ޕީއެސްޖީއާއެކު އަންގާރަ ދުވަހު ނޭމާ މެޑިކަލް ހަދަނީ!

ޕެރިސް ސެއިންޓް ޖާމަން (ޕީއެސްޖީ) އާއެކު އަންނަ އަންގާރަ ދުވަހު ބާސެލޯނާގެ ފޯވާޑް ނޭމާ މެޑިކަލް ހަދަން އުޅޭކަމަށް ރިޕޯޓްތައް ބުނެފި އެވެ.

ގަތަރުގެ ނޫހެއްކަމަށްވާ އަލް ވަތަން އިން ބުނީ އަންނަ އަންގާރަ ދުވަހު ޕީއެސްޖީއަށް ބަދަލުވާން ނޭމާ މެޑިކަލް ހަދާނެ ކަމަށާއި، އެނާ އެ ކްލަބަށް ބަދަލުވާނީ ވޯލްޑް ރެކޯޑް ފީއެއްގެ ދަށުން 222 މިލިއަން ޔޫރޯއަށް ކަމަށެވެ.

އެގޮތުން އެ ނޫހުން ބުނީ ސީޒަން ހުޅުވާ މެޗުގައި ޕީއެސްޖީ އަދި އަމިއެންސް އަންނަ ހޮނިހިރު ދުވަހު ބައްދަލުކުރާ މެޗުގެ ކުރިން ނޭމާ ޕީއެސްޖީއަށް ސޮއިކުރާނެ ކަމަށެވެ.

ރިޕޯޓްތައް ބުނާގޮތުން ނޭމާ ބޭނުންވަނީ ބާސާ ދޫކޮށްލުމަށް ފަހު ކުރިޔަށް އޮތް ސީޒަނަށް އެހެން ކްލަބަކަށް ބަދަލުވާށެވެ. އެގޮތުން ނޭމާ ހޯދުމަށް ޕެރިސް ސެއިންޓް ޖާމަން (ޕީއެސްޖީ) އިން 222 މިލިއަން ޔޫރޯ ހުށަހަޅާފައިވާ ކަމަށް ވެސް ރިޕޯޓްތައް އަންނަނީ ބުނަމުންނެވެ.

ބްރެޒިލްގައި ކާމިޔާބު ދުވަސްތަކެއް ހޭދަކުރުމަށް ފަހު ނޭމާ ބާސާ އަށް ބަދަލުވީ 2013 ވަނަ އަހަރެވެ. އެގޮތުން އޭނާ ވަނީ މިހާތަނަށް އެޓީމަށް ކުޅުނު 186 މެޗުގައި 105 ލަނޑު ކާމިޔާބުކޮށް އެޓީމާއެކު ސްޕެނިޝް ލީގު ދެފަހަރު، ކޮޕާ ޑެލްރޭ ދެފަހަރު، ސްޕެނިޝް ސުޕާކަޕް، ޔުއެފާ ޗެމްޕިއަންސް ލީގު އަދި ފީފާ ކްލަބް ވޯލްޑް ކަޕް ވެސް ކާމިޔާބުކޮށްފައެވެ.

ބްރެޒިލް ގައުމީ ޓީމާއެކު އޮލިމްޕިކްސް ރަން މެޑަލް މިދިޔަ އަހަރު ކާމިޔާބުކުރި ނޭމާ ވަނީ ގައުމީ ޓީމަށް ކުޅުނު 77 މެޗުގައި 52 ލަނޑު ކާމިޔާބުކޮށްފައެވެ. މީގެ އިތުރުން އޭނާ ވަނީ ފީފާ ކޮންފެޑެރޭޝަންސް ކަޕް 2013 ވަނަ އަހަރު އަދި ސައުތް އެމެރިކަން ޔޫތް ޗެމްޕިއަންޝިޕް 2011 ވަނަ އަހަރު ބްރެޒިލްއާއެކު ކާމިޔާބުކޮށްފައެވެ.