ސޯޝަލް މީޑިއާގައި އެކިއެކި ވާހަކަ ދައްކައިގެން ފާޑުފާޑު ބަޔާންތައް ނެރުނަސް ލާމަރުކަޒީ ގާނޫނަށް ގެނައުމަށް ނިންމާފައިވާ އިސްލާހު ނުހުއްޓާނަން ކަމަށް ވިދާޅުވެ އިނގުރައިދޫ ދާއިރާގެ މެމްބަރު އަދި ޕީއެންސީގެ ޕީޖީ ލީޑަރު އިބްރާހިމް ފަލާހް ހަރުކަށި އިންޒާރެއް ދެއްވައިފިއެވެ.

ފަލާހް އެހެން ވިދާޅުވި އިރު، ލާމަރުކަޒީ ގާނޫނަށް ގެނައުމަށް ނިންމާފައިވާ އިސްލާހާ ދެކޮޅަށް ބުދަ ދުވަހުގެ މެންދުރާ ހަމަ އަށް 40 ށް ވުރެ ގިނަ ކައުންސިލުން ވަނީ ބަޔާން ނެރެފަ އެވެ. ޖުމްލަގޮތެއްގައި އެ ކައުންސިލްތަކުން ބުނެފައިވަނީ އެ އިސްލާހުތަކަށް އަމަލުކޮށްފި ނަމަ، ކައުންސިލްތަކަށް ލިބިދީފައިވާ މިނިވަންކަން ގެއްލޭނެ ކަމަށެވެ. އަދި ކައުންސިލްތައް އޭގެ އެންމެ ފުރިހަމަ ގޮތުގައި ހިންގުމަށް ދަތިވާނެ ކަމަށާއި ރަށުގެ ތަރައްގީއަށް ހިންގަން ހުރި ގިނަ މަޝްރޫއުތަކަށް ހުރަސް އެޅޭނެ ކަމަށް އެ ކައުންސިލް ތަކުން ގަބޫލުކުރެ އެވެ.

މީގެ އިތުރުން، ކައުންސިލްތަކުގެ ވައުދުތައް ނުފުއްދި އެތަންތަނާ މެދު ރައްޔިތުންގެ އިތުބާރު ގެއްލޭނެ ކަމަށާއި ރަށްވެހި ހިދުމަތްތަކާއި އުމްރާނީ ތަރައްގީއަށް ފަހިވެފައިވާ ގިނަ ފުރުސަތުތަކެއް ބަންދުވާނެ ކަމަށްވެސް އެ ކައުންސިލްތަކުން ނެރެފައިވާ ބަޔާންތަކުގައި ބުނެފައިވެ އެވެ.

ކުރިއަށް އޮތް އިންތިހާބު ކާމިޔާބު ކުރމުގެ ނިޔަތުގައި ކައުންސިލްތަކުން ފަހު އަހަރު، ރަށްރަށުގައި ހުންނަ މުހިންމު ބިންތައް ކުއްޔަށް ދިނުމާއި މުވައްޒަފުން ނެގުމާއި ކައުންސިލުގެ އިހްތިޔާރުގައި ހުންނަ ކަންކަމުގެ ތެރެއިން ކައުންސިލްތަކުން ނާޖާއިޒު ފައިދާ ނަގާކަމަށް ފަލާހު ވަނީ ތުހުމަތު ކުރައްވާފަ އެވެ.

ގިނަ ކައުންސިލު ތަކުންނާއި އިދިކޮޅު މައި ސިޔާސީ ޕާޓީ އެމްޑީޕީ އިން އިދިކޮޅު ހަދަމުން ދަނިކޮށް، ކަންބޮޑުވުންތަކަށް އެއްވެސް ވަރަކަށް ބެލުމެއް ނެތި، ލާމަރުކަޒީ ކޮމިޓީން ވަނީ ސަރުކާރުން ހުށަހެޅި ގޮތައް އާދައިގެ ކުދި ކުދި ބަދަލުތަކަކާ އެކު ބިލު ފާސް ކޮށްފައެވެ.