ކްރެޑިޓް ނެގުމާއި، ނަންވުމުގައި އެއްވަނައިގެ ސަރުކާރެއް!

ކޮންމެ ސަރުކާރަކުން ވެސް އެ ސަރުކާރުގެ އަމިއްލަ ސިޔާސަތުތަކެއް ގެންގުޅެއެވެ. ހަމައެގޮތަށް އެއް ސަރުކާރަކުން އަނެއް ސަރުކާރަކަށް ދެމިގެންދާ ކަންކަން ވެސް ހުރެއެވެ. އެހެންކަމަށް ވާއިރު، ވަކި ސަރުކާރަކާ ގުޅުމެއް ނެތް ކަންކަން ވެސް ހުރެއެވެ. ސިއްހީ ކަންކަމާއި ތައުލީމީ މަސައްކަތްތައް ފަދަ ކަންކަމަކީ ކޮންމެ ވެރިކަމެއް އޮތަސް ކުރިއަށްދާ ކަންކަމެވެ.

މި ސަރުކާރު ފާހަގަކުރެވެނީ ހުރިހާ ކަމެއްގެ ކްރެޑިޓް ނަގާ ސަރުކާރެއްގެ ގޮތުގައި ކަމަށް، ފާޑުކިޔާ ފަރާތްތަކުން ފާހަގަކުރެއެވެ. އެގޮތުން މި ސަރުކާރުން ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުން ކޮށްފައިވާ ކަންކަމުގެ ކްރެޑިޓް ނަގަން ވަރަށް ބޮޑަށް މަސައްކަތް ކުރާކަމަށް، ކުރީގެ ފިނޭންސް މިނިސްޓަރު އިބްރާހީމް އަމީރު ވަނީ ވިދާޅުވެފައެވެ. ކޮންމެ ސަރުކާރެއް ބަދަލުވާއިރު ވެސް ތަރައްްގީގެ މަޝްރޫއުތައް ނުނިމި ހުރެއެވެ.

ހިނގަހިނގައި ހުންނަ މަޝްރޫއުތައް ނިންމާއިރު ސަރުކާރުގެ އިސް ބޭފުޅުން ދައްކާ ވާހަކަތަކުން ހީވަނީ އެއީ މިވީ ދޮޅުމަހެއްހާ ދުވަހުގެ ތެރޭގައި، މި ސަރުކާރުގެ އިސްނެގުމާއެކު ކޮށްފައިވާ ކަންކަން ހެންނެއެވެ. އެކަން ފާހަގަކުރައްވައި، މިހާތަނަށް ރައީސް މުއިއްޒުގެ ސަރުކާރަށް އައު ކަމެއް ނުކުރެވޭ ކަމަށާއި، މި ސަރުކާރުން މިހާތަނަށް އިއުލާންކުރި ހުރިހާ ކަމަކީ ވެސް އެމްޑީޕީގެ ސަރުކާރުން ފެށި ކަންކަން ކަމަށް، ކުރީގެ ރައީސް އަދި އެމްޑީޕީގެ ރައީސް އިބްރާހީމް މުހައްމަދު ސާލިހު ވެސް ވަނީ ދާދިފަހުން ވިދާޅުވެފައެވެ.

މި ސަރުކާރުން ފަށާފައި ހުރި ކަންކަމުގެ ކްރެޑިޓް ނުދީ، އެކަންކަމަކީ މި ސަރުކާރުން ކުރާ ކަންކަމުގެ ގޮތުގައި ދެއްކުމަށް މަސައްކަތްކުރާ ސަރުކާރެއްގެ ގޮތުގައެވެ. ނިމިދިޔަ ސަރުކާރުގައި އެކިއެކި މިނިސްޓްރީތަކުން ކޮށްފައި ހުރި މަސައްކަތްތަކުގެ ތެރޭގައި ކަންކަން ރޭވި ތަރުތީބުވެފައި ހުރިނަމަވެސް، މި ސަރުކާރުން އެކަންކަން ކުރަނީ އައު ނަންނަމުގައެވެ. އަދި ތަންފީޒީ މަރުހަލާއާ ހަމައަށް ގޮސްފައިވާ ކަންކަން ކުރިއަށްދާއިރު، ކުރީ ސަރުކާރުގެ ނަން ވެސް ކިޔާލުމެއް ނެތެވެ.

އޭގެ ތެރޭގައި ސިއްހީ ދާއިރާއާއި ތައުލީމީ ދާއިރާގެ ކަންކަން ހިމެނެއެވެ. ބައެއް މިސާލުތަކަށް ބަލައިލާނަމެވެ. އެންމެ ފަހުން އެއަރޕޯޓުގައި ހުޅުވި ކާގޯ ޓަރމިނަލަކީ ކުރީ ސަރުކާރުން ފެށި ކަމެކެވެ. އެ މަސައްކަތުގެ ފުރިހަމަ ކްރެޑިޓް ނެގީ މި ސަރުކާރުންނެވެ. އެއީ މި ސަރުކާރުން ކުރިކަމެއްގެ ގޮތުގައި ދެއްކިއެވެ. ބޯން މެރޯ ހެދުންކަމަށް ވިޔަސް، ޑްރޯނުގައި ބޭސް އުފުލުން ކަމަށް ވިޔަސް ހަމަ އެފަދައެވެ. ކުޑަކޮށް ނަމާއި ހިންގުން ތަފާތުކޮށް، މުޅިން އައު ކަމެއްގެ ގޮތުގައި އެކަން ދައްކައެވެ. އަދި އިސް ރަށްވެހިންނަށް މާލޭގައި އިޖުތިމާއީ މަރުކަޒެއް ގާއިމްކޮށްދިނުން ވެސް މިއީ އައު ކަމެއް ނޫނެވެ. ސީރިއާއަށް ހަނގުރާމައަށް ދިޔަ މީހުން އަނބުރާ ގެނައުމުގެ މަސައްކަތް ވަރަށް ބާރަށް ނިމިދިޔަ ސަރުކާރުން ކުރިއެވެ. ކަންދިމާކުރި ގޮތުން އެކަމުގެ އަމަލީ ސިފަ ޖެހުނީ މި ސަރުކާރުގައެވެ. އެހެންނަމަވެސް އެކަމުގެ ފުރިހަމަ ކްރެޑިޓް ނެގީ ސަރުކާރުންނެވެ.

މިހެން އަދި ދަންނަވާނުލެވޭ ކިތަންމެ ކަމެއް ހުންނާނެކަން ގައިމެވެ.