ޔުވެންޓަސް އަށް ކުޅެމުން އަންނަ އިޓަލީގެ ފޯވާޑް މޮއިސް ކީން، ސްޕެއިންގެ އެތުލެޓިކޯ މެޑްރިޑަށް ބަދަލުވާން ނިންމައިފި އެވެ.
އުމުރުން 23 އަހަރުގެ ޒުވާން ކުޅުންތެރިޔާ އެތުލެޓިކޯ އަށް ބަދަލުވާނީ ލޯނު އެއްބަސްވުމެއްގެ ދަށުންނެވެ. ބައިނަލްއަޤުވާމީ މީޑިއާތަކުގައި ބުނެފައިވާ ގޮތުން މޮއިސް ހޯދުމަށް އެތުލެޓިކޯ އިން، ޔުވެންޓަސް އަށް ދައްކާނީ ފަސް ލައްކާ ޔޫރޯ އެވެ. އަދި އޭނާގެ މުސާރަ އެއްކޮށް ކަވަރުކުރާނީ ވެސް އެތުލެޓިކޯ އިން ކަމަށް ވަނީ ބުނެފަ އެވެ. އެހެންކަމުން، ކުރިއަށް އޮތް ދުވަސްތަކުގެ ތެރޭގައި ކީން އެތުލެޓިކޯ އަށް ސޮއިކުރުމުގެ މަރުހަލާ ކުރިއަށް ދާނެ ކަމަށް ވެސް ވަނީ ބުނެފަ އެވެ. އަދި މިހާރު އެތުލެޓިކޯ އިން މަޑު ކުރަމުން ދަނީ ޔުވެންޓަސްގެ އެންމެ ފަހުގެ ފެހި ސިގުނަލަށް ކަމަށް ބުނެފައިވެ އެވެ.
މޮއިސް ކީން އޭނާގެ ސީނިއާ ކެރިއަރު ފެށީ ވެސް ޔުވެންޓަސް އިންނެވެ. އޭގެ ފަހުން ދެ ވަނަ ފަހަރަށް ޔުވެންޓަސް އަށް ބަދަލުވީ ވެސް ބަދަލުވީ ލޯނު އެއްބަސްވުމެއްގެ ދަށުންނެވެ. ލޯނު އެއްބަސްވުމެއްގެ ދަށުން ޔުވެންޓަސްގައި އެއް ސީޒަން ކުޅުމަށްފަހު، މިދިޔަ އަހަރު އޭނާ ވަނީ އެ ކުލަބާއެކު ދާއިމީ އެއްބަސްވުމެއްގައި ސޮއިކޮށްފަ އެވެ. ދެ އަހަރު ދުވަހަށް އެކުލަވާލި އެއްބަސްވުމުގެ މުއްދަތު ހަމަވާނީ އަންނަ އަހަރުގެ ޖޫން މަހުގެ ނިޔަލަށެވެ. އޭގެ ފަހުން ވެސް އެއްބަަސްވުމުގެ މުއްދަތު އައުކުރުމުގެ ފުރުސަތު އޮންނާނެ އެވެ.
މޮއިސް ކީން ވަނީ ދެ ވަނަ ފަހަރަށް ޔުވެންޓަސް އަށް ބަދަލުވެ އެ ޓީމަށް 93 މެޗު ކުޅެދީ 14 ލަނޑު ޖަހައިފަ އެވެ. މިހާރު ކުރިއަށްދާ ސީޒަނުގައި އޭނާ ވަނީ 11 މެޗު ކުޅެފަ އެވެ. އެންމެ ފުރަތަމަ ޔުވެންޓަސް އިން ސީނިއާ ކެރިއަރު ފެށުމަށް ފަހު އޭނާ ވަނީ އެ ކުލަބާއެކު ކާމިޔާބީތަކެއް ވެސް ހޯދައިފަ އެވެ. އެގޮތުން އިޓާލިއަން ލީގު ދެ ފަހަރު ކާމިޔާބު ކުރުމުގެ އިތުރުން، އިޓާލިއަން ކަޕް އަދި އިޓާލިއަން ސުޕަ ކަޕް ވަނީ ކާމިޔާބުކޮށްފަ އެވެ.
