އިލެކްޓޯރިއަލް ކޮމެޓީގެ ވައިސް ޗެއާ އަހްމީމް އިސްތިއުފާ ދެއްވައިފި

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ އިލެކްޓޯރިއަލް ކޮމެޓީގެ ވައިސް ޗެއާ އަހްމީމް ޢަބްދުއް ރައްޒާޤު އިސްތިއުފާ ދެއްވައިފި އެވެ.

އަހްމީމް ސޮއި ކުރައްވައި، އާދީއްތަ ދުވަހު ވަނީ އޭނާގެ އިސްތިއުފާގެ ސިޓީ އެފްއޭއެމްގެ ވަގުތީ ޖެނަރަލް ސެކްރެޓަރީ މުޙައްމަދު ޖައުޝަން ޝަރީފް (ޖައު) އަށް ފޮނުއްވައިފަ އެވެ. އެ ސިޓީ ވަނީ މި ނޫހަށް ވެސް ލިބިފަ އެވެ.

ކޮމެޓީގައި ހިމެނެނީ ޖުމުލަ ތިން މެމްބަރުންނެވެ. އޭގެ ތެރެއިން އެއް މެމްބަރަކު އިސްތިއުފާ ދިނުމުން، މި ކޮމެޓީގެ ކޯރަމް ހަމައެއް ނުވާނެ އެވެ. އެހެންކަމުން، ދެން ކޮމެޓީގެ ބައްދަލުވުމެއް ނުބޭއްވޭނެ އެވެ. އަހްމީމް އިސްތިއުފާ ދެއްވާފައި ވަނީ، ކޮމެޓީގެ ޞައްޙަ ކަމާމެދު ސުވާލު އުފެދިފައި ވަނިކޮށެވެ. ސަބަބަކީ އެފްއޭއެމްގެ އިލެކްޓޯރަލް ކޯޑު ބުނާ ގޮތުގައި، އެއް މެމްބަރަކަށް ދެ ދައުރު އަދާ ނުކުރެވޭނެތީ އެވެ. ނަމަވެސް، އެފްއޭއެމުން ވަނީ އިލެކްޓޯރަލް ކޯޑާ ޚިލާފަށް، އެއް މެމްބަރުންތަކެއް ދެ ދައުރަށް، އަދި ތިން ވަނަ ދައުރަށް އިންތިޚާބު ކޮށްފަ އެވެ،

އިސްތިއުފާގެ ސިޓީގައި އަހްމީމް ބުނެފައި ވަނީ، އެފްއޭއެމްގެ އިލެކްޓޯރިއަލް ކޮމެޓީގައި އޭނާ ފުރުއްވަމުން ގެންދެވި މަގާމުން އިސްތިއުފާ ދެއްވަން ނިންމާފައިވާ ކަމަށެވެ. އަދި އިސްތިއުފާ ދިނުމަށް ނިންމީ، އެކަމާމެދު ވަރަށް ރަނގަޅަށް ވިސްނުމަށްފަހު ކަމަށް ވެސް އޭނާ ބުންޏެވެ. އިތުރަށް އަހްމީމް ބުނީ، ބައެއް އަމިއްލަ ކަންތައްތަކުގެ ސަބަބުންނާއި، ވަގުތު ހުރި ގޮތުން މަގާމުގެ މަސްއޫލިއްޔަތު ފުރިހަމަ ކުރުމަށް ދަތިތަކެއް ހުރި ކަމަށެވެ.

މީގެ އިތުރުން އަހްމީމް ވަނީ ކޮމެޓީގެ މެމްބަރުންގެ ފަރާތުން ލިބުނު އެއްބާރުލުމާއި، އެހީތެރިކަމަށް ޝުކުރު އަދާ ކުރާ ކަމަށް ބުނެފަ އެވެ. އަދި އޭނާގެ ދައުރުގައި އަދުލުވެރިކަމާއި، އިންސާފުވެރިކަމާއެކު މަސައްކަތް ކުރެވުނު ކަމަށް ޤަބޫލު ކުރާ ކަމަށް ވެސް ބުންޏެވެ. އެހެންކަމުން ކުރިއަށް އޮތް ތަނުގައި އިލެކްޓޯރިއަލް ކޮމެޓީ އެގޮތުގައި ދެމި އޮންނާނެ ކަމަށް އުންމީދު ކުރާ ކަމަށް އޭނާ ވަނީ ބުނެފަ އެވެ. ސިޓީ ނިންމާލަމުން އަހްމީމް ވަނީ، އެފްއޭއެމަށް ކާމިޔާބަށް އެދޭ ކަމަށް ވެސް ބުނެފަ އެވެ.

މި މަހުގެ 31 ވަނަ ދުވަހު ބާއްވަން މަސައްކަތް ކުރަމުން އަންނަ އެފްއޭއެމްގެ އިންތިޚާބާ ގުޅޭ ގިނަ މައްސަލަތަކެއް ވަނީ ފެންމަތިވެފަ އެވެ. އެކަންކަމާއެކު، ކޮމިޝަނަރ އޮފް ސްޕޯޓްސް މުޙައްމަދު ޠަލާލް (ޠަލާ) ވަނީ އެފްއޭއެމްގެ އިންތިޚާބުގެ ކަންކަން މަޑުޖައްސާލުމަށް ވެސް އަންގަވައިފަ އެވެ. ނަމަވެސް، އެފްއޭއެމުން ދަނީ މަސައްކަތް ހުއްޓާލުމެއް ނެތި، އިންތިޚާބުގެ ކަންކަން ކުރިއަށް ގެންދަމުންނެވެ.