ގާނޫނުން ލާމަރުކަޒީ ނިޒާމު އިތުރަށް ހަރުދަނާކުރުމަށް ދެޕާޓީން ގުޅިގެން މަސައްކަތްކުރާނެ: ހަސަން ލަތީފް

ގާނޫނު އަސާސީން ލާމަރުކަޒީ ނިޒާމު އިތުރަށް ހަރުދަނާ ކުރުމުގެ މަސައްކަތް މޯލްޑިވިއަން ޑިމޮކްރަޓިކް ޕާޓީ (އެމްޑީޕީ)އާއި ދަ ޑިމޮކްރެޓްސްއިން ގުޅިގެން މަސައްކަތް ކުރާނެ ކަމަށް ޑިމޮކްރެޓްސްގެ ރައީސް ހަސަން ލަތީފް ވިދާޅުވެއްޖެއެވެ.

ދެޕާޓީން ގުޅިގެން ބޭއްވި ނޫސްވެރިންގެ ބައްދަލުވުމުގައި ހަސަން ލަތީފް ވިދާޅުވީ ލާމަރުކަޒީ ގޮތުން އިދާރީ ދާއިރާތައް ހިންގުމުގައި ހުރި ހުރަސްތައް ނައްތާލުމަށް މަސައްކަތް ކުރަމުންދާ ކަމަށާއި، މި ހުރަސްތައް ނައްތާލުމަށް ގާނޫނަށް އެކިފަހަރުމަތިން އެކި ބަދަލުތައް ސަރުކާރުތަކުން ގެނެސްފައިވާ ކަމަށެވެ. ނަމަވެސް ރަނގަޅު ބަދަލެއް ގެނެވިފައިނުވާކަން އޭނާ ފާހަގަކުރެއްވިއެވެ.

ހަސަން ލަތީފް ވިދާޅުވީ ލާމަރުމަޒީ ނިޒާމު ހަރުދަނާ ކުރުމުގެ މަސައްކަތް ދެ ޕާޓީން ގުޅިގެން މަސައްކަތް ކުރާނެ ކަމަށާއި، ކުރިއަށް އޮތްތަނުގައި މި މަސައްކަތާއި ގުޅޭގޮތުން ދެ ޕާޓީން މަޝްވަރާކުރާނެ ކަމަށެވެ. ދެ ޕާޓީގެ މަޝްވަރާއާއެކު ގާނޫނު އަސާސީއަށް އިސްލާހެއް ގެނެވޭނެ ކަމަށް ހަސަން ލަތީފް ވިދާޅުވިއެވެ.

ލާމަރުކަޒީ ނިޒާމު އިތުރަށް ހަރުދަނާ ކުރުމަށް ގާނޫނަށް ބަދަލުގެނައުމާއި ގުޅޭ މަޝްވަރާތައް ކުރުމަށް ނިންމާފައިވާއިރު، ދެ ޕާޓީން ގުޅިގެން ބައެއް މަސައްކަތްތައް ކުރުމަށް މިހާރު ވަނީ އެއްބަސްވެފައެވެ. އެގޮތުން ސިޔާސީ މަގާމުތަކާއި ރައްޔިތުންގެ މަޖިލީހުގެ މެންބަރުންގެ އަދަދު ކޮންޓްރޯލްކޮށް، ސަރުކާރު ހިއްސާވާ ކުންފުނިތައް އުފެއްދޭނެ އުސޫލެއް ކަނޑައެޅުމާއި، ގާނޫނު އަސާސީއަށް ގެންނަންޖެހޭ ބަދަލުތައް ގެނައުމަށް ނިންމާފައިވެއެވެ.