މަޖިލިސް މެންބަރެއްގެ ގޮތުގައި ހުރެ ޕާޓީ ބަދަލުކުރާ މެންބަރުންގެ ގޮނޑި ގެއްލޭނެފަދަ ގާނޫނެއް ނުވަތަ އެންޓި-ޑިފެކްޝަން ގާނޫނެއް ވުޖޫދު ކުރުމަށް، މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)އާއި ޑިމޮކްރެޓްސް ގުޅިގެން މަސައްކަތް ފަށައިފިއެވެ.

ކުރީގެ ރައީސް އަބްދުﷲ ޔާމީންގެ ވެރިކަމުގައި ވެސް މީގެ ގާނޫނެއް އެކުލަވާލައި އަމަލުކުރި ނަމަވެސް ފަހުން އުވާލި އެންޓި ޑިފެކްޝަން ގާނޫނަކީ، މައިގަނޑު ގޮތެއްގައި ރައްޔިތުންގެ މަޖިލީހުގެ މެންބަރުންނަށް ޚާއްސަކޮށް އެކުލަވާލާ ބިލެކެވެ.

އެގޮތުން އެމްޑީޕީއާއި ޑިމޮކްރެޓްސްއިން ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި މި ބިލާ ގުޅޭގޮތުން ޑިމޮކްރެޓްސްގެ ޕީޖީ ލީޑަރު އަދި ހެންވޭރު ހުޅަނގު ދާއިރާގެ މެންބަރު އަލީ އާޒިމް ވިދާޅުވީ، އެންޓި ޑިފެކްޝަން ގާނޫނެއް އެކުލަވާލުމުގެ މަސައްކަތް މިހާރު އެ ދެ ޕާޓީ އެކުވެގެން ފަށާފައިވާ ކަމަށާއި، އެ ބިލު ޑްރާފްޓް ކުރުމުގެ މަޝްވަރާ މިހާރު ކުރިއަށްދާކަމަށެވެ.

އެންޓި ޑިފެކްޝަން ގާނޫނަކީ އެ ގާނޫނުގެ ދަށުން މަޖިލީހަށް އިންތިޚާބުވި ޕާޓީން މެންބަރަކު ވަކިވެއްޖެނަމަ ނުވަތަ ވަކިކޮށްފިނަމަ ނުވަތަ އެހެން ޕާޓީއަކަށް ބަދަލުވެއްޖެ ނަމަ މަޖިލީހުން ވަކިވާނެކަމަށް ކަނޑައެޅޭ ގާނޫނެކެވެ.

އެކަމަށް އިޝާރަތް ކުރައްވަމުން، ރައްޔިތުންގެ މަޖިލީހުގެ ނައިބު ރައީސް އަދި ހޯރަފުށީ ދާއިރާގެ މެންބަރު އަހުމަދު ސަލީމް ވިދާޅުވީ، އެންޓި ޑިފެކްޝަން ގާނޫނެއް ނެތުމުގެ ސަބަބުން ޕާޓީއަށް ވާ ގެއްލުމަށްވުރެ ގައުމަށްވާ ގެއްލުން ބޮޑުކަމަށެވެ.

އޭގެ ސަބަބުތަކެއް ކަމުގައި ސަލީމް ވިދާޅުވީ، ރައްޔިތުން އެ މެންބަރަކު ގޮނޑިއަށް އިންތިޚާބުކުރަނީ ވަރަށް ބޮޑު އިތުބާރަކާއެކު ކަމަށާއި، އެހެން ނަމަވެސް މެންބަރުން ގޮނޑި ބަދަލުކުރުމަކީ އެ އިތުބާރު ގެއްލޭނެ ކަމެއް ކަމަށެވެ. އަދި އޭގެ ސަބަބުން ރައްޔިތުން ޑިމޮކްރެސީއާމެދު އޮންނަ އިތުބާރު ގެއްލި ވޯޓުލާން ނުކުންނަ ނިސްބަތް މަދުވާކަން ސަލީމް ފާހަގަ ކުރެއްވިއެވެ. އަދި އެކަމަކީ ޑިމޮކްރެސީ ބަލިކަށިވުމުގެ ނުރައްކަލެއްގެ ގޮތުގައި ވެސް ސަލީމް ފާހަގަކުރެއްވިއެވެ.

