ދައުލަތުގެ ބެލުމުގެ ދަށުގައި ތިބޭ ކުދިން، ވަގުތީގޮތުން ފޮސްޓަރ ކުރުމަށް ބޭނުންވާ މީހުންނަށް އެ ފުރުސަތު ހުޅުވާލައިފި
ކުއްޖާގެ އުމުރުން 18 އަހަރު ހަމަވުމާ ހަމައަށް ގާނޫނީ ބެލެނިވެރިކަން ހަވާލުކުރެވޭނެ
ޗައިލްޑް އެންޑް ފެމިލީ ޕްރޮޓެކްޝަން ސަރވިސްއިން ކުރިއަށް ގެންދިޔަ ޕްރޮގްރާމެއްގެ ތެރެއިން
ދައުލަތުގެ ބެލުމުގެ ދަށުގައި ތިބޭ ކުދިން، ވަގުތީ ގޮތުން ފޮސްޓަރ ކުރުމަށް ބޭނުންވާ މީހުންނަށް އެ ފުރުސަތު، އިޖުތިމާއީ އަދި އާއިލީ ތަރައްގީއާބެހޭ ވުޒާރާއިން ހުޅުވާލައިފިއެވެ.
އެ ވުޒާރާއިން މައުލޫމާތު ދިންގޮތުގައި، ތަފާތު އެކި ސަބަބުތަކާހުރެ ދައުލަތުގެ ބެލުމުގެ ދަށަށް ކުދިން ގެނެވެނީ ވަގުތީގޮތުންނެވެ. ނަމަވެސް، އެކި ސަބަބުތަކާހުރެ އެކުދިންގެ އުފަން އާއިލާތަކަށް އަނބުރާ ނުފޮނުވި، މަރުކަޒު ކުރެވުނު ނަމަވެސް، އެ ކުދިންނަށް އާއިލީ ލޯތްބާއި އަޅާލުން ހޯދައިދިނުމުގެ ގޮތުން އެ ކުއްޖާގެ އުފަން އާއިލާ ނޫން އެހެން ފަރާތްތަކާ ހަވާލުކުރުމުގެ ނިޒާމު ނުވަތަ ފޮސްޓަރ ކުރުމުގެ ނިޒާމު ވުޒާރާއިން ވަނީ ގާއިމްކޮށްފައެވެ.
އެގޮތުން، މިހާރުވެސް ދާއިމީ ފޯސްޓަރިންގގެ ތެރެއިން، ކުއްޖާގެ އުމުރުން 18 އަހަރު ހަމަވުމާ ހަމައަށް ގާނޫނީ ބެލެނިވެރިކަން ހަވާލުކުރެވެއެވެ. އަދި ވަގުތީގޮތުން ފޮސްޓަރ ކުރުމަށް ބޭނުންވާ ފަރާތްތަކަށް އެ ފުރުސަތު ލިބޭނެ ކަމަށް އެ ވުޒާރާއިން ބުނެއެވެ.
އިޖުތިމާއީ އަދި އާއިލީ ތަރައްގީއާބެހޭ ވުޒާރާއިން ހާމަކޮށްފައިވާ ތަފާސް ހިސާބުތަކަށް ބަލާލާއިރު، މިހާރު ދައުލަތުގެ ބެލުމުގެ ދަށުގައި، 18 އަހަރުން ދަށުގެ 169 ކުދިން މަރުކަޒު ކުރެވިފައި އެބަތިއްބެވެ. މި ކުދިން އަނބުރާ އާއިލާއަށް ފޮނުވުމަށް ނުވަތަ އާއިލީ ދިރިއުޅުމެއް އެކުދިންނަށް ހޯދައިދިނުމަށް ކެނޑިނޭޅި މަސައްކަތްތަކެއް ކުރަމުން އަންނަ ކަމަށާއި، ވަގުތީގޮތުން ފޮސްޓަރ ކުރުމުގެ ފުރުސަތު ހުޅުވާލާފައިވަނީ ވެސް އެ ބޭނުމަށް ކަމަށް އެ ވުޒާރާއިން ބުނެއެވެ.
އެވުޒާރާއިން މައުލޫމާތު ދީފައިވާ ގޮތުގައި، ވަގުތީ ގޮތުން ފޮސްޓަރ ކުރުމަކީ، ދައުލަތުގެ ބެލުމުގެ ދަށުގައި ހުރި ކުއްޖަކު ވަގުތީ ގޮތުން ބަލަހައްޓާނެ ފަރާތަކާ ހަވާލުކުރުމެވެ. އެގޮތަށް ހަވާލުކުރެވޭ އެންމެ ކުރު މުއްދަތަކީ 2 އަހަރު ކަމަށް، ވުޒާރާއިން އެކުލަވާލާފައިވާ ގަވާއިދުގައި ވަނީ ކަނޑައަޅާފައެވެ. މުއްދަތެއް ކަނޑައަޅައި، ވަގުތީގޮތުން ކުއްޖާ ބަލަހައްޓާނެ ފަރާތަކާ ހަވާލުކުރުމުގެ ބޭނުމަކީ ކުއްޖާގެ އުފަން އާއިލާގެ ހާލަތު ރަނގަޅުކުރުމަށް ބާރުއަޅައި، ކުއްޖާ އަނބުރާ އާއިލާއާ ހަވާލުކުރެވެންދެން، އާއިލީ ލޯތްބާއި އަޅާލުން ލިބި، އާއިލީ ވެއްޓެއްގައި ދިރިއުޅުމުގެ މަގު ފަހިކޮށްދިނުން ކަމަށް، އާއިލީ ތަރައްގީއާބެހޭ ވުޒާރާއިން މައުލޫމާތުދެއެވެ.
އެގޮތުން، ވަގުތީގޮތުން ފޮސްޓަރ ކުރާ މުއްދަތު ހަމަވާއިރު، އާއިލާގެ ހާލަތު ރަނގަޅުވެ، ކުއްޖާ އަނބުރާ އާއިލާއަށް ނުގެންދެވޭ ހާލަތުގައި، ފޮސްޓަރ ކުރާ މުއްދަތު ހަމަވިޔަސް މުއްދަތު އިތުރުކޮށް، އެ ކުއްޖާ ބަލަހައްޓަމުންދާ ބެލެނިވެރިން ގާތުގައި ބެހެއްޓޭނެ މަގު ވަގުތީ ފޮސްޓަރިންގ ނިޒާމުގެ ތެރެއިން ހަމަޖެއްސޭނެކަމަށް އެ ވުޒާރާއިން ބުނެއެވެ. ހަމައެއާއެކު، ވަގުތީ ފޯސްޓަރިންގގެ ތެރެއިން ގެންދާ ކުދިންގެ ދާއިމީ ގާނޫނީ ބެލެނިވެރިކަމަށް އެދުމުގެ އިޚްތިޔާރު ވެސް ފޮސްޓަރ އާއިލާއަށް ލިބޭނެއެވެ.
ވަގުތީ ފޮސްޓަރިންގއާ ގުޅޭ އިތުރު މައުލޫމާތު ހޯދުމަށް، އިޖުތިމާއީ އަދި އާއިލީ ތަރައްގީއާބެހޭ ވުޒާރާގެ ނަންބަރު 1433ށް ގުޅުމަށް ވަނީ އެދިފައެވެ.
