ރައްޔިތުންގެ މަޖިލީހުގެ ޖަލްސާ ދެން ފަށާނީ މިރޭ 08:00ގައި ކަމަށް، މަޖިލީހުގެ އިދާރާއިން މެމްބަރުންނަށް އަންގައިފިއެވެ.

މެމްބަރުންނަށް އެގޮތަށް އަންގާފައި ވަނީ މިއަދު އިރުއޮއްސެން ކައިރިވެފައި ވަނިކޮށެވެ. ރައީސުލްޖުމްހޫރިއްޔާ ޑރ. މުހައްމަދު މުއިއްޒު އައްޔަންކުރައްވާފައިވާ 22 ވަޒީރުންނަށް ރުހުން ދިނުމާ ގުޅޭގޮތުން ނަގާ ވޯޓު 1:30ގައި ނެގުމަށް އޮތީ ހަމަޖެހިފައެވެ. އެހެންނަމަވެސް ޕީއެންސީގެ މެމްބަރުން މަޖިލިސް ފްލޯރ ތަޅުލައިގެން ތިބުމުން، ރައްޔިތުންގެ މަޖިލީހުގެ ޖަލްސާ ކުރިއަށް ގެންދިއުމުގެ ޖާގައެއް ނުލިބުނެވެ.

ތަކުރާރުކޮށް މަޖިލީހުގެ ޖަލްސާ ކުރިއަށް ގެންދަން އެމްޑީޕީއާއި ޑިމޮކްރެޓްސްގެ މެމްބަރުން މަސައްކަތްކުރި ނަމަވެސް، އެ މެމްބަރުންނަށް މަޖިލީހުގައި މަސައްކަތް ކުރިއަށް ގެންދިއުމުގެ ފުރުސަތު ސަރުކާރަށް ތާއީދުކުރާ މެމްބަރުން ނުދިންކަން ފާހަގަކޮށްލެވެއެވެ. މަޖިލީހުގެ ޖަލްސާ ކުރިއަށްގެންދެވޭނެ މާހައުލެއް ނެތުމުން، މަޖިލީހުގެ ޖަލްސާދެން ފެށޭނެ ވަގުތެއް އަންގާނެ ކަމަށް މަޖިލީހުގެ އިދާރާއިން ވަނީ އޭރު މެމްބަރުންނަށް އަންގާފައެވެ.

އެ 22 މެމްބަރުންނަށް ރުހުން ހޯދުމަށް މަޖިލީހަށް ހުށަހަޅުއްވާފައިވަނީ މިދިޔަ އަހަރުގެ ޑިސެމްބަރު މަހުގެ 19 ވަނަ ދުވަހުއެވެ. ދައުރުން ބޭރުން އާދިއްތަ ދުވަހު ބޭއްވި މި ޖަލްސާގައި، ވަޒީރުންނަށް ރުހުން ދިނުމުގެ މައްސަލައަށް މެމްބަރުން ވަނީ ބަހުސް ކުރައްވާފައެވެ. 3 ވަޒީރަކާއި ބަންޑާރަ ނައިބަށް ރުހުން ނުދޭން އެމްޑީޕީގެ ޕީޖީ ގްރޫޕުން ވަނީ ނިންމާފައެވެ. އެމްޑީޕީ ޕީޖީ ގްރޫޕުން އާދިއްތަ ދުވަހު ބޭއްވި ބައްދަލުވުމުގައި ރުހުން ނުދޭން ނިންމާފައިވަނީ:

*ޑރ. އަލީނައިފަރު އަހުމަދު، މިނިސްޓަރ އޮފް ހައުސިންގ، ލޭންޑް އެންޑް އަރބަން ޑިވެލޮޕްމަންޓް

*ޑރ.މުހައްމަދު ޝަހީމް އަލީ ސައީދު، މިނިސްޓަރ އޮފް އިސްލާމިކް އެފެއަރޒް

*މުހައްމަދު ސައީދު، މިނިސްޓަރ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑް

*އަލްއުސްތާޒު އަހުމަދު އުޝާމް، އެޓަރނީ ޖެނެރަލް އަށެވެ.

އާދިއްތަ ދުވަހު ބޭއްވި ޕީޖީ ބައްދަލުވުމުގައި ބައިވެރިވެވަޑައިގަތީ 37 މެމްބަރުންނެވެ. އެ ނިންމުން ފާސްވީ 21 މެމްބަރުންގެ ވޯޓާއި އެކުގައެވެ. އެމްޑީޕީ ޕީޖީ ގްރޫޕުން ވަނީ ބާކީ ތިބި ވަޒީރުންނަށް މެމްބަރުންނަށް ފެންނަ ގޮތަކަށް ވޯޓު ދިނުމަށް "ފްރީ ވިޕެއް" ނެރުމަށް ފާސްކޮށްފައެވެ. އެހެންކަމުން ޖަލްސާ ކުރިއަށް ގެންގޮސްފިނަމަ ބައެއް ވަޒީރުންނަށް ރުހުން ނުލިބޭނެކަން ޔަގީންވެއެވެ. ޕީޕީއެމް ޕީއެންސީގެ ބައެއް ސަޕޯޓަރުން ވަނީ މަޖިލިސް ދޮށަށް އެއްވެ، ވަޒީރުންނަށް ރުހުން ދިނުމަށް ގޮވާލައި މުޒާހަރާވެސް ކޮށްފައެވެ.