ހުޅުމާލޭ ދެވަނަ ފިޔަވަހީގައި ބިނާކުރާ ދާއިމީ މިސްކިތްތަކުގެ ތެރެއިން އަންނަ ރަމަޟާންމަހަށް 1500 މީހުންގެ ޖާގައިގެ މިސްކިތެއް ނިމޭނެ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.

ބުރާސްފަތި ދުވަހު ހުޅުމާލޭގެ ދެވަނަ ފިޔަވަހީގައި އިމާރާތް ކުރެވޭ މިސްކިތްތަކުގެ މަސައްކަތްތައް ކުރިއަށްދާ ގޮތް ބައްލަވާލެއްވުމަށްފަހު މިނިސްޓަރު ޝަހީމް ވިދާޅުވީ ހުޅުމާލެގެ ދެވަނަ ފިޔަވަހީގައި އަޅަމުންދާ ދާއިމީ މިސްކިތްތައް ބިނާކޮށް ނިންމުމުގެ މަސައްކަތް ވަރަށް ގާތުން ބަލަމުންދާ ކަމަށެވެ.

އެގޮތުން އަމިއްލަ ފަރާތްތަކުން އަޅަމުންދާ 5 މިސްކިތެއްގެ ތެރެއިން 1500 މީހުންގެ ޖާގައިގެ ދާއިމީ ބޮޑު މިސްކިތެއް މި ރޯދައަށް ނިމޭނެ ކަމަށް މިނިސްޓަރު ޝަހީމް ވިދާޅުވިއެވެ. އަދި ވިދާޅުވީ އެހެން މިސްކިތްތައް ރޯދައިގެ ފަހަށް ނިންމޭނެ ކަމަށާއި، ދާއިމީ ހުރިހާ މިސްކިތްތަކެއް ގިނަވެގެން 2 އަހަރު ތެރޭ ނިންމާލެވޭނެ ކަމަށެވެ.

އަހަރުތަކެއް ވެފައިވާ ބައެއް މަޝްރޫއުތައް ދެން ލަސްތަކެއް ނުވެ ނިމޭނެކަން ފާހަގަކުރައްވައި މިނިސްޓަރު ޝަހީމް ވިދާޅުވީ ފޭސް 2ގެ ބިނާކުރެވޭ މިސްކިތްތައް ވަރަށް ފުރިހަމަ ވާނެ ކަމަށެވެ. އަދި ފޭސް 2 ގައި 2800 މީހުންގެ ޖާގައިގެ ދާއިމީ މިސްކިތަކާއި 3000 މީހުންގެ ޖާގައިގެ ދާއިމީ މިސްކިތަކާއި 1500 މީހުންގެ ޖާގައިގެ ދާއިމީ މިސްކިތަކާއި އަދި 1162 މީހުންގެ ޖާގައިގެ ދާއިމީ މިސްކިތެއްގެ އަމަލީ މަސައްކަތް ކުރިއަށްދާ ކަމަށް މިނިސްޓަރު ޝަހީމް ވިދާޅުވިއެވެ.

މީގެ އިތުރުން މިނިސްޓަރު ޝަހީމް ވިދާޅުވީ ދެވަނަ ފޭސްގެ މިސްކިތްތަކަށް އިމާމުން ހަމަޖައްސާނީ ދެވަނަ ފޭސްގެ ދިރިއުޅޭ މީހުންގެ ތެރެއިން ރީތިކޮށް ކިޔަވާ އިލްމީ ބޭފުޅުން ކަމަށެވެ. އަދި ޚާއްސަކޮށް ޙާފިޒުންނަށް އިސްކަން ދެވޭނެ ކަމަށާއި، މި ރަމަޟާން މަހު ފޭސް ދޭއްގައި ހުޅުވޭ ދާއިމީ މިސްކިތުގައި ދަމު ނަމާދު ވެސް އޮންނާނެ ކަމަށް މިނިސްޓަރު ޝަހީމް ވިދާޅުވިއެވެ.