އިންޑިޔާ ސިފައިން ބޭލުން: ދެގައުމުގެ ބަޔާން ތަފާތުވި މައްސަލާގައި ސަރުކާރުން ދޭނެ ޖަވާބެއް ނެތް
އިތުރު މައުލޫމާތެއް ހިއްސާކުރެވޭކަށް ނެތް
އިންޑިޔާ ސަރުކާރުން ހަދިޔާކުރި ހެލިކޮޕްޓަރު
ރާއްޖޭގައި ތިބި އިންޑިޔާ ސިފައިން ބޭލުމާ ގުޅޭގޮތުން ކުރިއަށް ގެންދިޔަ ބައްދަލުވުމަށްފަހު ދެގައުމުގެ ފޮރިން މިނިސްޓްރީން ނެރުނު ނޫސްބަޔާން ތަފާތުވި މައްސަލާގައި، ނޫސްވެރިންގެ ސުވާލުތަކަށް ރައީސް އޮފީހުން ސީދާ ޖަވާބެއް ނުދީ ނޫސްވެރިންގެ ބައްދަލުވުން ނިންމާލައިފިއެވެ.
އާދިއްތަ ދުވަހު ކެބިނެޓުން ނިންމެވި ކަންކަމުގެ މައުލޫމާތު ހިއްސާކުރުމަށް ރައީސް އޮފީހުން ވަނީ ނޫސްވެރިންގެ ބައްދަލުވުމެއް ބާއްވަވާފައެވެ. މި ނޫސްވެރިންގެ ބައްދަލުވުމުގައި، ޕްރިންސިޕަލް ސެކްރެޓަރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ އަބްދުﷲ ނާޒިމް އިބްރާހީމް މައުލޫމާތު ހިއްސާކުރެއްވީ ކެބިނެޓުގެ ނިންމެވުންތަކާ ގުޅޭގޮތުންނެވެ. ގައުމާއި ރައްޔިތުންނާ ގުޅުންހުރި މުހިންމު ކަންކަމާ ގުޅޭގޮތުން ތަކުރާރުކޮށް ނޫސްވެރިން ސުވާލު ދެންނެވި ނަމަވެސް، ނާޒިމް ސީދާ ޖަވާބެއް ދެއްވާފައެއް ނުވެއެވެ. އެކަމާ ގުޅިގެން ނޫސްވެރިން ކަންބޮޑުވުން ފާޅުކޮށް، ނޫސްވެރިންގެ ސުވާލުތަކަށް ޖަވާބުދިނުމަށް ވެސް އެދިފައިވެއެވެ.
އިންޑިޔާގެ ސިފައިންނާ ގުޅޭގޮތުން ގިނަ ނޫސްވެރިން ސުވާލު ދެންނެވި ނަމަވެސް ނާޒިމް ވިދާޅުވީ، އިންޑިޔާ ސިފައިން ބޭލުމާ ގުޅޭގޮތުން މަޝްވަރާތައް ކުރިއަށްދާކަމަށާއި، އިތުރު މައުލޫމާތެއް ހިއްސާކުރެވެން ނެތްކަމަށެވެ. އަދި އެ މައްސަލާގެ އިތުރު އަޕްޑޭޓެއް ވެސް ދެވެން ނެތްކަމަށް ނާޒިމް ވިދާޅުވިއެވެ. އިންޑިޔާ ސިފައިން ބޭލުމާގުޅޭ މަޝްވަރާތައް ފަށާފައިވާއިރު، ދެގައުމުގެ ފޮރިން މިނިސްޓްރީން ނެރުނު ނޫސްބަޔާން ތަފާތުވެފައިވާތީ، އެކަމާ ގުޅޭގޮތުން ދެންނެވުމުން ވެސް ނާޒިމް ސުވާލަށް ޖަވާބު ނުދެއްވައި ވިދާޅުވީ، އިންޑިޔާ ސިފައިން ބާލަދިނުމަށް ސަރުކާރުން އެދިފައިވާކަމަށާއި، ޑިޕްލޮމެޓިކް އުސޫލުން އެކަން ކުރިއަށްދާ ކަމަށެވެ.
އިންޑިޔާގެ ސިފައިން ރާއްޖެއިން ބޭލުމާ ގުޅޭގޮތުން 14 ޖެނުއަރީ 2024ގައި ކުރެވުނު މަޝްވަރާތަކަށްފަހު އިންޑިއާގެ އެކްސްޓަރނަލް އެފެއަރޒް މިނިސްޓްރީން ނެރުނު ބަޔާނުގައި ބުނެފައިވަނީ، ދެ ގައުމަށްވެސް ފައިދާ ވާނެހެން، ރާއްޖޭގައި އިންޑިއާގެ އޭވިއޭޝަން ޕްލެޓްފޯމުން ރާއްޖޭގައި ފޯރުކޮށްދެމުންދާ އިންސާނީ އެހީއާއި މެޑިކަލް އިވެކުއޭޝަންގެ މަސައްކަތްތައް ކުރިއަށް ގެންދަން މަޝްވަރާ ކުރެވުނުކަމަށެވެ. އެބަޔާނުގައި، ރާއްޖޭގައި ހަރަކާތްތެރިވާ އިންޑިއާ އަސްކަރިއްޔާގެ ސިފައިން އަވަހަށް ފޭބުމާގުޅޭ ވާހަކަތަކެއް ނެތެވެ.
ނަމަވެސް ރާއްޖޭގެ ފޮރިން މިނިސްޓްރީން ނެރުނު ބަޔާނުގައި، ބައްދަލުވުމުގެ ތެރޭގައި ރާއްޖޭގައި ތިބި އިންޑިއާ އަސްކަރިއްޔާގެ ސިފައިން ވީހާވެސް އަވަހަށް ބޭލުމާ ގުޅޭގޮތުން މަޝްވަރާތައް ކުރެވުނުކަމަށް ވަނީ ބުނެފައެވެ.
