ބިލްބާއޯ އަތް ދަށުވެ ބާސެލޯނާ ކަޓައިފި

ސްޕެނިޝް ކަޕް (ކޮޕާ ޑެލް ރޭ)ގެ ކުއާޓާ ފައިނަލްގައި އެތުލެޓިކް ބިލްބާއޯގެ އަތް ދަށުވެ، ބާސެލޯނާ މުބާާރާތުން ކަޓައިފި އެވެ.

ކުއާޓާ ފައިނަލްގައި ބުދަ ދުވަހުގެ ރޭ ކުޅުނު މެޗުން ބާސެލޯނާ ބަލިވީ، 4-2 އިންނެވެ. މެޗު ފަށައިގެން ފުރަތަމަ މިނެޓުގައި ލަނޑު ޖަހައިގެން ލީޑު ނެގީ ވެސް ބިލްބާއޯ އެވެ. އެ ޓީމަށް ލީޑު ނަގައިދިނީ ގޯކާ ގުރުޒެޓާ އެވެ. ނަމަވެސް، ފުރަތަމަ ހާފު ނިމުމުގެ ކުރިން ބާސެލޯނާ އިން ވަނީ އެއްވަރުކޮށް، ލީޑު ވެސް ނަގައިފަ އެވެ. މެޗުގެ 26 ވަނަ މިނެޓުގައި ބާސެލޯނާ އަށް ނަތީޖާ ހަމަހަމަކޮށްދިނީ ޕޮލެންޑުގެ ފޯވާޑް ރޮބާޓް ލެވަންޑޯސްކީ އެވެ. އޭގެ ފަހުން 32 ވަނަ މިނެޓުގައި އެ ޓީމަށް ލީޑު ނަގައިދިނީ ލަމިން ޔަމާލް އެވެ. އޭނާ ލަނޑު ޖަހަން ފުރުސަތު ތަނަވަސްކޮށްދިނީ ޖޫލްސް ކޫންޑޭ އެވެ.

ދެ ވަނަ ހާފު ފަށައިގެން ހަތަރު ވަނަ މިނެޓުގައި ބިލްބާއޯ އިން ނަތީޖާ ހަމަހަމަކުރި އެވެ. އެ ލަނޑު ޖެހީ އޮއިހާން ސަންކޭޓް އެވެ. އޭނާ ލަނޑު ޖަހަން ފުރުސަތު ތަނަވަަސްކޮށްދިނީ ނިކޯ ވިލިއަމްސް އެވެ. މެޗުގެ ފުރިހަމަ ވަގުތު ހަމަވީ ދެ ޓީމު 2-2 އިން އެއްވަރުވެގެންނެވެ. ނަތީޖާ ނެރުމަށް ކުޅުނު ދެ ހާފުގައި އިތުރު ދެ ލަނޑު ޖަހައިގެން، ބިލްބާއޯ ވަނީ ބާސެލޯނާ ކަޓުވާލައިފަ އެވެ. އެ ދެ ލަނޑު ޖެހީ ނިކޯ ވިލިއަމްސް އަދި އިނާކީ ވިލިއަމްސް އެވެ.

މުބާރާތުން ބާސެލޯނާ ކެޓިއިރު، މި ސީޒަންގައި އެ ޓީމުގެ ނަތީޖާތައް ދަށްވެ، ކޯޗު ޒަވީ ހެނާންޑޭޒް އަށް ދަނީ ޕްރެޝަރު ބޮޑުވަމުންނެވެ.