ރާއްޖޭގައި އެމްޑީޕީއަށްވުރެ ހަރުދަނާ މުއައްސަސާއެއް ނެތް، މަޖިލީހުގެ މެޖޯރިޓީ ހޯދަންޖެހޭ: މެންބަރު ހަލީމް
22 ޖެނުއަރީ 2024 | ހޯމަ 09:07މި ރާއްޖޭއަށް މިގެނެވުނު ހުރިހާ ރަނގަޅު ބަދަލެއްގެ އާރުކާޓީއަކީ އެމްޑީޕީ
ބިލެތްދޫ ދާއިރާގެ މެންބަރު އަހުމަދު ހަލީމް (ދޮންބިލެއް)
ދިވެހިރާއްޖޭގައި ދިވެހިރައްޔިތުންގެ ޑިމޮކްރެޓިކް ޕާޓީ (އެމްޑީޕީ)އަށްވުރެ ހަރުދަނާ މުއައްސަސާއެއް ނެތް ކަމަށާއި، ކުރިއަށް ރައްޔިތުން މަޖިލީހުގެ އިންތިޚާބުގެ މެޖޯރިޓީ ހޯދަންޖެހޭ ކަމަށް ބިލެތްދޫ ދާއިރާގެ މެންބަރު އަހުމަދު ޙަލީމް ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި މެންބަރު ވިދާޅުވީ އެމްޑީޕީއަކީ މިރާއްޖޭގައި އޮތް އެންމެ ބޮޑު ފެން ހިފޭ މުއައްސަސާ ކަމަށާއި، އެމްޑީޕީއަށްވުރެ ހަރުދަނާ މުއައްސަސާއެއް މިރާއްޖޭގައި ނެތް ކަމަށެވެ. މިރާއްޖޭއަށް މިގެނެވުނު ހުރިހާ ރަނގަޅު ބަދަލެއްގެ އާރުކާޓީއަކީ އެމްޑީޕީކަން މެންބަރު ފާހަގަކުރެއްވިއެވެ.
މެންބަރު ވިދާޅުވީ ރާއްޖޭގެ ރައްޔިތުންނަށް ކަންކަން ރަނގަޅަށް ކޮށްދިނުމަށް ދެ ޕާޓީއެއް އަބަދުވެސް އިސްކޮށް ހަރަކާތްތެރިވާ ކަމަށެވެ. އެގޮތުން އެމްޑީޕީ އަދި ޕީޕީއެމް ނިކަމަތިވި ނަމަވެސް އެކަމުގެ ގެއްލުން ރައްޔިތުންނަށް ކުރާނެ ކަމަށް މެންބަރު ވިދާޅުވިއެވެ. އަދި ވިދާޅުވީ ޕާޓީގެ ނަންތައް ބަދަލުވެ، އައު ޕާޓީތައް އުފަންވި ނަމަވެސް ޒަމާނުއްސުރެ ރާއްޖޭގައި އޮތީ ސިޔާސީ ގޮތުން ދެ ފިކުރެއް ކަމަށެވެ.
ކުރިއަށް އޮތް ރައްޔިތުން މަޖިލީހުގެ އިންތިޚާބަށް އިޝާރާތް ކުރައްވައި މެންބަރު ވިދާޅުވީ ސަރުކާރު ޖަވާބުދާރީކުރުވުމަށް އެމްޑީޕީއަށް މަޖިލީހުގެ މެޖޯރިޓީ ލިބުމަކީ ވަރަށް މުހިންމު ކަމެއް ކަމަށެވެ. އެމްޑީޕީއަށް މެޖޯރިޓީ ނުލިބި ސަރުކާރުން މަޖިލީހުގެ މެޖޯރިޓީ ނަގައިފިނަމަ ސަރުކާރު ޒިންމާދާރުކުރުވުމުގެ މަސައްކަތް އެކަށީގެންވާ ގޮތުގައި ނުކުރެވޭނެ ކަމަށާއި، ސަރުކާރު ނުބައި މަގަކުން ހިނގާނެ ކަމަށެވެ.
އެހެންކަމުން މަޖިލީހުގެ މެޖޯރިޓީ އެމްޑީޕީން ނަގަންޖެހޭ ކަމަށާއި، މިސަރުކާރުގެ ވައުދުތަކާއެކު، ކުރީ ސަރުކާރުގެ ވައުދުތައް ރައްޔިތުންނަށް ފުއްދައި ދިނުމަށްޓަކައި ކަމަށް މެންބަރު ވިދާޅުވިއެވެ.
