މަޓާޓޯގެ ސީއީއޯއަކަށް ސޫޒަން
މިއީ އެ އެސޯސިއޭޝަނުން މިންތީގެ ހަމަހަމަކަމަށް އިސްކަންދޭ މިންވަރު ދައްކުވައިދޭ ކަމެއް ކަމަށް ބުނެފައިވޭ
އާމިނަތު ސޫޒަން
މޯލްޑިވްސް އެސޯސިއޭޝަން އޮފް ޓްރެވެލް އޭޖެންޓްސް އެންޑް ޓުއާ އޮޕަރޭޓަރސް (މަޓާޓޯ)ގެ ސީއީއޯއަކަށް އާމިނަތު ސޫޒަން އައްޔަންކޮށްފިއެވެ.
މަޓާޓޯގެ ސީއީއޯއަކަށް ސޫޒަން އައްޔަންކުރިކަން ހާމަކޮށް އެސޯސިއޭޝަނުން ނެރުނު ބަޔާނުގައި ބުނެފައިވަނީ މިއީ އެ އެސޯސިއޭޝަނުން މިންތީގެ ހަމަހަމަކަމަށް އިސްކަންދޭ މިންވަރު ދައްކުވައިދޭ ކަމެއް ކަމަށެވެ. އަދި ރާއްޖޭގެ ޖީޑީޕީގެ ފަސް ޕަސެންޓް ފަތުރުވެރިކަމުގެ ދާއިރާ ހިއްސާކުރާއިރު، މި ދާއިރާގައި ހަރަކާތްތެރިވަނީ ދިވެހި އަންހެނުންގެ އެންމެ ފަސް ޕަސެންޓްކަން މަޓާޓޯއިން ފާހަގަކުރިއެވެ.
އެއީ، މިފަދަ މުހިންމު ދާއިރާތަކުގައި އަންހެނުން ބާރުވެރިކޮށް، މިންތީގެ ހަމަހަމަކަން ގާއިމުކުރުން އަވަސްކުރުމުގެ މުހިންމުކަން ދައްކުވައިދޭ ކަމެއް ކަމަށް އެ އެސޯސިއޭޝަންގެ ބަޔާނުގައިވެއެވެ. އެހެންހަކަމުން ފަތުރުވެރިކަމުގެ ދާއިރާގައި އަންހެނުންނަށް ފުރުސަތުތައް ފަހިކޮށްދީ، އެންމެން ޝާމިލުވާ މާހައުލެއް ގާއިމުކުރުމުގެ މުހިންމުކަން މަޓާޓޯއިން ބަލައިގަންނަ ކަމަށް ބަޔާނުގައިވެއެވެ.
ހޮޓެލްސް އެންޑް ރިޒޯޓް ކޮންސްޓްރަކްޝަން ކުންފުނީގެ މެނޭޖިން ޑިރެކްޓަރުކަން ކުރައްވާފައިވާ ސީޒަނަކީ މޯލްޑިވްސް ނެޝަނަލް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީ (އެމްއެންއޭސީއައި)ގެ ފުރަތަމަ އަންހެން އެގްޒެކެޓިވް ބޯޑް މެންބަރެވެ. އޭނާއަކީ ނެޝަނަލް ފެޑެރޭޝަން އޮފް މޯލްޑިވިއަން އެމްޕްލޯޔާސް (އެންއެފްއެމްއީ)ގެ ވެސް އެގްޒެކެޓިވް ބޯޑް މެންބަރެކެވެ.
ސޫޒަން ވަނީ އެޗްއެސްބީސީ މޯލްޑިވްސްގައި ހަތް އަހަރު މަސައްކަތް ކުރައްވާފައެވެ.
