ޗެއަރމަން އަށް ނާންގާ ވެލެންސިޔާއިން ބޭއްވި ހިންގާ ކޮމިޓީ ބައްދަލުވުމަށް ދިން ދައުވަތު ކޮމިޝަނަރު ގަބޫލެއް ނުކުރި

މައްސަލަ ބޮޑުވެ، ދެ ފަޅިވެފައިވާ ކުލަބު ވެލެންސިއާގެ ހިންގާ ކޮމެޓީގެ ބައްދަލުވުމެއް ބާއްވައިފި އެވެ.

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ހައުސްގައި ބުރާސްފަތި ދުވަހުގެ ރޭ ބޭއްވި ބައްދަލުވުމަކީ، ކޮމިޝަނަރ އޮފް ސްޕޯޓްސް، މުޙައްމަދު ޠަލާލް (ޠަލާ) އަށް ދަޢުވަތު ދީގެން ބާއްވަން ނިންމި ބައްދަލުވުމެވެ. ބައްދަލުވުން ބޭއްވުމުގައި އިސްކޮށް ޙަރަކާތްތެރިވީ ކުލަބު ވެލެންސިއާގެ ޑައިރެކްޓަރ އޮފް ފައިނޭންސް ޙަސަން ވަޙީދު (ދޮނާ) އެވެ. ނަމަވެސް، އެ ބައްދަލުވުމަށް ކޮމިޝަނަރު އަދި ކޮމިޝަނަރުގެ އޮފީހުން ވެސް ބައިވެރިވެފައެއް ނުވެ އެވެ.

ބައްދަލުވުން ފައްޓަވަމުން ރިޔާސަތުގައި އިންނެވި ކުލަބު ވެލެންސިއާގެ ނައިބު ރައީސް، އިލްމާއު ޙުސެއިން އިބްރާހީމް ވިދާޅުވީ، އެ ބައްދަލުވުމަކީ ކުލަބުގެ ޗެއާމަން ޢަބްދުﷲ އަޒްމީނާ ދެކޮޅަށް ބޯޑު މެމްބަރު ޙަސަން ވަޙީދު (ދޮނާ) ހުށަހަޅުއްވާފައިވާ މައްސަލަ އަށް ބަޙުސްކޮށް، ގޮތެއް ނިންމުމަށް ބާއްވާ ބައްދަލުވުމެއް ކަމަށެވެ. ބައްދަލުވުމުގައި ވާހަކަ ދައްކަމުން ދޮނާ ބުނީ، އަޒްމީންގެ އިތުރުން ކުލަބުގެ ބޯޑު މެމްބަރު މުޙައްމަދު ރާފިއުގެ އިތުބާރު ނެތް ކަމަށެވެ. ފަސް މެމްބަރުން ބައިވެރިވި މި ބައްދަލުވުމުގައި ވަނީ އެކަމަށް ވޯޓަށް އަހައިފަ އެވެ. ބައްދަލުވުމުގައި ބައިވެރިވި ފަސް މެމްބަރުން ވެސް ވަނީ ވޯޓުގައި ބައިވެރިވެ، އިތުބާރު ނެތް ކަމަށް ވޯޓު ދީފަ އެވެ.

މައު އަދި ދޮނާގެ އިތުރުން ބައްދަލުވުމުގައި ބައިވެރިވި މެމްބަރުންނަކީ، އަލީ މަމްދޫހު، ޔޫސުފް ރަމީޒް އަދި މިސްބާހު މުޙައްމަދު އެވެ. ވެލެންސިއާގެ ހިންގާ ކޮމެޓީގައި ދެން ހިމެނޭ ތިން މެމްބަރުންނަކީ އަޒްމީން އަދި ރާފއުގެ އިތުރުން، އިސްމާއީލް އާސިފް (ކުޑަހީނާ) އެވެ.

މީގެ އިތުރުން ކުލަބުގެ އައު އިންތިޚާބެއް ބޭއްވުނުކަމަށް ބުނެ، ކޮމިޝަނަރ އޮފް ސްޕޯޓްސް އަށް ޞައްޙަ ނޫން ލިޔުންތަކެއް ހުށަހަޅާފައިވާކަމުގެ މަޢުލޫމާތު ލިބޭތީވެ، އެ މައްސަލަ ބަލައި ދިނުމަށް ސްޕޯޓްސް ކައުންސިލަށް ހުށަހެޅުމަށް ވެސް ވޯޓަށް އެހި އެވެ. ބައްދަލުވުމުގައި ބައިވެރިވި ފަސް މެމްބަރުން ވެސް ވަނީ އެކަމާ އެއް ކޮޅަށް ވޯޓު ދީފަ އެވެ. އެ ބައްދަލުވުމުގައި ދެން ނިންމީ، ވެލެންސިއާގާ ހިންގާ ކޮމެޓީގެ އިންތިޚާބެއް އަވަސް މުއްދަތެއްގެ ތެރޭގައި ބޭއްވުމަށެވެ.

