ބާސެލޯނާގެ ކޯޗު ޒަވީ ހަނާންޑޭޒްއާ މެދު ބައެއް ކުޅުންތެރިން މާޔޫސްވެ، އޭނާ އަށް އޮތް އިތުބާރު ގެއްލެން ފަށައިފި އެވެ.

މިކަން ދުނިޔޭގެ މަޝްހޫރު ބޮޑެތި މީޑިއާތަކުން ވަނީ ޔަގީންކޮށްދީފަ އެވެ. ބާސެލޯނާގެ ކުޅުންތެރިންނާ ހަވާލާދީ އީއެސްޕީއެންގައި ބުނެފައިވަނީ ކުޅުންތެރިންގެ ތެރެއިން ބަޔަކު ދެކެނީ ޒަވީ އަށް ޓީމު ކާމިޔާބީގެ މަގަށް ބަދަލުކޮށްނުލެވޭނެ ކަމަށެވެ. އަދި ޒަވީއާއެކު ކުރިއަށްދާން ބައެއް ކުޅުންތެރިން ބޭނުންނުވާ ކަމަށެވެ. ނަމަވެސް މިއީ ކޮން ކުޅުންތެރިންނެއް ކަމަށް އެއްވެސް މީޑިއާއަކުން ނުބުނެ އެވެ.

އަނެއްބައި މީޑިއާތަކުން ބުނަނީ ޒަވީ ގެންގުޅޭ އުސޫލުތަކާމެދު ފާޅުގައި ހިތްހަމަނުޖެހިގެން އުޅެނީ މަދު ކުޅުންތެރިންތަކެއް ކަމަށެވެ.

މިކަން އެންމެ ބޮޑުވެފައިވަނީ ސްޕެނިޝް ސުޕަކަޕް ފައިނަލުގައި އާދީއްތަ ދުވަހުގެ ރޭ ރެއާލް މެޑްރިޑް އަތުން 4-1އިން ބަލިވުމުންނެވެ.

މި މެޗަށް ފަހު ޒަވީ ވަނީ އޭނާގެ ކޯޗިން ސްޓާފުންނާއި ކުޅުންތެރިންނާއެކު ހާއްސަ ބައްދަލުވުމެއް ބާއްވައިފަ އެވެ. ކޯޗިން ޓީމުގެ ފަރާތުން ރަނގަޅު ކުރަންޖެހޭ ކަންކަން ހުރިކަން ފާހަގަ ކުރަމުން އޭނާ އެދުނީ ކުޅުންތެރިން މިހާރަށްވުރެ ގަޔާވެގެން، ގަދައަޅައި މަސައްކަތްކޮށްދިނުމަށެވެ. ނަމަވެސް މި ބައްދަލުވުމަށްފަހު ބައެއް ކުޅުންތެރިންގެ ފަރާތުން ނުރުހުން ފެނުނު ނަމަވެސް މުޅި ޓީމުގެ ފަރާތުން ލިބޭ އެއްބާރުލުމަށް ޒަވީ ހިތްހަމަޖެހޭ ކަމަށް ވެސް ސްޕޭނުގެ ނޫސްތަކުން ބުނެ އެވެ.