނެނީ ބައްސާމާއި އޭނާގެ އަނބިކަނބަލުން މައުރީނާ އެވެ.

މީގެ އިތުރުން ފައިސާގެ ތެރެއިން 2,000.00 އެމެރިކާ ޑޮލަރު (ދެހާސް އެމެރިކާ ޑޮލަރު) 2018 ސެޕްޓެންބަރު ފަހެއް ވީ ދުވަހު ބައްސާމް ކުއްޔަށް ނަގައިގެން އުޅުނު ކ. މާލެ، ރެހެންދި 6-302 ފްލެޓަށް ކުލި ދެއްކުމުގެ ގޮތުން ބޭނުންކޮށްފައިވާތީ އަދި އެފްއޭއެމް އިން އޭނާގެ އެކައުންޓަށް ޖަމާކުރި ފައިސާ އެކި ޢަދަދުތަކުން އެކި މީހުންނަށް ފޮނުވައި، އެފްއޭއެމްއާ ގުޅުމެއް ނެތް ކަންކަމަށް ހަރަދުކޮށް، އެ ފައިސާ އޭނާގެ އަމިއްލަ ކަންކަމަށް ބޭނުންކޮށްފައިވާކަން ވެސް ވަނީ ހާމަވެފަ އެވެ.

ޕީޖީ އޮފީހުން ވަނީ ލޯންޑަރކުރުމަށް ބޭނުންކޮށްފައިވާ 10،000.00 (ދިހަހާސް އެމެރިކާ ޑޮލަރު) ދައުލަތަށް ނަގައިދިނުމަށް ވެސް އެދިފަ އެވެ.

މިކުށް ސާބިތުވެއްޖެނަމަ އަންނަ އަސާސީ އަދަބަކީ 100,000 ރުފިޔާއާއި 1,000,000 ރުފިޔާއާއި ދެމެދުގެ އަދަދަކުން ޖޫރިމަނާ ކުރުމާއެކު ފަސް އަހަރާއި 15 އަހަރާއި ދެމެދުގެ މުއްދަތަކަށް ޖަލަށްލުން ނުވަތަ ފަސް އަހަރާއި 15 އަހަރާއި ދެމެދުގެ މުއްދަތަކަށް ޖަލަށް ލުމެވެ.