ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ އިލެކްޓޯރަލް ކޯޑުގައި ބުނެފައިވާ އެޕީލް ކޮމެޓީ އެކުލަވާލެވައިފައި ނެތް ކަމަށް، އެ އެސޯސިއޭޝަނުން އެއްބަސްވެއްޖެ އެވެ.
އެފްއޭއެމުން ހޯމަ ދުވަހުގެ ރޭ ނެރުނު ބަޔާނެއްގައި ވަނީ އެކަން ހާމަކޮށްފަ އެވެ. އެއީ އެފްއޭއެމްގެ އިންތިޚާބުގައި ވާދަކުރެއްވުމަށް ފޯމު ހުށަހެޅުއްވި ޤައުމީ ޓީމުގެ ކުރީގެ ފޯވާޑް އަޙުމަދު ޠާރިޤް (ޓޮމް) ގެ ކެންޑިޑެންސީ ޞައްޙަ ނޫން ކަމަށް އިލެކްޓޯރަލް ކޮމެޓީން ނިންމި މައްސަލައިގައި، އޭނާގެ ފަރާތުން އިސްތިއުނާފަށް ހުށަހަޅާފައި ވަނިކޮށެވެ. އެފްއޭއެމުން އެކަން އާންމު ކުރުމުގެ ކުރިން ވެސް، މީޑިއާތަކުން ވަނީ އެޕީލްސް ކޮމެޓީއެއް ނެތް ވާހަކަ ރިޕޯޓުކޮށްފަ އެވެ.
އެފްއޭއެމުން ނެރުނު ބަޔާނުގައި ބުނެފައި ވަނީ، އޮންނަން ޖެހޭ އުސޫލުގެ ތެރެއިން އިންތިޚާބީ އެޕީލްސް ކޮމެޓީއެއް އެކުލަވާލެވިފައި ނެތް ކަމަށެވެ. އެޕީލްސް ކޮމެޓީ އަކީ އެފްއޭއެމްގެ ކޮންގްރެސްއަކުން އިންތިޚާބު ކުރަން ޖެހޭ ކޮމެޓީއެކެވެ. އެހެން ނަމަވެސް، އެންމެ ފަހުން އެފްއޭއެމުން ބޭއްވި ކޮންގްރެސްގައި އެ ކޮމެޓީ އިންތިޚާބުކޮށްފައެއް ނުވެ އެވެ. އެހެންވެ، ޓޮމް ހުށަހެޅި މައްސަލައިގައި ގޮތެއް ނުނިމި، އެފްއޭއެމުން ވަނީ ދުނިޔޭގެ ފުޓުބޯޅައިގެ މައި އިދާރާ (ފީފާ) އަދި ސަރަހައްދީ ފުޓުބޯޅަ އިދާރާ (އޭއެފްސީ) ލަފަޔަކަށް އެދިފަ އެވެ.
ޓޮމްގެ އިތުރުން އިންތިޚާބުގައި ވާދަކުރެއްވުމަށް ފޯމު ހުށަހެޅުއްވީ ކުލަބު އީގަލްސްގެ ވައިސް ޗެއާމަން މުފާވިޒް ހާޝިމް (މުފާ) އެވެ. ނަމަވެސް އިލެކްޓޯރަލް ކޮމެޓީން ނިންމީ ޓޮމްގެ ޝަރުތު ހަމަނުވާ ކަމަށެވެ. އެއީ އޭނާގެ އަތުގައި އޮތް ކުލަބު ވެލެންސިއާގެ ތާއީދު ސިޓީ ބާތިލު ކުރަން ނިންމުމުންނެވެ. އެ ސިޓީ ބާތިލު ކުރުމަށް ކޮމެޓީން ނިންމީ، ވެލެންސިއާ އިން ދެ ކެންޑިޑޭޓުންނަށް ވެސް ތާއީދު ސިޓީ ދީފައިވާތީ އެވެ.
ނަމަވެސް އިލެކްޓޯރަލް ކޮމެޓީގެ ނިންމުން ބަަލައިނުގަނެ، ޓޮމް ވަނީ އެ މައްސަލަ އިސްތިއުނާފަށް ހުށަޙަޅައިފަ އެވެ. އޭގެ އިތުރުން ޓޮމް ވަނީ ފީފާ އަދި އޭއެފްސީގެ ސަމާލުކަމަށް ވެސް އެކަން ގެނެސްފަ އެވެ.
