ޝަރުތުހަމަވާނަމަ ނުކުޅެދުންތެރިކަން ހުންނަ މީހުންނަށް ވެސް އިންޓަރންޝިޕްގެ ފުރުސަތު ފަހިކޮށްދޭންޖެހޭ: ގަވާއިދު
އިންޓަރންޝިޕް ފުރުސަތު ދެވޭނީ ކޮމްޕިޓެންސީ ޕްރޮފައިލް ހަދައިފައިވާ ފަރާތްތަކަށް
ނުކުޅެދުންތެރިކަން ހުންނަ ކުދިންތަކެއް
ނުކުޅެދުންތެރިކަން ހުންނަ މީހުންގެ ތެރެއިން އަމަލީ ތަޖުރިބާ ބޭނުންވާ ފަރާތްތަކަށް ވަޒީފާދޭ އިދާރާތަކުގެ ތެރެއިން ވަޒީފާ ހަމަޖެއްސުމަށް ތައްޔާރުވެފައިވާ ތަންތަނުން އިންޓަރންޝިޕްގެ ފުރުސަތު ފަހިކޮށްދޭންޖެހޭ ކަމަށް ގަވާއިދުގައި ބުނެފިއެވެ.
ބުރާސްފަތި ދުވަހު ވަނީ ނުކުޅެދުންތެރިކަން ހުންނަ މީހުންނަށް ވަޒީފާގެ ފުރުސަތު ހޯދައިދިނުމާއި ވަޒީފާ ދިނުމުގައި އަމަލުކުރާނެ ގޮތުގެ ގަވާއިދު ގެޒެޓްކޮށްފައެވެ.
މި ގަވާއިދުގެ މަގުސަދަކީ ނުކުޅެދުންތެރިކަން ހުންނަ މީހުންނަށް އެހެން މީހުންނެކޭ އެއްފަދައިން އެ މީހަކު އިޚްތިޔާރުކުރާ ވަޒީފާއެއް އަދާކުރުމުގައްޔާއި މަސައްކަތް ކުރުމުގައްޔާއ،ި ވަޒީފާގެ މައިދާނުގައި ހަމަހަމަ ފުރުސަތުތައް ހޯދައިދިނުމެވެ. އަދި މަސައްކަތުގެ މާހައުލުގައި ނުކުޅެދުންތެރިކަން ހުންނަ މީހުންނަށް އެ މީހުންގެ ކިބައިގައި ހުރި ނުކުޅެދުންތެރިކަމެއްގެ ސަބަބުން އެއްވެސް ފަރާތަކުން އެ މީހުންނާމެދު ތަފާތުކުރުންތައް ގެންގުޅުން މަނާކުރުމެވެ.
ނުކުޅެދުންތެރިކަން ހުންނަ މީހަކަށް ވަޒީފާދޭ ފަރާތުން އެ ފަރާތަށް މަސައްކަތްކުރާނެ އެކަށީގެންވާ މާހައުލެއް ގާއިމްކޮށްދީ މަސައްކަތުގެ މާހައުލުގައި މި ފަރާތްތައް ޝާމިލުކުރާނެ ގޮތްތަކުގެ އުސޫލުތައް ކަނޑައަޅާފައިވާއިރު، ނުކުޅެދުންތެރިކަން ހުންނަ މީހުންނަށް އެހެން މީހުންނެކޭ އެއްފަދައިން އެ މީހަކު އިޚްތިޔާރުކުރާ ވަޒީފާއެއް އަދާކުރުމުގެ ހައްގާއި މަސައްކަތެއް ކުރުމުގެ ހައްގާއި، ވަޒީފާގެ މައިދާނުގައި ހަމަހަމަ ފުރުސަތުތަކެއް ލިބިދިނުމުގެ ހައްގު ކަށަވަރުކޮށްދިނުން މިގަވާއިދުގައި ހިމެނެއެވެ.
