ވެރިކަން ކުރާ ޕްރޮގްރެސިވް ކޮންގްރެސް ކޯލިޝަނުގައި ހިމެނޭ ޕީޕީއެމް/ޕީއެންސީގެ ފަރާތުން މަޖިލީހަށް ވާދަކުރާނެ ކެންޑިޑޭޓުން ކަނޑައެޅުމަށް ބާއްވާ ޕްރައިމަރީ ދެވަނަ ފަހަރަށް ފަސްކޮށްފިއެވެ.

ދެވަނަ ފަހަރަށް ފަސްކުރިކަން ހާމަކޮށް ޕީޕިއެމުން ބުނީ ޕްރޮގްރެސިވް ކޮންގްރެސް ކޯލިޝަންގެ ރައްޔިތުން މަޖިލީހުގެ ޕްރައިމަރީ ޖަނަވަރީ 27 ގައި ބާއްވާ ގޮތަށް ހަމަޖައްސައި، ވޯޓު ލެވޭ މީހުންގެ ލިސްޓު ޢާންމު ކޮށްފައިވާ ކަމަށެވެ.

2024 ވަނަ އަހަރު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ އިންތިޚާބުގައި ޕްރޮގްރެސިވް ކޮންގްރެސް ކޯލިޝަންގެ ފަރާތުން ވާދަކުރާ ކެންޑިޑޭޓުން ކަނޑައެޅުމަށް ބާއްވާ ޕްރޮގްރެސިވް ކޮންގްރެސް ކޯލިޝަންގެ ޕްރައިމަރީ 2024 ޖަނަވަރީ 27 ވާ ހޮނިހިރު ދުވަހަށް ފަސްކުރެވިފައިވާ ކަމަށާއި، އަދި މި ޕްރައިމަރީގައި ވޯޓު ލެވޭ އެ ކޯލިޝަންގެ މެންބަރުންގެ ލިސްޓް ވަނީ ވެބްސައިޓްގައި ޢާންމު ކުރެވިފައި ކަމަށެވެ.

އެހެންކަމުން ވޯޓު ލެވޭ މީހުންގެ ލިސްޓުގައި އެއްވެސް މައްސަލައެއް ފާހަގަކުރެވިފައިވާނަމަ، މައްސަލައިގެ ތަފްސީލާއެކު ލިޔުމުން ބުރާސްފަތި ދުވަހުގެ އިރުއޮއްސި 6:00 ގެ ކުރިން ޕީއެންސީ އޮފީސް އަށް ނުވަތަ މެއިލްއަށް ފޮނުއްވައިދިނުމަށް ވަނީ އެދިފައެވެ.

ޕީޕީއެމް/ޕީއެންސީން ޕްރައިމަރީ ބާއްވަން ފުރަތަމަ ކަނޑައެޅި ތާރީހަކީ މިދިޔަ ޑިސެމްބަރު މަހުގެ 23 ގައެވެ. ނަމަވެސް ފަހުން ޖެނުއަރީ މަހުގެ 20 ވަނަ ދުވަހަށް ތާރީހު ފަސްކުރިއެވެ. އަދި އެފަހުން މި މަހުގެ 27 ވަނަ ދުވަހަށް ވަނީ ފަސްކޮށްފައެވެ.

ޕީޕީއެމް/ޕީއެންސީގެ އާންމު މެންބަރުން ހިމެނޭކަމަށް ބުނާ ލިސްޓެއް އެ ކޯލިޝަނުން އާންމު ކުރި އިރު، އޭގައި މީހުންގެ ފޯނު ނަންބަރުތައް ހުރުމުން ފާޑުކިއުންތައް އަމާޒުވިއެވެ. އަދި ފަހުން ވަނީ ނަންބަރުތައް ނުފެންނަ ގޮތަށް އެ ބަދަލު ގެނެސްފައެވެ.

މިފަހަރު ޕްރައިމަރީ ލަސްވި ސަބަބެއް އެ ކޯލިޝަނުން ހާމައެއް ނުކުރެއެވެ. ނަމަވެސް ޕްރައިމަރީއާއި ގުޅިގެން މެންބަރުންނާއި ކުރިމަތިލާ ކެންޑިޑޭޓުންގެ ގިނަ ޝަކުވާތަކެއް ހުރިކަމުގެ މައުލޫމާތު ލިބެއެވެ.