އެމްޑީޕީން މާލެ ސަރަހައްދުގައި ބޯހިޔާވަހިކަމުގެ މަޝްރޫޢު ކުރިޔަށްގެންދިޔައީ ޕްލޭނަކާއެކު: އަކްރަމް

އެމްޑީޕީ ސަރުކާރުގައި މާލެ ސަރަހައްދުގައި ކުރިޔަށްގެންދިޔަ ބޯހިޔާވަހިކަމުގެ މަޝްރޫޢު ކުރިޔަށްގެންގޮސްފައިވަނީ ޕްލޭނެއް ނެތްކަމަށް ދޭހަވާ މޭރުމުން ރައީސުލްޖުމްހޫރިއްޔާ ޑރ މުހައްމަދު މުއިއްޒު ދެއްކެވި ވާހަކަފުޅަށް އެމްޑީޕީ ސަރުކާރުގައި ހައުސިންގ މިނިސްޓްރީގެ ސްޓޭޓް މިނިސްޓަރ އަކްރަމް ކަމާލުއްދީން ރައްދުދެއްވައިފިއެވެ.

ރާއްޖެޓީވީގެ "ފަލަސުރުޚީ" ޕްރޮގްރާމްގައި މިކަންކަމާއި ގުޅޭގޮތުން ވާހަކަދައްކަވަމުން އަކްރަމް ވިދާޅުވީ ރައީސް މުއިއްޒުގެ ވާހަކަފުޅު ބައްޓަންކުރައްވާފައިވަނީ ދިމާކުރާ ގޮތަށްކަމަށެވެ. ކޮންމެ ރައީސަކުވެސް ވެރިކަމަށް ވަޑައިގެން ކުރީ ސަރުކާރުން ކޮށްފައި ހުންނަ ކަންކަމަށް ފާޑުވިދާޅުވާކަމަށާއި ނަމަވެސް ރައީސް މުއިއްޒުގެ ވާހަކަ ކުރިޔަށްގެންދެވީ އެހެން ރާގަކަށްކަމަށެވެ.

އަކްރަމް ވިދާޅުވީ އެމްޑީޕީ ސަރުކާރުން ބޯހިޔާވަހިކަމުގެ މަޝްރޫޢު ކުރިޔަށްގެންދިޔައީ ވީހާވެސް ގިނަ ބަޔަކަށް ބޯހިޔާވަހިކަން ހޯދައިދެވޭނެ ގޮތަށްކަމަށެވެ. އެގޮތުގެ މަތިން ގޯތި ދޫކުރިއިރު ފްލެޓްތައްވެސް ދޫކޮށްފައިވާނީ އެވިސްނުމުގައިކަމަށް އަކްރަމް ވިދާޅުވިއެވެ.

ރައީސްގެ ވާހަކަފުޅުގައި ގުޅީފަޅާއި، ގިރާވަރުފަޅުގެ ލޭންޑް ޔޫސް ޕްލޭނެއް އެމްޑީޕީ ސަރުކާރުން ނުހަދާ އޮތްކަމަށް ވިދާޅުވި ވާހަކަފުޅަށް ރައްދުދެއްވަމުން އަކްރަމް ވިދާޅުވީ އެތަންތަނުގެ ލޭންޑް ޔޫސް ޕްލޭން ގެޒެޓްކޮށްފައިވާނެކަމަށެވެ. އެއްބަޔަކު ހަދާފައި އޮތް ލޭންޑްޔޫސް ޕްލޭނެއް އަނެއް ބަޔަކަށް ގޯސްވެދާނެކަމަށާއި ނަމަވެސް އެއީ އެކަން ނުކޮށް އޮތް ކަމަށް ބުނެވޭނެ ސަބަބެއް ނޫންކަމަށް އަކްރަމް ވިދާޅުވިއެވެ.

އަކްރަމް ވިދާޅުވީ މުއިއްޒު ގެންގުޅުއްވާ ބޯހިޔާވަހިކަމުގެ ސިޔާސަތަކީ މާލެ ރައްޔިތުންނަށް ބޯހިޔާވަހިކަން ހޯދައިދިނުމަށް ގެންގުޅުއްވާ ސިޔާސަތެއް ނޫންކަމަށެވެ.

އަކްރަމް ވިދާޅުވީ މުއިއްޒު ދައްކަވާ ގިނަ ވާހަކަފުޅުތަކަކީ އަމަލީ ގޮތުން ކުރެވޭނެ ކަންކަން ނޫންކަމަށެވެ. އެއީ ހަމައެކަނި ކަމެއްކުރާކަން ރައްޔިތުންނަށް ދެއްކުމަށް ދައްކަވާ ވާހަކަތަކެއްކަމަށް އަކްރަމް ވިދާޅުވިއެވެ.