ޕާކިސްތާނުން އީރާނާ ދެކޮޅަށް ރައްދުގައި ވައިގެ ހަމަލާތަކެއް ދީފިއެވެ.

ޕާކިސްތާނުން އީރާނާ ދެކޮޅަށް ބަދަލުހިފުމުގެ ވައިގެ ހަމަލާތައް ދޭން ފަށާފައި މިވަނީ ތެހެރާނުން ޕާކިސްތާނުގެ ބިމަށް އެފަދަ ހަމަލާއެއް ދިންތާ ދެ ދުވަސް ފަހުންނެވެ.

ޕާކިސްތާނުގެ ބޯޑަރު އޮންނަ އީރާނުގެ ދެކުނުއިރުމަތީ ސިސްތާން-ބަލޫޗިސްތާން ޕްރޮވިންސްގައި ދިން މި ހަމަލާގައި ހަތް މީހަކު ވަނީ މަރުވެފައެވެ.

ޕާކިސްތާނުން ބުނީ އެ ހަމަލާގައި "ޓެރަރިސްޓުންގެ ތަންތަނަށް" ހަމަލާ ދީފައިވާކަމަށާއި، އެކަމުގެ ސަބަބުން ނިއުކްލިއަރ ހަތިޔާރު ލިބިފައިވާ ދެ ގައުމުގެ މެދުގައި މިހާރުވެސް އުފެދިފައިވާ ނުތަނަވަސްކަން އިތުރުވެފައި ވާކަމަށެވެ.

ތެހެރާނުންވެސް ވަނީ އަންގާރަ ދުވަހު ދިން ހަމަލާއަކީ ޓެރަރިސްޓް ޖަމާއަތްތަކަށް އަމާޒުކޮށް ދިން ހަމަލާއެއް ކަމަށް ބުނެފައެވެ.

ދެ ގައުމުން ވެސް ޒަމާނުއްސުރެ ތުހުމަތުކުރަމުން އައީ އެ ދެ ގައުމުގެ ހިއްސާވާ ބޯޑަރު ސަރަހައްދުން ހަމަލާދޭ ހަނގުރާމަވެރި ޖަމާއަތްތަކަށް ހިމާޔަތް ދޭކަމަށެވެ.

ޕާކިސްތާނުގެ ރައްދު ހަމަލާތައް ދީފައި މި ވަނީ އިސްރާއީލުން ޣައްޒާގައި ހަމާސް ޖަމާއަތާ ދެކޮޅަށް ކުރަމުންދާ ހަނގުރާމައިގެ ސަބަބުން މެދުއިރުމަތީގައި ހަމަނުޖެހުންތައް ފެތުރުމުގެ ނުރައްކާ ބޮޑުވެފައިވާ ދަނޑިވަޅެއްގައެވެ.

އީރާނުން ވަނީ މިދިޔަ ހޯމަ ދުވަހުގެ ރޭ އިރާގާއި ސީރިއާއަށް ވެސް ވައިގެ ހަމަލާތަކެއް ދީފައެވެ. އެ ހަމަލާތަކާ ގުޅިގެން، އިރާގުން ވަނީ އިރާނުގައި ހުންނަވާ ސަފީރު އަނބުރާ ގައުމަށް ގެނެސްފައެވެ.

ޕާކިސްތާނުގެ ޚާރިޖީ ވުޒާރާއިން ބުރާސްފަތި ދުވަހު ދިން ހަމަލާ ސިފަކޮށްފައިވަނީ "ވަރަށް ކޯޑިނޭޓެޑް، އަދި ވަކިން ޚާއްސަކޮށް ރޭވިގެން ދިން އަސްކަރީ ހަމަލާތަކެއް"ގެ ގޮތުގައެވެ.

ފޮރިން މިނިސްޓްރީން ނެރުނު ބަޔާނެއްގައި ބުނީ މިއަދު ހެނދުނުގެ މި ފިޔަވަޅަކީ ޓެރަރިޒަމްގެ ބޮޑެތި ހަރަކާތްތައް ހިންގަން އުޅޭކަމަށް އިތުބާރުހުރި ގޮތެއްގައި އިންޓެލިޖެންސަށް ލިބިފައިވާ މައުލޫމާތަކާ ގުޅިގެން އެޅި ފިޔަވަޅެއް ކަމަށެވެ. އަދި މި އަމަލަކީ ހުރިހާ ނުރައްކަލަކުން ވެސް ޕާކިސްތާނުގެ ގައުމީ ސަލާމަތާއި ރައްކާތެރިކަން ހިމާޔަތްކޮށް، ދިފާއުކުރުމަށް ޕާކިސްތާނުން ކެނޑިނޭޅި އަޒުމް ކަނޑައެޅުމުގެ އަމަލެއް ކަމަށެވެ.

އީރާނުގެ އޮފިޝަލުން ބުނީ އެ ހާދިސާގައި މަރުވެފައިވަނީ ތިން އަންހެނަކާއި ހަތަރު ކުޑަކުދިން ކަމަށެވެ.

އީރާނާއި ޕާކިސްތާނުގައި ހަނގުރާމަވެރި ގިނަ ޖަމާއަތްތަކެއް ހަރަކާތްތެރިވަމުން އަންނައިރު، އޭގެ ތެރޭގައި ޖައިޝް އަލް އަދްލް ސުންނީ، ވަކިވެގަތް ޖަމާއަތް ވެސް ހިމެނެއެވެ.

އަފްޣާނިސްތާނާއި އީރާނާއި ޕާކިސްތާނުގެ ބަލޫޗް ނަސްލުގެ ސަރަހައްދުތަކަށް، މިނިވަން ބަލޫޗިސްތާނެއް ގެނައުމުގެ އެއް އަމާޒެއް އެ އެންމެންގެ ވެސް އެބައޮތެވެ.

ޕާކިސްތާނުން ތެހެރާނަށް ކަނޑައަޅާފައި ހުންނަވާ ސަފީރު ބުދަ ދުވަހު އަނބުރާ ފޮނުވާލީ މީގެ ދެ ދުވަސް ކުރިން ޕާކިސްތާނުގެ ހުޅަނގު ދެކުނު ބަލޫޗިސްތާން ޕްރޮވިންސަށް އީރާނުން ހަމަލާ ދިނުމުންނެވެ.

އީރާނުން ބުނެފައި ވަނީ އެ ގައުމުން ހަމަލާ ދީފައިވަނީ ހަނގުރާމަވެރި ސުންނީ ވަކިވެގަތް ޖަމާއަތެއްގެ މަރުކަޒުތަކަށެވެ.

ޕާކިސްތާނުން ވަނީ އެ ހަމަލާއަކީ އެގައުމުގެ ވައިގެ ސަރަހައްދަށް ދިން ގަވައިދާ ޚިލާފު ހަމަލާއެއް ކަމަށް ބުނެ އެކަން ކުށްވެރިކޮށް ދެ ކުއްޖަކު މަރާލާފައިވާކަމަށް ބުނެފައެވެ.

އީރާނާއި ޕާކިސްތާނަކީ 900 ކިލޯމީޓަރު (560 މޭލު)ގެ ބޯޑަރެއް އޮންނަ ދެ ގައުމެވެ. އަދި އަފްޣާނިސްތާނުން ނުކުންނަ ދުނިޔޭގެ އަފީމް ޝިޕްމަންޓްތަކަށް ވެސް މި މަގަކީ މުހިންމު މަގެކެވެ.