މަޓާޓޯގެ ޑެސްޓިނޭޝަން ވާރކްޝޮޕް ބާއްވައިފި
އިންޑަސްޓްރީގައި ހުރި ހުރަސްތަކާއި ގުޅޭގޮތުން ހިޔާލު ބަދަލުކޮށް، މަޝްވަރާ ކޮށްފައިވޭ
މަޓާޓޯގެ ވާރކްޝޮޕްގެ ތެރެއިން
މަޓާޓޯ އިން ޑެސްޓިނޭޝަން ވާރކްޝޮޕް ބާއްވައިފިއެވެ.
ހޮނިހިރު ދުވަހު ޗަމްޕާ ސެންޓްރަލް ހޮޓެލްގައި ބޭއްވި މި ވާރކްޝޮޕްގައި މަޓާޓޯގެ އިސްވެރިންނާއި އިންޑަސްޓްރީގެ ބައެއް ފަރާތްތައް ވަނީ ބައިވެރިވެވަޑައިގެންފައެވެ. މި ވާރކްޝޮޕް ކުރިއަށް ގެންގޮސްފައިވަނީ އެއް ދުވަހަށެވެ.
މަޓާޓޯ އިން ބުނީ ވާރކްޝޮޕްގެ މައިގަނޑު މަގްސަދަކީ ފަތުރުވެރިކަމުގެ ސިނާއަތުގައި ހަރަކާތްތެރިވާ މުހިންމު ފަރާތްތަކުގެ ތެރޭގައި ލޯކަލް ޓްރެވަލް އެޖެންޓުންނާއި ރިސޯޓްތަކާއި ގެސްޓް ހައުސްތަކާއި ހޮޓާތަކުގެ ސްޓޭކްހޯލްޑަރުންނާއި ސަރުކާރުގެ މަންދޫބުން އެއްތަނަކަށް ގެނައުން ކަމަށެވެ.
މަޓާޓޯ އިން ބުނީ އަމާޒަކީ 2024 ވަނަ އަހަރަށް އެކުގައި ގުޅިގެން ޚިޔާލުތައް އުފައްދައި، މިހާރު ހުރި ގޮންޖެހުންތަކަށް ޙައްލު ހޯދުމާއި، އިނޮވޭޓިވް ސޮލިއުޝަންތައް އެކުލަވާލުން ކަމަށެވެ.
މި ވާރކްޝޮޕް ގުރޫޕްތަކަކަށް ބަހާލައިގެން ކުރިއަށް ގެންގޮސްފައިވާއިރު ކޮންމެ ގުރޫޕަކަށްވެސް ގުޅިގެން މަޝްވަރާކޮށް، ގޮންޖެހުންތަކާ ބެހޭ ގޮތުން އެފަރާތްތަކުގެ ވިސްނުން އެއްކޮށް، ޢަމަލީ ޙައްލުތައް ހުށައެޅުމުގެ ފުރުސަތު ވަނީ ދީފިއެވެ.
މި އިންޓަރެކްޓިވް ފޯމެޓްގެ ސަބަބުން ޚިޔާލުތައް ބަދަލުކޮށް، އިންޑަސްޓްރީގެ ހުރަސްތަކުން އަރައިގަތުމަށް އެންމެން ގުޅިގެން ކުރާ މަސައްކަތްތައް ކަށަވަރު ވެގެންދިޔަ ކަމަށް ވެސް މަޓާޓޯ އިން ވަނީ ބުނެފައެވެ.
