ހިދުމަތުން ދުރުވެފައިވާ ސިއްހީ ހިދުމަތްތެރިން އަނބުރާ ހިދުމަތަށް ނެރުމަށް އެކުލަވާލާފައިވާ އުސޫލު އިފްތިތާހުކޮށްފި
ޞިއްޙީ ދާއިރާގައި މިހާރު މަސައްކަތްކުރާ ފަންނީ މުވައްޒަފުންގެ ތެރެއިން %56 އަކީ ބިދޭސީން މުވައްޒަފުން
ޚިދުމަތުން ދުރުވެފައިވާ ޞިއްޚީ ޚިދުމަތްތެރިން އަނބުރާ ޚިދުމަތަށް ނެރުމަށް އެކުލަވާލާފައިވާ އުސޫލު އިފްތިތާޙްކުރުން
އެކިއެކި ސަބަބުތަކަށްޓަކައި ޚިދުމަތުން ދުރުވެފައިވާ ޞިއްޙީ ޚިދުމަތްތެރިން، އަނބުރާ ޚިދުމަތަށް ނެރުމަށް އެކުލަވާލާފައިވާ އުސޫލު އިފްތިތާޙްކޮށްފިއެވެ.
މިކަމަށްޓަކައި ބުދަ ދުވަހު މިނިސްޓްރީ އޮފް ހެލްތުގައި ބޭއްވި ޚާއްސަ ރަސްމިއްޔާތެއްގައި މިއުސޫލު އިފްތިތާހްކޮށްދެއްވި ދިވެހިރާއްޖޭގެ ނާއިބް ރައީސް އަލްއުސްތާޛު ހުސައިން މުޙައްމަދު ލަތީފު އެވެ.
މިނިސްޓްރީ އޮފް ހެލްތާއި ސިވިލް ސަރވިސް ކޮމިޝަން ގުޅިގެން އެކުލަވާލާފައިވާ މި އުޞޫލްގެ ދަށުން ޚިދުމަތުން ދުރުވެފައިވާ ޞިއްޙީ ޚިދުމަތްތެރިން އަނބުރާ ޚިދުމަތަށް ނެރުމަށް މަގުފަހި ކޮށްދިނުމަށްޓަކައި، އެފަރާތްތަކުގެ ދަފުތަރެއް މިނިސްޓްރީގައި އެކުލަވާލާ، އެފަރާތްތަށް ވަޒީފާއަށް ނެރުމުގެ މަސައްކަތް ކުރިއަށްދާނެއެވެ.
ހެލްތް މިނިސްޓްރީން މައުލޫމާތު ދޭ ގޮތުގައި މި އުޞޫލުގެ ތެރެއިން ދަފްތަރުގައި ރެޖިސްޓްރީކުރެވި ޞިއްޙީ ޚިދުމަތްތެރިން މެރިޓް އުސޫލުން (ތަޢުލީމު، ތަޖުރިބާ އަދި ހުނަރަށް ބަލައި) "ޞިއްޙީ ދާއިރާއަށް ޙާއްޞަ ޑައިރެކްޓް ރެކްރޫޓްމެންޓް"ގެ ދަށުން ވަޒީފާ ހަމަޖެއްސުމުގެ އިންތިޒާމު ހަމަޖެހޭނެއެވެ.
މި އުޞޫލުގެ ދަށުން ޚިދުމަތުން ދުރުވެފައިތިބި ފަންނީ މުވައްޒަފުން ޚިދުމަތަށް ނެރެވިއްޖެނަމަ، ޚިދުމަތް މެދުކެނޑުމަށް ދިމާވާ ޙާލަތްތަކުގައި ލުއިފަސޭހަކޮށް މަސައްކަތް ކުރުމަށް ބޭނުންވާ ފަރާތްތައް މެދުވެރިކޮށް ޚިދުމަތް މެދުނުކެނޑި ފޯރުކޮށްދިނުމަށް މަގުފަހިވެގެން ދާނެކަންވެސް މިނިސްޓްރީން ފާހަގަކޮށްފައިވެއެވެ.
މިނިސްޓްރީން މައުލޫމާތު ދޭ ގޮތުގައި ޞިއްޙީ ދާއިރާގައި މިހާރު މަސައްކަތްކުރާ ފަންނީ މުވައްޒަފުންގެ ތެރެއިން %56 އަކީ ބިދޭސީން މުވައްޒަފުންނެވެ.
