ރެއާލުން ދެއްކީ މޮޅުވުން ހައްގު ކުޅުމެއް: އަންޗެލޮޓީ

ސްޕެނިޝް ސުޕަ ކަޕްގެ ފައިނަލްގައި ރެއާލުން ދެއްކީ މޮޅުވުން ހައްގު ކުޅުމެއް ކަމަށް، އެ ޓީމުގެ ކޯޗު ކާާލޯ އަންޗެލޮޓީ ބުނެފި އެވެ.

ވާދަވެރި ބާސެލޯނާއާ ދެކޮޅަށް ކުޅުނު މެޗު ރެއާލުން ކާމިޔާބު ކުރީ 4-1 އިންނެވެ. މެޗު ފަށައިގެން ރެއާލްގެ ފަރާތުން ވަނީ މޮޅު ކުޅުމެއް ފެނިފަ އެވެ. ބާސެލޯނާ ބަލިކޮށް ރެއާލުން ވަނީ 13 ވަނަ ފަހަރަށް ސްޕެނިޝް ސުޕަ ކަޕްގެ ތަށި އުފުލާލައިފަ އެވެ.

އެ މެޗަށްފަހު ވާހަކަ ދައްކަމުން އަންޗެލޮޓީ ބުނީ، ރެއާލަށް މެޗުން މޮޅުވުން ޙައްޤު ކަމަށެވެ. ޚާއްސަކޮށް އެއީ ފައިނަލަކަށްވުމުން، ރެއާލުން ނުކުތީ ވަރަށް ފުރިހަމަ އަށް ތައްޔާރުވެގެން، ރަނގަޅު ރޫޙެއްގައިކަން ވެސް އޭނާ ވަނީ ފާހަގަކޮށްފަ އެވެ. މެޗުގެ ފުރަތަމަ މިނެޓުން ފެށިގެން، ރެއާލްގެ ފަރާތުން ފެނުނީ މޮޅު ކުޅުމެއް ކަމަށް އޭނާ ބުންޏެވެ. މެޗުގައި ރެއާލުން ދިޔައީ އެ ޓީމަށް ނެގެން ހުރި ހުރިހާ ފައިދާތަކެއް ނަގަމުން ކަމަށް ވެސް އޭނާ ވަނީ ބުނެފަ އެވެ.

އަންޗެލޮޓީ ފާހަގަ ކުރި ގޮތުގައި މެޗުގައި ރެއާލްގެ ވިނީޝިއުސް ޖޫނިއާ ދެއްކީ ވަރަށް އާދަޔާޚިލާފު ކުޅުމެކެވެ. އޭނާ ބުނީ އެ މެޗުގައި ވިނީޝިއުސް ހުރީ މުޅިން އެހެން ފެންވަރެއްގައި ކަމަށާއި، އެކަމުގަ ފައިދާ ރެއާލަށް ހުރިހާ ގޮތަކުން ވެސް ކުރި ކަމަށެވެ. ނަމަވެސް މެޗުގައި ބާސެލޯނާ އިން ވެސް ރަނގަޅު ކަންތައްތަކެއް ކުރިކަމަށް އޭނާ ބުންޏެވެ. އެގޮތުން ބާސެލޯނާ އިން ވެސް އެ ޓީމަށް ލިބެމުން އައި ފުރުސަތުތަކުގެ ބޭނުން ހިފަން މަސައްކަތް ކުރި ކަމަށާއި، ބައެއް ވަގުތުތަކުގައި ރެއާލަށް ކޮންމެ ވެސް ވަރަކަށް އުނދަގޫތަކެއް ކުރިމަތިވި ކަމަށް އޭނާ ބުންޏެވެ.

އޭނާ ބުނީ މެޗުން މޮޅުވެ، ރެއާލަށް ތަށި ކާމިޔާބު ކުރެވުމުން ހިތްހަމަޖެހޭ ކަމަށެވެ. ދެން މަސައްކަތް ކުރާނީ ސީޒަންގެ ބާކީ ހުރި މުބާރާތްތަކަށް ކަމަށާއި، ރެއާލުން ނުކުންނާނީ އަބަދުވެސް އެންމެ ފުރިހަމަ އަށް ތައްޔާރުވެގެން ކަމުގައި އޭނާ ބުންޏެވެ. އޭނާ ދެކޭ ގޮތުގައި ރެއާލަށް ކުރިއަށް ދިޔުމަށް އަބަދު ވެސް ލިބޭ އެންމެ ބޮޑު ހިތްވަރަކީ އެ ޓީމުގައި ތިބި ތަޖުރިބާކާރު ކުޅުންތެރިންނާއި ޒުވާން ކުޅުންތެރިންގެ މަސައްކަތެވެ.