ކްރިމިނަލް ކޯޓުގައި ތާވަލުކުރެވުނު މައްސަލައިގެ އަދަދު ފާއިތުވި އަހަރަށްވުރެ 43 އިންސައްތައަށް ދަށްވެއްޖެއެވެ.

ބުރާސްފަތި ދުވަހު ކްރިމިނަލް ކޯޓުން ވަނީ 2023 ވަނަ އަހަރުގެ ތަފާސްހިސާބުތައް އާއްމުކޮށްފައެވެ.

ކްރިމިނަލް ކޯޓުން ބުނީ 2023 ވަނަ އަހަރު ޖުމްލަ 7242 މައްސަލަ ތާވަލު ކުރެވުނު ކަމަށެވެ. މިއީ ފާއިތުވި އަހަރަށްވުރެ 43 އިންސައްތަ މަދު އަދެދެއް ކަމަށް އެކޯޓުން ބުނެއެވެ. 2023 ވަނަ އަހަރު ޖުމްލަ 854 މައްސަލަ ހުށަހެޅިފައިވާއިރު، މިއީ ފާއިތުވި އަހަރަށްވުރެ 64 މައްސަލަ އިތުރު އަދަދެއް ކަމަށް އެކޯޓުން ބުނެއެވެ. އަދި ކްރިމިނަލް ކޯޓުން ބުނީ 2023 ވަނަ އަހަރު ޖުމްލަ 497 މައްސަލަ ނިންމާފައިވާ ކަމަށެވެ. މިއީ ފާއިތުވި އަހަރަށްވުރެ 55 އިންސައްތަ މަދު އަދެދެކެވެ.

ކްރިމިނަލް ކޯޓުން ބުނީ 2023 ވަނަ އަހަރު ކޯޓަށް ހުށަހެޅުނު މައްސަލާގެ އަދަދު އިތުރުވެފައިވާ ކަމަށެވެ. ނަމަވެސް 2023 ވަނަ އަހަރުގެ ފެބްރުއަރީ މަހުން ފެށިގެން ކޯޓުގެ އެއްބައި ބޭނުން ނުކުރުމަށް އެންގުމާއި ގުޅިގެން ކޯޓުގެ ޝަރީއަތްތަކަށް ބުރޫއަރައި ކޯޓުން ޝެޑިއުލް ކުރި މައްސަލާގެ އަދަދާއި ކޯޓުން ނިންމި މައްސަލާގެ އަދަދު ވަރަށް ބޮޑަށް ދަށްވެފައިވާ ކަމަށް އެކޯޓުން ބުނެއެވެ.

މީގެ އިތުރުން މިފަހުން ރާއްޖެއަށް ކުރި ވިއްސާރާގައި މާލެއަށް ބޯކޮށް ވާރޭވެހުމުގެ ސަބަބުން ކްރިމިނަލް ކޯޓަށް ވަނީ ބޮޑެތި ގެއްލުންތައް ލިބިފައެވެ. ކްރިމިނަލް ކޯޓު ހިންގާ އިމާރާތަށް ފެނުގެ އަސަރުކޮށް، ޝަރީއަތްތައް ހިންގުމަށް ވަނީ ބޮޑެތި ހުރަސްތަކެއް ކުރިމަތިވެފައެވެ.

ކޯޓުގައި ހުރި ޝަރީއަތް ކުރާ މާލަންތަކުގެ ތެރެއިން މިހާރު ބޭނުން ކުރެވޭ ހާލަތުގައި ހުރީ 2 މާލަމެވެ. އޭގެ ތެރެއިން 1 މާލަން ބަންދާމެދު ގޮތެއް ނިންމުމުގެ މަޖިލިސްތަކަށް ޚާއްސަކުރަން ޖެހެއެވެ،.

ކޯޓުގެ އެކި ސެކްޝަންތަކުގައި ތިއްބަވާ 11 ގާޒީން ޝަރީއަތްތަކުގެ އަޑުއެހުންތައް ކުރިއަށް ގެންދެވުމަށް މިވަގުތު ހުރީ އެންމެ މާލަމެކެވެ.