މޯލްޑިވްސް އެސޯސިއޭޝަން އޮފް ޓްރެވެލް އެޖެންޓްސް އެންޑް ޓުއާ އޮޕަރޭޓާސް, މަޓާޓޯގެ ލަފަޔަކީ އިޒްރޭލްގެ އާންމުން ނުހިމަނައި ވެރިންގެ ޕާސްޕޯޓު މަނާކުރުންކަމަށް އެ އެސޯސިއޭޝަނުން ހާމަކޮށްފިއެވެ.

އެ އެސޯސިއޭޝަނުން އެކަން ހާމަކުރީ ބުދަ ދުވަހު މަޖިލީހުގެ ސަލާމަތީ ޚިދުމަތްތަކާއި ބެހޭ ކޮމިޓީގައެވެ. އިޒްރޭލްގެ ޕާސްޕޯޓު މަނާކުރުމަށް ގާނޫނަށް ބަދަލު ގެންނަން، ސަރުކާރުގެ ސުޕަރ މެޖޯރިޓީ އޮންނަ ރައްޔިތުންގެ މަޖިލީހަށް ހުށަހަޅާފައި އޮންނަތާ 160 ދުވަހަށް ވުރެ ގިނަ ދުވަސް ވެފައިވާއިރު އެ މަސައްކަތް އަވަސްކުރުމަށް ނިންމާ ކަމާއި ގުޅުން ހުރި ފަރާތްތަކާއި ބައްދަލުކުރުމުގެ މަސައްކަތް ފަށާފައި ވަނީ ނިމިދިޔަ ހަފްތާގެ ފަހުކޮޅުއެވެ. މީގެ ކުރިން މަޖިލީހުގެ ސަލާމަތީ ޚިދުމަތްތަކާއި ބެހޭ ކޮމިޓީގައި ގެސްޓް ހައުސް އެސޯސިއޭޝަނުން ވެސް ބުނެފައި ވަނީ އިޒްރޭލްގެ އާންމުން ނުހިމަނައި ވެރިންގެ ޕާސްޕޯޓު މަނާކުރަން ފެންނަ ކަމަށެވެ. މަޓާޓޯ އިން ވެސް ވާހަކަދެއްކީ އެ ހުށަހެޅުމަށް ތާއީދުކޮށެވެ.

އެގޮތުން މަޓާޓޯގެ ރައީސް އަބްދުﷲ ގިޔާސް ރިޔާޒް ވިދާޅުވީ އިޒްރޭލްގެ އިސްވެރިންނަށް ފިޔަވަޅުތައް އަޅަން ފެންނަ ކަމަށެވެ. އަދި މި މައްސަލައިގައި އަމަލުކުރަން ފެންނަނީ ބައިނަލްއަގުވާމީ ފަރާތްތަކުން އަމަލުކުރާ ގޮތަށް ކަމަށް އެނާ ވިދާޅުވިއެވެ. އެގޮތަކީ އިޒްރޭލްގެ ސަރުކާރާއި އިޒްރޭލްގެ އިސްވެރިންނަށް އަމާޒުކޮށްގެން ފިޔަވަޅު އެޅުންކަމަށް އޭނާ ވިދާޅުވިއެވެ. މީގެ އިތުރުން އިޒްރޭލްގެ ޕަސްޕޯޓު މަނާ ކުރުމުގައި ޑުއަލް ޕާސްޕޯޓު ގެންގުޅޭ މީހުންނާ މެދު ގޮތެއް ނިންމުމުގެ ކުރިން ރާއްޖެއަށް ދިމާވެދާނެ ހާލަތަކާ މެދު ފަރުވާތެރިކަމާއި އެކު ވިސްނަން ޖެހޭ ކަމަށް އޭނާ ވަނީ ފާހަގަކުރައްވާފައެވެ. އޭނާ ވަނީ އިޒްރޭލްގެ ޕާސްޕޯޓު މަނާކުރާނެކަން އިއުލާންކުރުމުން، އެމެރިކާއިން ރާއްޖެއަށް ފިޔަވަޅުތައް އަޅަން އުޅޭ ކަމަށާއި ރާއްޖޭގެ ކްރެޑިޓް ރޭޓިން ދަށް ކުރީ އެހެންވެގެން ކަމަށް ފިނޭންސް މިނިސްޓްރީން ހާމަކޮށްފައިވާ ކަމަށެވެ. މި މައްސަލައިގައި ގޮތެއް ނިންމާއިރު އެކަންކަމަށް ވެސް ވިސްނަންޖެހޭ ކަމަށް އޭނާ ވަނީ ވިދާޅުވެފައެވެ.