މިއީ ވެލެންސިއާގެ ހިންގާ ކޮމެޓީން، އަޒްމީންގެ އިތުބާރު ނެތް ކަމަށް ފާސްކުރި ދެ ވަނަ ފަހަރެވެ. މީގެ ކުރިން ވެސް ވަނީ އަޒްމީންގެ އިތުބާރު ނެތް ކަމަށް ފާސްކޮށްފަ އެވެ. ނަމަވެސް، އެ ބައްދަލުވުމަކީ ކުލަބުގެ ހިންގާ ޤަވާއިދުގައިވާ ގޮތުގެ މަތީން، އިޖުރާއަތްތައް ފުރިހަމަވެގެން ކުރިއަށް ގެންދެވިފައިވާ ބައްދަލުވުމެއްގެ ގޮތުގައި ބެލެވެން ނެތް ކަަމަށް ކޮމިޝަނަރު ވަނީ ބުނެފަ އެވެ.

ހަމައެހެންމެ، ކުލަބު ވެލެންސިއާގެ ހިންގާ ޤަވާއިދުގައިވާ ގޮތުން، ކުލަބުގެ ހިންގާ ކޮމެޓީގެ މަޤާމުތަކަށް މެމްބަރުން އިންތިޚާބު ކުރުމުގެ އެންމެހައި ބާރުތަކެއް ލިބިގެން ވަނީ، އެ މަޤާމުތަަކަށް މެމްބަރުން އިންތިޚާބު ކުރުމަށް ބާއްވާ ކުލަބުގެ އާންމު ޖަލްސާއެއްގައި ބައިވެރިވާަ މެމްބަރުންނަށްކަން ވަނީ ފާހަގަކޮށްފަ އެވެ. އެހެންކަމުން، ކުލަބުގެ ޗެއާމަން ނުވަތަ ބޯޑު މެމްބަރަކު މަޤާމުން ވަކި ކުރުމުގެ ބާރު ވެސް އޮންނާނީ އެކަމަށްޓަކައި ބާއްވާ އާންމު ޖަލްސާގައި ބައިވެރިވާ މެމްބަރުންނަށް ކަމަށް ވަނީ ބުނެފަ އެވެ. އެފަހަރު ކޮމިޝަނަރު ވަނީ ވެލެންސިއާގެ ޗެއާމަނަކީ އަޒްމީންކަމަށް، އެފްއޭއެމަށް ވެސް އަންގައިފަ އެވެ.

މި މަހުގެ ފަހު ކޮޅު ބާއްވަން މަސައްކަތް ކުރަމުން އަންނަ އެފްއޭއެމްގެ އިންތިޚާބާ ދިމާކޮށް، ވެލެންސިއާގެ އެތެރޭގައި މައްސަލަ ބޮޑުވެފައިވާއިރު، ވެލެންސިއާ އިން އެންމެ ފުރަތަމަ ތާއީދު ކުރަން ނިންމީ، ޤައުމީ ޓީމުގެ ކުރީގެ ފޯވާޑް އަޙުމަަދު ޠާރިޤް (ޓޮމް) އަށެވެ. ނަމަވެސް، ފަހުން ވެެލެންސިއާގެ ތާއީދު ސިޓީ، ކުލަބު އީގަލްސްގެ ވައިސް ޗެއާމަން މުފާވިޒް ޙާޝިމް (މުފާ) އަތުގައި ވެސް އޮތެވެ.

އެފްއޭއެމްގެ އިލެކްޓޯރަލް ކޮމެޓީން ނިންމީ، ވެެލެންސިއާ އިން ދެ ކެންޑިޑޭޓުންނަށް ވެސް ދީފައި ވަނީ ޞައްޙަ ދެ ލިޔުން ކަމަށެވެ. ނަމަވެސް، އެއް ކުލަަބަކަށް ދެ ކެންޑިޑޭޓުންނަށް ތާއީދު ނުދެވޭތީ، ވެލެންސިއާގެ ދެ ސިޓީ ވެސް ވަނީ ބާތިލްކޮށްފަ އެވެ. އެއާއެކު ކޮމެޓީން ނިންމީ، ޓޮމްގެ ޝަރުތު ފުރިހަމަ ނުވާ ކަމަށެވެ. ނަމަވެސް ޓޮމްގެ ފަރާތުން ވަނީ އެ މައްސަލަ އިސްތިއުނާފު ކޮށްފަ އެވެ. އެފްއޭއެމްގައި އެޕީލް ކޮމެޓީއެއް ނެތުމުން، އެ މައްސަލަ މިހާރު އޮތީ ދުނިޔޭގެ ފުޓުބޯޅައިގެ މައި އިދާރާ (ފީފާ) އަދި ސަރަހައްދީ ފުޓުބޯޅަ އިދާރާ (އޭއެފްސީ)ގަ އެވެ.