"އިންޒާރަކާނުލައި ވަޒީފާއިން ކަނޑާލިއިރު އަނބިމީހާ އިނީ ބަލިވެ، ހުރީ ބަލި ބައްޕައެއް!"
ދިއްދޫން އެކަނިވެސް 50ށްވުރެ ގިނަ މީހުން ވަނީ ކަނޑާލާފައި
ފެނަކައިން މުވައްޒަފުން ކަނޑާލުން
ކުއްލިއަކަށް އައި ލިއުމަކާއެކު، ފެނަކައިގެ ގިނަ އަދަދެއްގެ މުވައްޒަފުން އެއްފަހަރާ ކަނޑާލުން ވެގެން ދިޔައީ އެތައް އާއިލާއެއް ބިކަކޮށްލި ކަމަށެވެ. ވަކިކުރި މުވައްޒަފުންގެ ތެރޭގައި ހިމެނެނީ ކޮންޓްރެކްޓް މުވައްޒަފުން ކަމަށްވާއިރު، ސަރުކާރުން ބުނަނީ ކުރާނެ މަސައްކަތެއް ނެތި، މަސައްކަތް ހުއްޓިފައި ހުރުމުން މުވައްޒަފުން ކަނޑާލީ ކަމަށެވެ. އެހެންނަމަވެސް އެ މުވައްޒަފުންނާމެދު އަމަލުކުރި ގޮތުން އެ މުވައްޒަފުންގެ ހުރި ކަންބޮޑުވުންތައް އިންތިހާއަށް ބޮޑެވެ.
ރިޔާސީ ކެމްޕޭންގެ ފުރަތަމަ ދުވަހުވެސް މި ސަރުކާރުން ދެއްކި ވާހަކައަކީ އެއްވެސް އާއްމު މީހަކު ވަޒީފާއިން ނުކަނޑާނެ ވާހަކައެވެ. ރައީސްވެސް އެހެން ބޭފުޅުން ވެސް ތަކުރާރުކުރެއްވި ވާހަކައަކީ އެއެވެ. އެހެންނަމަވެސް ކަން ވެގެން ދިޔައީ އެހެނެއް ނޫނެވެ. ރިޔާސީ އިންތިޚާބު ކާމިޔާބުކޮށް، ވެރިކަމަށް އައި ފުރަތަމަ ހަފުތާގައި ވެސް ފެނަކައިގެ ބައެއް މުވައްޒަފުންނަށް ގޭގައި މަޑުކޮށްލަން އެންގިއެވެ. އޭގެތެރޭން ބައެއް މީހުންނަށް ފަހުން މަސައްކަތަށް ނުކުންނަން ވަނީ އަންގާފައެވެ.
ވަކިކޮށްފައިވާ މުވައްޒަފުން މިހާތަނަށް މަސައްކަތްކުރަމުން އައީ ކޮންޓްރެކްޓް އާކުރާ ގޮތަށް، ތަފާތު އެކި ޕްރޮޖެކްޓްތަކުގައި ކަމަށް އެ މުވައްޒަފުން ބުނެއެވެ. ކަނޑާލާފައިވާ މުވައްޒަފުންގެ ތެރޭގައި އެންމެ ގިނައީ ހއ. ދިއްދޫގައި މަސައްކަތްކުރާ މީހުންނެވެ. އަދި ހދ. ކުމުންދޫން ވެސް ބައެއް މުވައްޒަފުން ވަނީ ވަކިކޮށްފައެވެ. އެގޮތުން ދިއްދޫން 50އަށްވުރެ ގިނަ މުވައްޒަފުން ކަނޑާލާފައިވާއިރު، ކުމުންދޫން 7 މުވައްޒަފުން ވަނީ ކަނޑާލާފައެވެ. އެނގިފައިވާގޮތުން، ކަނޑާލާފައިވާ މުވައްޒަފުންގެ ތެރޭގައި އެގްރީމެންޓް ހަމަވެފައިވާ މުވައްޒަފުންނާއި، އެގްރީމެންޓް ހަމަނުވާ މުވައްޒަފުންވެސް ހިމެނެއެވެ. ގިނަ އަަދަދެއްގެ މުވައްޒަފުން އެއްފަހަރާ ފެނަކައިން ކަނޑާލާފައިވާއިރު، އެކަމާގުޅޭ ބަހެއް ހޯދާލުމަށް ފެނަކައާ ގުޅުމަށް ކުރި މަސައްކަތް ވަނީ އަދި ކާމިޔާބު ވާގޮތް ނުވެފައެވެ. އެހެންނަމަވެސް މިކަމާމެދު ފެނަކައިގެ އެމްޑީ ވަނީ ޓްވީޓެއް ކުރައްވާފައެވެ.
