އެފްއޭއެމް ކޮންގްރެސް އޮންލައިންކޮށް ބާއްވަނީ!

ފުޓްބޯޅަ އެސޯސިއޭޝަން އޮފް މޯލްޑިވްސްގެ ކޮންގްރެސް އޮންލައިންކޮށް އަންނަ ހަފުތާގެ ބުރާސްފަތި ދުވަހު ބާއްވަން އެ އިދާރާއިން ނިންމައިފި އެވެ.

މިއީ އޮންލައިންކޮށް އެފްއޭއެމުން ކޮންގެރެސް ބާއްވާ ފުރަތަމަ ފަހަރެވެ. މިކަން މިގޮތަށް ކުރާ ސަބަބެއް އެ އިދާރާއިން ބުނެފައިނުވެ އެވެ.

ކުއްލި މި ކޮންގްރެސް އަކީ އެފްއޭއެމުގެ އަސާސީ ގަވާއިދުގެ ދަށުން ކޮންމެހެން ހަދަންޖެހޭ ބައެއް ކޮމިޓީތައް އެކުލަވާލާފައިނުވާތީވެ، ފީފާ އާއި އޭއެފްސީން އެކަން ކުރަން އެންގުމުން ބާއްވާ ކޮންގްރެސްއެކެވެ.

މި ގޮތުން އެކުލަވާލަންޖެހޭ ކޮމިޓީތަކަކީ އިލެކްޓޯރަލް ކޮމިޓީ އާއި އެޕީލްސް ކޮމިޓީ އަދި އިންތިޚާބީ އެޕީލްސް ކޮމިޓީއާއި ޑިސިޕްލިނަރީ ކޮމިޓީ އެވެ.

އެފްއޭއެމުން މި ކޮމިޓީތައް އެކުލަވާލާފައި ނެތްކަން އެނގުނީ އެ އިދާރާގެ އިންތިހާބުގައި މައްސަލަޖެހުމުންނެވެ. އެއީ ކެންޑިޑޭޓް އަހުމަދު ތޯރިގް (ޓޮމް)ގެ ކެންޑިޑެސީ ބާތިލްކުރުމުން އޭނާ އެ މައްސަލަ އެޕީލްކުރުމުންނެވެ.

އެފްއޭއެމުގެ އެންމެ ފަހުގެ އަހަރީ ކޮންގްރެސްގައި އިލެކްޓޯރަލް ކޮމިޓީއަށް ތިން މެންބަރުން ނެގި އެވެ. އެކަމަކު އެއީ ކުރިން ވެސް ތިބި ތިން މެންބަރުންނެވެ. އެކޮމިޓީ ބާތިލުވީ އިލެކްޓޯރަލް ކޮމިޓީއަށް ޖެހިޖެހިގެން ދެ ދައުރަށް މެންބަރުން އިންތިހާބުކުރެވޭނެ ކަމަށް ގަވާއިދުގައި ބުނެފައިވާތީ އެވެ.

އެފްއޭއެމުގެ އިންތިހާބުގެ މައްސަލަ ޖެހިފައިވާއިރު އެއިދާރާގެ ހިންގުން ބޮއްސުންލައި ރައީސް ބައްސާމް އަދީލް ޖަލީލަށް ވަނީ ހިޔާނާތާއި މަނީލޯންޑަރިންގެ ދައުވާވެސްކޮށްފަ އެވެ.