ގާނޫނު އަސާސީ ވަނީ ޕެރަލައިޒް ކޮށްފައި، އިދިކޮޅު ހުރިހާ ސިޔާސީ ލީޑަރުން މަޝްވަރާގެ މޭޒަށް އަރަންޖެހޭ: ޑރ.ޑީޑީ
23 އޯގަސްޓު 2025 | ހޮނިހިރު 05:51ސަރުކާރުން ދަނީ އެއްދުވަހުން އަނެއް ދުވަހަށް ރައްޔިތުންގެ ބާރުވެރިކަން ކަނޑުވާލައި، ހައްގުތަކަށް އަރައިގަންނަމުން
ފަަލަސުރުހީ ޕްރޮގްރާމްގައި އެމްޑީޕީގެ ކުރީގެ ރައީސް ޑރ.އިބްރާހިމް ދީދީ ވާހަކަދައްކަވަނީ
ދިވެހިރާއްޖޭގެ ފެހި ގާނޫނު އަސާސީ ޕެރަލައިޒް ކޮށްލާފައިވާ ކަމަށާއި، ރައްޔިތުންނާއި ގައުމުގެ ހައްގުގައި ސިޔާސީ އިދިކޮޅު ހުރިހާ ސިޔާސީ ލީޑަރުން މަޝްވަރާގެ މޭޒަށް އަރަންޖެހޭ ކަމަށް އެމްޑީޕީގެ ކުރީގެ ރައީސް ޑރ.އިބްރާހިމް ދީދީ (ޑރ.ޑީޑީ) ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ޑރ.ޑީޑީ ވިދާޅުވީ ރައީސް ޑރ.މުހައްމަދު މުއިއްޒުގެ ސަރުކާރުން ދަނީ އެއްދުވަހުން އަނެއް ދުވަހަށް ރައްޔިތުންގެ ބާރުވެރިކަން ކަނޑުވާލައި، ރައްޔިތުންގެ ހައްގުތަކަށް އަރާގަންނަމުން ކަމަށެވެ. ރާއްޖޭގެ ހުރިހާ ހިސާބަކުން އެ މަންޒަރު ފެންނަމުންދާ ކަމަށާއި، ރައްޔިތުން އިންތިޚާބު ކުރި ވެރިއެއް ނަމަވެސް މިއީ ރައްޔިތުންގެ ވެރިކަމެއް ނޫން ކަމަށް އޭނާ ވިދާޅުވިއެވެ.
ރައީސް މުއިއްޒުގެ ހުންނެވީ ރަސްކަލެއްގެ ވިސްނުންފުޅުކަން ފާހަގަކުރައްވައި ޑރ.ޑީޑީ ވިދާޅުވީ އެމަނިކުފާނުގެ އަތްޕުޅަށް ހުރިހާ ބާރުތަކެއް ނަންގަވަމުން ގެންދަވާ ކަމަށާއި، ރައްޔިތުންގެ ހުރިހާ ބާރެއް ވައު ކުރަމުންދާ ކަމަށެވެ. އަދި ފެހި ގާނޫނު އަސާސީގެ ބާރުތައް ކަނޑުވާލާފައި މުޅި ގާނޫނު އަސާސީ ޕެރަލައިޒްކޮށްލާފައިވާ ކަމަށް ޑރ.ޑީޑީ ވިދާޅުވިއެވެ.
ޑރ.ޑީޑީ ވިދާޅުވީ މިސަރުކާރުގައި ރައްޔިތުންގެ މަޖިލީހުގައި ބޮޑުތަޅުއަޅުވައި، ނުހައްގުން ސުޕްރީމް ކޯޓުގެ ބެންޗު ބަދަލުކޮށް، ފަނޑިޔާރުގެ ގޭގެ ބާރުވެރިކަން ވެސް ކަނޑުވާލާފައިވާ ކަމަށެވެ. ކައުންސިލްތަކުގެ ބާރުތައް ހަނިކޮށް، މިހާރު މިނިވަން މީޑީއާތަކުގައި ތަޅުއެޅުވުމުގެ މަސައްކަތް ފަށާފައިވާ ކަމަށް އޭނާ ވިދާޅުވިއެވެ.
މީގެ އިތުރުން ޑރ.ޑީޑީ ވިދާޅުވީ ގައުމުގައި ހުދުމުހުތާރު ވެރިކަމެއްގެ ނުރައްކާތެރި ރަނގަބީލު ޖެހެމުންދާއިރު، ރައްޔިތުންނާއި، ގައުމުގެ ހައްގުގައި މިސަރުކާރާ ދެކޮޅު ހުރިހާ ސިޔާސީ ލީޑަރުން މަޝްވަރާގެ މޭޒަށް އަރައި، ގައުމު ސަލާމަތް ކުރަންޖެހޭ ކަމަށެވެ.
މިއީ ރައްޔިތުން އިންތިހާއަށް ކަންބޮޑުވާ މައްސަލައެއް. މިކަމުގައި އަޅުގަނޑަށް ފެންނަ ފެނުމުގައި ދިވެހިރާއްޖޭގައި މިވަގުތު ތިއްބެވި އިދިކޮޅު ހުރިހާ ފަރާތްތަކުން ވަރަށް ފުންކޮށް ވިސްނައިވަޑައިގެން، އެއްމޭޒު ދޮށަށް މަޝްވަރާ މަޖިލީހަށް ވަޑައިގަތުމަކީ ވަރަށް މުހިންމު ކަމެއް. އެގޮތުން ވެރިކަމުގެ ދައުރު ފުރިހަމަ ކުރައްވާފައި ތިބި ބޭފުޅުންގެ ތެރޭގައި ރައީސް ސާލިހާއި، ރައީސް ޔާމީން ހިމެނިވަޑައިގަންނަވާނެ. އެހެންވީމަ މިދެބޭފުޅުންގެ މަޝްވަރާގެ މޭޒުދޮށަށް ވަޑައިގެން މިގައުމުގެ މިހާރު މިއޮތް އަނިޔާވެރި ވެރިކަމުން ރައްޔިތުން ސަލާމަތް ކުރުމަށްޓަކައި މަސައްކަތްތަކެއް ކުރަންޖެހޭ ކަމަށް އަޅުގަނޑަށް ގަބޫލުކުރެވެނީ އެނގޭތޯ.އެމްޑީޕީގެ ކުރީގެ ރައީސް ޑރ.އިބްރާހިމް ދީދީ
ޑރ.ޑީޑީ ވިދާޅުވީ ސިޔާސީ ވާދަވެރިކަން އެއްފަރާތް ކުރުމަށްފަހު، މިއަދު އޮޕަޒިޝަން ޕާޓީތަކުގެ ވެރިން ގައުމީ މަސްލަހަތު އިސްކުރަންޖެހޭ ކަމަށާއި، މިގައުމުގެ ރައްޔިތުންގެ ހިމާޔަތާއި ރައްކާތެރިކަން ކަށަވަރުކޮށް ގާނޫނު އަސާސީގެ ދިފާއުގައި މަސައްކަތް ކުރަން ޖެހޭ ކަމަށެވެ. އަދި ވިދާޅުވީ ހުރިހާ ރައްޔިތުން އެކައްޗެއްކިޔައި، އެއްކޮށް ނުކުންނަންޖެހޭ ކަމަށެވެ.