ގަވާއިދުގައި ބުނެފައިވަނީ ނުކުޅެދުންތެރިކަން ހުންނަ މީހުންގެ ތެރެއިން އަމަލީ ތަޖުރިބާ ބޭނުންވާ ފަރާތްތަކަށް ވަޒީފާދޭ އިދާރާތަކުގެ ތެރެއިން ވަޒީފާ ހަމަޖެއްސުމަށް ތައްޔާރުވެފައިވާ ތަންތަނުގެ އިންޓަރންޝިޕްގެ ފުރުސަތު ފަހިކޮށްދޭންޖެހޭ ކަމަށެވެ. އިންޓަރންޝިޕް ފުރުސަތު ކިޔަވާ ދަރިވަރުންނަށާއި އިދާރާއެއްގައި މަސައްކަތްކޮށް ތަޖުރިބާ ހޯދުމަށް ބޭނުންވާ ނުކުޅެދުންތެރިކަން ހުންނަ މީހުންނަށް ހަމަހަމަކަމާއެކު ލިބިދޭންޖެހޭ ކަމަށެވެ.
އިންޓަރންޝިޕް ފުރުސަތު ދެވޭނީ ވަޒީފާ އަދާކުރުމަށް ޝައުގުވެރިކަން ހުރި ނުކުޅެދުންތެރިކަން ހުންނަ މީހުންގެ ދަފުތަރުގައި ދަފުތަރުވެފައިވާ ފަރާތްތަކުގެ ތެރެއިން ކޮމްޕިޓެންސީ ޕްރޮފައިލް ހަދައިފައިވާ ފަރާތްތަކަށެވެ.
މީގެ އިތުރުން އިންޓަރންޝިޕްގެ ފުރުސަތު ފަހިކޮށްދިނުމުގައި ވަޒީފާ ހަމަޖެއްސުމަށް ތައްޔާރުވެފައިވާ ތަންތަންކަން ކަށަވަރުވާންޖެހޭ ކަމަށް ގަވާއިދުގައި ބުނެފައިވެއެވެ.
ނުކުޅެދުންތެރިކަން ހުންނަ މީހުންނަށް މި އިންޓަރންޝިޕްތަކަށް ހަމަހަމަކަމާއެކު ކުރިމަތިލުމުގެ ފުރުސަތު ދޭންޖެހޭއިރު، އިންޓަރންޝިޕަށް ކުރިމަތިލާ ފަރާތްތަކުގެ މެދުގައި ވާދަވެރިކަން އޮތްނަމަ އިންޓަރންޝިޕް ހަމަޖައްސައިދެވެނީ އިދާރާއަކުން ކަނޑައަޅާ މިންގަނޑެއްގެ ތެރެއިން ދެވޭ އެސެސްމެންޓް/ ޕްރެކްޓިކަލްއަކުން ހޮވޭ އެންމެ ގާބިލު ފަރާތަށްކަމާއި އެސެސްމަންޓް/ ޕެރެކްޓިކަލްއެއް ފުރިހަމަކުރުމުގެ ގާބިލުކަން ނެތް ފަރާތްނަމަ އިންޓަވިއު އިން ހޮވޭ އެންމެ ގާބިލު ފަރާތަށްވާންޖެހެއެވެ.
އިންޓަރންޝިޕްގެ ފުރުސަތު ފޯރުކޮށްދެވެނީ ކޮމްޕިޓެންސީ ޕްރޮފައިލަށް ބިނާކޮށެވެ. އަދި ވަޒީފާ ހަމަޖެއްސުމަށް ތައްޔާރުވެފައިވާ ތަންތަނުގައި އިންޓަރންޝިޕް ފުރުސަތުތަކުގައި އުޖޫރަ ދިނުމުގައި ގެންގުޅޭ އުސޫލުތަކާ އެއްގޮތަށް އުޖޫރަދޭންޖެހޭ ކަމަށް ގަވާއިދުގައި ބުނެފައިވެއެވެ.
މީގެ އިތުރުން އިންޓަރންޝިޕް ހަމަޖެއްސުމުގެ ކުރިން އިންޓަރންޝިޕްގެ ފުރުސަތުދޭ އިދާރާއާއި ނުކުޅެދުންތެރިކަން ހުންނަ މީހުން ހިމެނޭގޮތުން އިންޓަރންޝިޕް ގުޅޭ ކަންކަމާމެދު އެއްބަސްވުމަށްފަހު އެ މައުލޫމާތު ހިމެނޭ އިންޓަރންޝިޕް އެގްރިމެންޓް އެކުލަވާލަންޖެހެއެވެ.