ވަޒީފާއިން ވަކިކޮށްފައިވާ އެކަކު ބުނީ އެ މީހުން ވަކިކުރަން އެންގީ އެއްވެސް އުސޫލެއް ނެތި ކަމަށް ގަބޫލުކުރާ ކަަމަށެވެ. އަދި ކުއްލިއަކަށް ވަޒީފާއިން ވަކިކުރުމުން މުޅި އާއިލާ ބިކަވެފައިވާ ކަމަށް އޭނާ ވަނީ ބުނެފައެވެ.
ރާއްޖެ ޓީވީއާ ވާހަކަދެއްކި އެހެން މީހަކު ބުނީ، ކުއްލިއަކަށް އޭނާގެ ވަޒީފާ ގެއްލުމުން ހުރީ ޝޮކެއްގައި ކަމަށެވެ. އާއްމު މީހަކު ބަނޑުފުރާނަ މުއްތިކުރަން އަދާކުރާ ވަޒީފާއެއް، ދުވަހުގެ އިރުއޮއްސޭއިރު ގެއްލުމަކީ އާދައިގެ ކަމެއްގެ ގޮތުގައި ނުދެކޭކަަމަށް އޭނާ ވަނީ ބުނެފައެވެ. މިހާތަނަށް އެ މުވައްޒަފުން މަސައްކަތް ކުރަމުން އައީ ކޮންޓްރެކްޓް އާ ކޮށްދޭގޮތަށް ކަމަށް ވާއިރު، ކޮންޓްރެކްޓް އާނުކުރާނެކަން އަންގާފައި ނުވާކަމަށާއި، މުވައްޒަފުން ކަނޑާލީ ކުއްލިއަކަށް ކަމަށް އޭނާ ވަނީ ބުނެފައެވެ. އަދި އެކަމާ ގުޅިގެން، ދިއްދުއާއި ކުމުންދޫގައި އެ މުވައްޒަފުން ވަނީ ނުރުހުން ފާޅުކޮށް މުޒާހަރާވެސް ކޮށްފައެވެ.
ވަޒީފާއިން ވަކިކުރި އިތުރު މީހަކު ބުނީ މިއީ އޭނާއާއި އާއިލާއަށް ލިބުނު ވަރަށް ބޮޑު އަނިޔާއެއް ކަމަށެވެ. އޭނާއަކީ ބަލި ބައްޕައެއް ހުރި މީހެއް ކަމަށާއި، އޭނާގެ އަނބިމީހާ އިނީ ވިހަން ކައިރިވެފައި ކަމަށް އޭނާ ވަނީ ބުނެފައެވެ. އޭނާ ބުނީ އަބަދުވެސް ކޮންޓްރެކްޓް އާކުރަމުން އައުމުން، މަސައްކަތްތައް ނުނިމެނީސް ވަކިކުރާނެ ކަމަށް އެއްވެސް މީހެއްގެ ވިސްނުމުގައި ނެތް ކަމަށެވެ.
ފެނަކައިން އެއްފަހަރާ ގިނަ އަދަދަދެއްގެ މުވައްޒަފުން ކަނޑާލާފައިވާއިރު، އެކަމާމެދު އަދި ފެނަކައިން އެއްވެސް އެއްޗެއް ނުބުނެއެވެ. މީގެ ކުރިން ހއ. ހޯރަފުށިން ވެސް ފެނަކައިން ބަޔަކު ކަނޑާލިއެވެ. ނަމަވެސް ފަހުން އެ މީހުން ވަނީ އަލުން ވަޒީފާއަށް ނެރެފައެވެ. ހއ. ދިއްދޫ ފެނަކަ މުވައްޒަފުންގެ ކޮންޓްރެކްޓް އައުނުކުރުމަށް ނިންމީ މަސައްކަތް ހުއްޓިފައި އޮތުމުން ކަމަށް ފެނަކައިން ވަނީ ބުނެފައެވެ. ނަމަވެސް ކޮންޓްރެކްޓް ހަމަނުވާ މުވައްޒަފުން ވެސް ވަކިކޮށްފައިވާކަން، ރާއްޖެ އެމްވީއަށް ލިބިފައިވާ ލިޔުންތަކުން އެނގެއެވެ.
