ގާނާގެ ކޯޗުކަމުން ހޫޓޮން ވަކިކޮށްފި

ގާނާ ޤައުމީ ފުޓުބޯޅަ ޓީމުގެ ކޯޗުކަމުން އިންގްލެންޑުގެ ކްރިސް ހޫޓޮން ވަކިކޮށްފި އެވެ.

ގާނާގެ ކޯޗުކަމަށް އުމުރުން 65 އަހަރުގެ ހޫޓޮން ހަމަޖެއްސީ މިދިޔަ އަހަރުގެ ފެބްރުވަރީ މަހުގެ ތެރޭގަ އެވެ. އެއީ އޭނާގެ ކުރިން އެ މަގާމުގައި ހުރި އޮޓޯ އައްޑޯ އިސްތިއުފާ ދިނުމުންނެވެ. އެ މަގާމުން އޭނާ އިސްތިއުފާ ދިނީ 2022 ވަނަ އަހަރު ޤަތަރުގައި ކުރިއަށް ދިޔަ ފީފާ ވޯލްޑް ކަޕް ފުޓުބޯޅަ މުބާރާތުން ގާނާ ކެޓުމުންނެވެ.

އޭގެ ފަހުން ގާނާގެ ކޯޗުކަމަށް ހޫޓޮން ހަމަޖެއްސިއިރު، އޭގެ ކުރިން އޭނާ ހުރީ ގާނާ ޤައުމީ ޓީމުގެ ކޯޗިން އޮފިޝަލުން އެޑްވައިޒަރުގެ މަގާމުގަ އެވެ. ގާނާގެ ކޯޗުކަމަށް ހޫޓޮން ހަމަޖެއްސުމަށްފަހު، އޭނާ އަށް ހަވާލުކުރި އެންމެ ބޮޑު އެއް މަސައްކަތަކީ މިހާރު ކުރިއަށްދާ އެފްރިކަން ކަޕްގައި ރަނގަޅު ނަތީޖާއެއް ނެރުމެވެ. ނަމަވެސް މުބާރާތުގެ ގުރޫޕް ސްޓޭޖުން ގާނާ ވަނީ ކަޓައިފަ އެވެ. ގުރޫޕް ސްޓޭޖުގައި ކުޅުނު ފުރަތަމަ މެޗުން ގާނާ ބަލިވީއިރު، ފަހު ދެ މެޗު ވަނީ އެއްވަރުވެފަ އެވެ. ތިން މެޗުން ދެ ޕޮއިންޓާއެކު ގާނާ ދިޔައީ ގުރޫޕް ބީގެ ތިން ވަނަ އަށެވެ.

މުބާރާތުން ކެޓުމާއެކު، ގާނާ އިން ވަނީ ކޯޗުކަމުން ހޫޓޮން ވަކިކޮށްފަ އެވެ. އެކަން އެ ޤައުމުގެ ފުޓުބޯޅަ ފެޑެރޭޝަނުން ވަނީ އިއުލާން ވެސް ކޮށްފަ އެވެ. ހޫޓޮންގެ އިރުޝާދުގެ ދަށުން ގާނާ ކުޅުނީ 13 މެޗެވެ. އޭގެ ތެރެއިން އެ ޓީމު މޮޅުވެފައި ވަނީ އެންމެ ހަތަރު މެޗުންނެވެ. ހަތަރު މެޗުން ބަލިވެފައިވާއިރު، ފަސް މެޗު ވަނީ އެއްވަރުވެފަ އެވެ.

ހޫޓޮން ވަނީ މީގެ ކުރިން ޓޮޓެންހަމް، ނިއުކާސަލް ޔުނައިޓެޑު، ބާމިންހަމް ސިޓީ، ނޯވިޗް ސިޓީ، ބްރައިޓަން އަދި ނޮޓިންހަމް ފޮރެސްޓުގައި ވެސް މަސައްކަތްކޮށްފަ އެވެ. މީގެ އިތުރުން އަޔަލެންޑުގެ ޤައުމީ ފުޓުބޯޅަ ޓީމުގައި ވެސް އޭނާ ވަނީ މަސައްކަތްކޮށްފަ އެވެ.