ނިމިިދިޔަ ސަރުކާރުގެ ގެދޮރުވެރިޔާ ސްކީމްގެ ދަށުން ދޫކުރާ ފްލެޓްތަކާއި ގުޅިގެން އޭސީސީން ތަހުގީގުކުރަމުންދާ މައްސަލަ ނިންމަން އަދި ނަގާނީ ކިހާ ދުވަހެއްކަމެއް ނޭނގޭކަމަށް އެ ކޮމިޝަނުން ބުނެފިއެވެ.
ބުރާސްފަތި ދުވަހު ރާއްޖެއެމްވީން ސުވާލުކުރުމުން އޭސީސީގެ މީޑިއާ އޮފިޝަލު ވިދާޅުވީ، ތަހުގީގު މިހާރު އޮތީ ނިންމުމުގެ މަރުޙަލާގައި ކަމަށެވެ.
ތަހުގީގު ނިންމުމުގެ މަރުޙަލާގައި ކިހާ ދުވަހެއްވާނެތޯއާއި، އެކަމަށް ގާތްގަނޑަކަށް ހޭދަވާނެކަމަށް ބެލެވެނީ ކިހާ ދުވަހެއްތޯ ސުވާލު ދެންނެވުމުން ވިދާޅުވީ، ތަހުގީގަށް އަދި ނަގާނީ ކިހާ ދުވަހެއްކަމެއް އެނގިވަޑައިނުގަންނަވާ ކަމަށެވެ.
އޭނާ ވިދާޅުވީ، ތަހުގީގު ކުރިއަށްދާއިރު އޭސީސީން ޓައިމްލައިންތަކެއް ކަނޑައަޅާފައިވާ ކަމަށާއި، ނަމަވެސް އޭސީސީން ކަނޑައަޅާފައިވާ ޓައިމްލައިން ހިއްސާ ނުކުރެވޭނެކަމަށެވެ.
އަދި މިވަގުތަށް ތަހުގީގު ނިމޭނެ ސީދާ ދުވަހެއް ވިދާޅުވަން އުނދަގޫކަމަށް ވެސް އޭނާ ވިދާޅުވިއެވެ.
އޭގެ އިތުރުން، ތަހުގީގުގެ ބޭނުމަށް މީހުން ހާޒިރުކޮށް ބަޔާން ނެގުން ނިމުނީތޯ ރާއްޖެއެމްވީން ދެންނެވި ސުވާލަށް ވިދާޅުވީ، މިއީ ތަހުގީގު ކުރިއަށްދާ މައްސަލައަކަށް ވާތީ ބަޔާން ނެގުން ނިމުނީތޯ ނޫންތޯ ވިދާޅުވާން ވެސް ދަތި ކަމަށެވެ.
މިހާރުވެސް ބައެއް ފަރާތްތަކުގެ ބަޔާން ނަގާފައިވާނެކަމަށް އޭސީސީން މައުލޫމާތު ދިނެވެ.
ފްލެޓު ދިނުން ލަސްވާތީ ބުރާސްފަތި ދުވަހު ވެސް ބައެއް ފަރާތްތަކުން އިހުތިޖާޖުކޮށްފައިވެއެވެ.
