އިނގިރޭސި ޕްރިމިއަރ ލީގު ތާވަލްގެ އެއްވަނައިގައި އޮތް ލިވަލޫލުން, ޗެލްސީ އަތުން ބޮޑު މޮޅެއް ހޯދި މެޗުގައި ކޯނޯ ބްރެޑްލީ ވިދާލައިފި އެވެ.

ލިވަޕޫލުން ވަނީ 4-1 ން ޗެލްސީ ބަލިކޮށް, އެއްވަނައިގައި 5 ޕޮއިންޓްގެ ލީޑެއް ނަގާފައެވެ. އަމިއްލަ ދަނޑުގައި ކުޅުނު މެޗުގައި ލިވަޕޫލަށް ލީޑް ނަގައިދިނީ 23 ވަނަ މިނެޓުގައި ޖޮޓާ އެވެ. 39 ވަނަ މިނެޓުގައި ދެވަނަ ލަނޑު ޖެހީ މެޗުގައި ވިދާލި ބްރެޑްލީ އެވެ. މިއީ އޭނާ ލިވަޕޫލަށް ޖަހައިދިން ފުރަތަމަ ލަނޑެވެ. ފުރަތަމަ ލަނޑު ޖަހަން ޖޮޓާއަށް ފުރުޞަތު ފަހިކޮށްދިނީވެސް, އަދި ތިންވަނަ ލަނޑު ޖަހަން ފުރުޞަތު ތަނަވަސްކޮށްދިނީވެސް 20 އަހަރުގެ ބްރެޑްލީ އެވެ. ދެވަނަ ހާފްގައި ތިންވަނަ ލަނޑު ޖެހީ ސްޒޮބޮސްލައި އެވެ. ފަހު ލަނޑު ޑިއާޒް ޖެހީ 79 ވަނަ މިނެޓުގައެވެ. ފުރަތަމަ ހާފްގައި ލިވަޕޫލަށް ލިބުނު ޕެނަލްޓީ ޑާވިންގ ނޫނޭޒް އަށް ކާމިޔާބެއް ނުކުރެވުނެވެ. ޗެލްސީއަށް ސުން ކަނޑުވާލެވުނީ 71 ވަނަ މިނެޓުގައި އެންކުންކޫ ޖެހި ލަނޑުންނެވެ.

ލިވަޕޫލް ތާވަލްގެ އެއްވަނައިގައި އޮތީ ފަސް ޕޮއިންޓްގެ ލީޑަކާ އެކުއެވެ. ޗެލްސީ އޮތީ 31 ޕޮއިންޓާއެކު 10 ވަނައިގައި އެވެ.