އެ ކޮމިޓީގައި ވާހަކަދައްކަވަމުން މަޓާޓޯގެ ސީއީއޯ އައިމިނަތު ސޫޒަން ވެސް ވާހަކަދެއްކެވީ އިޒްރޭލްގެ އާންމުން ނުހިމަނައި ވެރިންގެ ޕާސްޕޯޓު މަނާކުރުމަށް ތާއީދުކޮށެވެ. އޭނާ ވަނީ މި މައްސަލައިގައި ނިންމާ ނިންމުމުގެ ސަބަބުން ރާއްޖެއިން ޔަހޫދީންނާ ދެކޮޅު ބައެއް ކަމަށް ދޭހަވާ ގޮތަށް ކަންކަން ނިންމުން ރަނގަޅު ނޫން ކަމަށް ވިދާޅުވެފައެވެ. ހަމައެެހެންމެ ރާއްޖެއަށް އަންނަ އިޒްރޭލް މީހުންނަށް ނަފުރަތު އުފެއްދުން ރަނގަޅު ނޫންކަަމަށް ފާހަގަކުރައްވާ އޭނާ ވަނީ އެކަމާއި މެދު ކަންބޮޑުވުން ފާޅުކުރައްވާފައެވެ.

އިޒްރޭލް މީހުން ރާއްޖެ އަށް އެތެރެވެވޭ ގޮތަށް އޮންނަ އޮތުން ބަދަލުކުރަން ގާނޫނު އިސްލާހު ކުރަން ޖޫން މަހުގެ 2 ވަނަ ދުވަހު ސަރުކާރުން ނިންމާ ރައީސް އޮފީހުގައި ވަޒީރުން ބޭއްވި ނޫސް ކޮންފަރެންސެއްގައި އެކަން އިއުލާން ކުރިއެވެ.

އެ ދުވަހުގެ ކެބިނެޓް ބައްދަލުވުމަށް ފަހު، ރައީސް އޮފީހުގައި ބޭއްވި މި ނޫސް ކޮންފަރެންސްގައި ހޯމްލޭންޑް ސެކިއުރިޓީ މިނިސްޓަރު އަލީ އިހުސާން ވިދާޅުވީ، އެދުވަހުގެ ކެބިނެޓް ބައްދަލުވުމުގައި ރައީސް ޑރ. މުހައްމަދު މުއިއްޒު ނިންމަވާފައި ވަނީ އިޒްރޭލް މީހުން ރާއްޖެ އެތެރެވިޔަ ނުދިނުމަށްޓަކައި ގާނޫނަށް ގެންނަން ޖެހޭ އިސްލާހުތައް ގެންނަން ކަމަށެވެ.

ވަޒީރުންގެ މަޖިލީހުން ގާނޫނު ބަދަލު ކުރަން ނިންމިތާ 18 ދުވަސް ފަހުން، މަޖިލީހުގެ 20 ވަނަ ދައުރަށް ހުށަހެޅި ފުރަތަމަ ބިލުގެ ގޮތުގައި ޖޫން މަހުގެ 10 ވަނަ ދުވަހު ގަލޮޅު ދެކުނު ދާއިރާގެ އެމްޑީޕީ މެންބަރު މީކާއިލް އަހުމަދު ނަސީމް، އިޒްރޭލް ޕާސްޕޯޓް މަނާ ކުރުމުގެ ގޮތުން އިމިގްރޭޝަން ގާނޫނަށް އިސްލާހް ގެނައުމުގެ ބިލު މަޖިލީހުގެ ތަޅުމަށް ހުށަހެޅުއްވިއެވެ.

ބިލް ބަލައިގަތުމަށް ފެނޭތޯ ހަމަ އެދުވަހު މަޖިލީހުގެ ތަޅުމުގައި ވޯޓު ނެގިއެވެ. ޖަލްސާ އަށް ހާޒިރުވި 88 މެމްބަރުންގެ އިއްތިފާގުން ފާސްވެ، ބިލް މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީއަށް ފޮނުވުމަށް ނިންމިއެވެ.

ބިލް ކޮމިޓީ އަށް ފޮނުވި ފަހުން ޖުލައި މަހުގެ 10ށް އެއް މަސް ދުވަސް ފުރިގެން ދިޔައިރު، އޭގެ ފަހުން ސަލާމަތީ ޚިދުމަތްތަކުގެ ކޮމިޓީގެ 4 ބައްދަލުވުން ބޭއްވުނު އިރު މި ބިލުގެ މަސައްކަތް އެޖެންޑާ ކޮށްފައެއް ނުވެއެވެ.