ސައުދީ ޕްރޯ ލީގުގެ އަލް ހިލާލަށް ކުޅެމުން އަންނަ، ބްރެޒިލްގެ ނޭމާ ޖޫނިއާގެ އެއްބަސްވުން އުވާނުލާ ކަމަށް އެ ކުލަބުން ބުނެފިއެވެ.

ފްރާންސްގެ ޕެރިސް ސެއިންޓް ޖާމަން (ޕީއެސްޖީ) ދޫކޮށް، ނޭމާ އަލް ހިލާލަށް ބަދަލުވީ މިދިޔަ އަހަރުއެެވެ. އުމުރުން 31 އަހަރުގެ ކުޅުންތެރިޔާ އަލް ހިލާލަށް ސޮއިކޮށްފައިވަނީ ދެ އަހަރު ދުވަހުގެ އެއްބަސްވުމެއްގެ ދަށުންނެވެ. އެހެންކަމުން 2025 ވަނަ އަހަރުގެ ޖޫން މަހުގެ ނިޔަލަށް އޭނާ އެ ކުލަބުގައި މަޑުކުރާނެއެވެ. އަލް ހިލާލަށް ބަދަލުވިފަހުން، ނޭމާ ވަނީ އެ ކުލަބަށް ފަސް މެޗު ކުޅެދީފައެވެ.

ނަމަވެސް، ފީފާ ވޯލްޑް ކަޕް ކޮލިފިކޭޝަންގައި ބްރެޒިލުން އުރުގުއޭއާ ދެކޮޅަށް ކުޅުނު މެޗުގައި ނޭމާއަށް ވަނީ އަނިޔާވެފައެވެ. އޭގެ ފަހުން އޭނާއަށް ކަކުލުގެ އޮޕަރޭޝަނެއް ކުރަން ޖެހުނުއިރު، އޭގެ ފަހުން ހުންނަނީ ކުޅުމާ ދުރުގައެވެ. އަނިޔާގެ ސަބަބުން، މިއަހަރު ދެކުނު އެމެރިކާ ސަރަހައްދުގެ ފުޓުބޯޅަ މުބާރާތުގައި (ކޮޕާ އެމެރިކާ) ނުކުޅެވޭނެކަން ވަނީ ކަށަވަރުވެފައެވެ. އަދި އަލުން އޭނާއަށް ކުޅުމުގެ ތެރެއަށް އާދެވޭނެ ކަމަށް ލަފާ ކުރެވެނީ، މިއަހަރުގެ އޯގަސްޓު މަހުގެ ތެރޭގައެވެ.

އަލް ހިލާލުން ނޭމާގެ އެއްބަސްވުން އުވާލި ކަމަށް މީޑިއާތަކުގައި ދެކެވޭ ވާހަކަތައް އެ ކުލަބުން ވަނީ ދޮގުކޮށްފައެވެ. އެގޮތުން އެ ކުލަބާ ހަވާލާދީ، ސައުދީގެ މީޑިއާއެއްގައި ބުނެފައިވަނީ، ނޭމާގެ އެއްބަސްވުން އުވާނުލާ ކަމަށެވެ. ނޭމާއަށް އަނިޔާވުމުން ބިދޭސީ ކުޅުންތެރިއެއްގެ ގޮތުގައި ރެނާން ލޯޑީގެ ސްކޮޑް ލިސްޓުން ޖާގަ ހޯދީ ކަމަށް ވެސް ވަނީ ބުނެފައެވެ. ނަމަވެސް، ނޭމާގެ އެއްބަސްވުން އުވާނުލާކަމަށް ވަނީ ބުނެފައެވެ.

ބާސެލޯނާގައި މޮޅު ކުޅުމެއް ދައްކަމުން އައި ނޭމާ 2017 ވަނަ އަހަރު ޕީއެސްޖީއަށް ބަދަލުވީ ދުނިޔޭގެ ރެކޯޑު އަގަކަށެވެ. ބާސެލޯނާ ދޫކޮށް ޕީއެސްޖީއަށް ބަދަލުވި ފަހުން ނޭމާ އަށް އެ ކުލަބުގައި އެކަށީގެންވާ ވަރުގެ ކުޅުމެއް ނުދެއްކެއެވެ. އެ ކުލަބަށް ބަދަލުވިފަހުން ނޭމާއަށް ވަނީ އަނިޔާގެ ގިނަ މައްސަލަތަކާ ވެސް ކުރިމަތިލާން ޖެހިފައެވެ. އެންމެ ފަހުން މިދިޔަ ސީޒަނުގެ ފެބްރުއަރީ މަހު ނޭމާއަށް ވަނީ އަނިޔާވެފައެވެ. އެއާއެކު އޭނާ ސާޖަރީއެއް ކުރަން ޖެހުނުއިރު، ސީޒަންގެ ބާކީބައި އެއްކޮށް ވަނީ ގެއްލިފައެވެ. އެ ފަހަރު ނޭމާ ވަނީ ފައިގެ ކުޑަހުޅުގެ ސާޖަރީއެއް ކޮށްފައެވެ.