ސަލީމް އިތުރަށް ވިދާޅުވީ ދެ ޕާޓީ ގުޅިގެން އެންޓި-ޑިފެކްޝަން ބިލަކަށް މަސައްކަތްކުރަނީ އެ ނުރައްކާ ވަރަށް ބޮޑަށް އިހުސާސްވާތީ ކަމަށެވެ.

ސަލީމްގެ އިތުރުން އެންޓި-ޑިފެކްޝަން ގާނޫނާ ގުޅޭގޮތުން އެމްޑީޕީގެ ޗެއަރޕަރސަން އަދި ކުރީގެ އިކޮނޮމިކް މިނިސްޓަރު ފައްޔާޒު އިސްމާއީލް ވިދާޅުވީ، ރައީސް ޔާމީންގެ ސަރުކާރުގައި ފާސްކުރި އެންޓި-ޑިފެކްޝަން ގާނޫނަކީ ސިޔާސީގޮތުން ފާސްކުރި ގާނޫނެއް ކަމަށާއި، އެ ގާނޫނު އުވާލަން ޖެހުނީ ވެސް އެފަދަ ސަބަބުތަކެއްގެ ސަބަބުން ކަމަށެވެ.

ފައްޔާޒް އިތުރަށް ވިދާޅުވީ، އެންޓި-ޑިފެކްޝަން ގާނޫނެއް ވުޖޫދުކުރުމަށް ނިންމާނަމަ، ރާއްޖޭގައި ކުރިން ހިނގާފަހުރި ބައެއް ކަންކަމަށް ވެސް ވިސްނަންޖެހޭނެ ކަމަށެވެ.

އޭގެ މިސާލުތައް ފާހަގަކުރައްވަމުން ފައްޔާޒް ވިދާޅުވީ، ސަރުކާރުގެ ބާރުވެރިކަމާއެކު އަނިޔާވެރިވާ ހާލަތްތަކުގައި މެންބަރުންނަށް ޕާޓީ ބަދަލުކުރެވޭނެ ގޮތް ހެދުމާއި، ގަވާއިދާ ޚިލާފަށް ޕާޓީން މެންބަރަކު ވަކިކުރުމުން އެ މެންބަރެއްގެ ގޮނޑި ނުގެއްލޭނެ ފަދަ ހާލަތެއް އެ ގާނޫނުން ދޭންޖެހޭނެ ކަމަށެވެ.

އެމްޑީޕީ އަދި ޑިމޮކްރެޓްސް ގުޅިގެން އެންޓި-ޑިފެކްޝަން ގާނޫނެއް ވުޖޫދުކުރުމުގެ މަސައްކަތް މި ފެށީ، 2019 ވަނަ އަހަރު ފެށުނު 19 ވަނަ ރައްޔިތުންގެ މަޖިލީހުގެ ސުޕަރ މެޖޯރިޓީގެ ގޮތުގައި އޮތް އެމްޑީޕީން ގިނަ މެންބަރުންތަކެއް ދާދި ފަހުން ވެސް ވަކިވެވަޑައިގެން ސަރުކާރު ޕީޕީއެމް-ޕީއެންސީއާ ގުޅިވަޑައިގަތުމާއެކުއެވެ.

އެގޮތުން އެންމެ ފުރަތަމަ އެމްޑީޕީގެ ތެރެއިން މެންބަރުންތަކެއް ޑިމޮކްރެޓްސްއާ ގުޅިވަޑައިގެން އެ ޕާޓީ ވުޖޫދުކުރެއްވިއިރު، ރައީސް މުއިއްޒުގެ ސަރުކާރުގައި އިތުރު މެންބަރުންތަކެއް ވެރިކަން ކުރާ ޕީއެންސީ އަދި ޕީޕީއެމްއާ ވެސް ވަނީ ގުޅިވަޑައިގެންފައެވެ.

އެއާއެކު، ރާއްޖޭގައި އެންޓި-ޑިފެކްޝަން ގާނޫނެއް އޮތުން މުހިންމުކަމަށް އާންމުން ދިޔައީ ބުނަމުންނެވެ.