ހަމާސް ރޫޅާލުމަށް އިސްރާއީލުން ކުރަމުންދާ ހަނގުރާމަ އެއްވެސް ފަރާތަކަށް ނުހުއްޓުވޭނެކަމުގެ އިންޒާރު ނަތަންޔާހޫ ދީފި

ހަމާސް ރޫޅާލުމަށް އިސްރާއީލުން ކުރަމުންދާ ހަނގުރާމަ އެއްވެސް ފަރާތަކަށް ނުހުއްޓުވޭނެކަމުގެ އިންޒާރު، އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ދީފިއެވެ.

ނަތަންޔާހޫ މި އިންޒާރު ދިނީ، އިސްރާއީލުން ފަލަސްތީނާ ދެކޮޅަށް ޖަރީމާތައް ހިންގަމުންދާކަމަށް ދެކުނު އެފްރިކާއިން ކުރާ ތުހުމަތުތަކާ ގުޅިގެން ދެ ދުވަހުގެ އަޑުއެހުންތައް ބައިނަލްއަގުވާމީ ކޯޓް އޮފް ޖަސްޓިސްގައި ބޭއްވުމަށްފަހުއެވެ.

އިސްރާއީލުން ހަމާސްއާ ދެކޮޅަށް ކުރަމުންދާ ހަނގުރާމަ ކާމިޔާބުވަންދެން ކުރިއަށްގެންދާނެ ކަމަށާއި، (ދުނިޔޭގެ ކޯޓުވެސް ހިމެނޭގޮތަށް) އެއްވެސް ފަރާތަކުން އެކަން ނުހުއްޓުވޭނެ ކަމަށް، ޣައްޒާގައި ހިނގަމުންދާ ހަމަނުޖެހުންތަކަށް 100 ދުވަސް ފުރުމާއެކު ބޮޑުވަޒީރު ބެންޖަމިން ނަތަންޔާހޫ ދިން ހަރުކަށި ތަގުރީރުގައި ވަނީ ބުނެފައެވެ.

ނަތަންޔާހޫގެ ބޮޑާ، ކިބުރުވެރި، ހަރުކަށި އިންޒާރު އައިސްފައި މިވަނީ، އިސްރާއީލުން ފަލަސްތީނާ ދެކޮޅަށް ޖަރީމާތައް ހިންގަމުންދާކަމަށް ދެކުނު އެފްރިކާއިން ކުރާ ތުހުމަތުތަކާއެކު، ބައިނަލްއަގުވާމީ ކޯޓް އޮފް ޖަސްޓިސްގައި ވަގުތީ ފިޔަވަޅެއްގެ ގޮތުން، ޣައްޒާއަށް ވައިގެ މަގުންނާއި އެއްގަމު މަގުން ހަމަލާދިނުން ހުއްޓާލުމަށް އަމުރުކޮށްދިނުމަށް ދެކުނު އެފްރިކާއިން ކޯޓުގައި އެދުމުންނެވެ.

އީރާނާއި އެގައުމުގެ ގުޅިފައިވާ ލަޝްކަރުތަކަށް އިޝާރާތް ކުރައްވައި ނަތަންޔާހޫ ހޮނިހިރު ދުވަހުގެ ރޭ ޓީވީ މެދުވެރިކޮށް ދިން ބަސްދީގަތުމެއްގައި ބުނީ، އެއްވެސް މީހަކަށް އެމީހުން ނުހުއްޓުވޭނެ ކަމަށާއި، މިކަމުގައި އެއްވެސް ނުބައެއް ނެތްކަމަށެވެ.  

ދުނިޔޭގެ ކޯޓުގައި މި މައްސަލަ އެތައް އަހަރެއް ވަންދެން ކުރިއަށްދާނެކަމަށް ބެލެވުނުނަމަވެސް، އިންތިގާލީ ފިޔަވަޅުތަކާމެދު ހަފުތާއެއްހާ ދުވަހުގެ ތެރޭގައި ގޮތެއް ނިންމާނެކަމަށް ބެލެވެއެވެ. ކޯޓުތަކުގެ ހުކުމްތަކަކީ ލާޒިމް، ނަމަވެސް ތަންފީޒުކުރަން އުނދަގޫ ނިންމުންތަކެކެވެ. ނަތަންޔާހޫ ބުނީ ހަނގުރާމަ ހުއްޓާލުމަށް އިސްރާއީލަށް އަންގާ އެންގުންތަކަށް ބޯނުލަނބާނެ ކަމަށާއި، އޭގެ ބަދަލުގައި ހަމަލާތައް އިތުރަށް ވަރުގަދަވެދާނެ ކަމަށެވެ.

ޣައްޒާގައި ފަލަސްތީނުގެ 23،000ށްވުރެ ގިނަ މީހުން ޝަހީދުކޮށް، ވަށާލާފައިވާ އެންކްލޭވްގައި ބޮޑެތި ތަކުލީފުތަކެއް ތަހައްމަލު ކުރަމުންދާ މި ހަނގުރާމަ ނިމުމަކަށް ގެނައުމަށް ބައިނަލްއަގުވާމީ ޕްރެޝަރުތައް އިސްރާއީލަށް ދަނީ ބޮޑުވަމުންނެވެ.

މިދިޔަ ހޮނިހިރު ދުވަހު ވޮޝިންގޓަން، ލަންޑަން، ޕެރިސް، ރޯމް، މިލާން އަދި ޑަބްލިންގެ މަގުތަކަށް އެތައް ހާސް ބަޔަކު ނުކުމެ ހަނގުރާމަ ހުއްޓާލުމަށް ވަނީ ގޮވާލާފައެވެ.

ވައިޓް ހައުސްއަށް އެއްވެ ތިބި މުޒާހަރާގެ ބައިވެރިން ބުނެފައިވަނީ، މި ހަނގުރާމައިގައި އެމެރިކާއިން އިސްރާއީލަށް ތާއީދުކުރާތީ ރައީސް ޖޯ ބައިޑަން ރިޔާސީ ކެންޑިޑޭޓެއްގެ ގޮތުގައި ހުންނެވުމާމެދު ސުވާލު އުފެދޭކަމަށެވެ.

އިސްރާއީލުން ބުނަނީ ހަނގުރާމަ ނިމުމަކަށް ގެނައުމުގެ މާނައަކީ 2007 ވަނަ އަހަރުން ފެށިގެން ޣައްޒާގައި ވެރިކަން ކުރަމުން އަންނަ، އަދި އިސްރާއީލު ހަލާކުކޮށްލުމަށް މަސައްކަތްކުރާ އިސްލާމީ ހަނގުރާމަވެރި ޖަމާއަތެއް ކަމަށްވާ ހަމާސްއަށް ކާމިޔާބު ލިބުން ކަމަށެވެ.

މި ހަނގުރާމަ ފެށުނީ އޮކްޓޯބަރު މަހުގެ 7 ވަނަ ދުވަހު ހަމާސް ޖަމާއަތާއި އެހެނިހެން ހަނގުރާމަވެރިން އިސްރާއީލުގައި ދިން ނުރައްކާތެރި ހަމަލާއެއްގައި 1200އެއްހާ މީހުން މަރާލުމުންނެވެ. އަދި އިތުރު 250އްހާ މީހުން ރަހީނުކޮށްފައި ވާއިރު، ބައެއް މީހުން ވަނީ ދޫކޮށްލާފައެވެ. އަދި ރަހީނުކުރި ބައެއް މީހުންނަށް ވީގޮތެއް ކަށަވަރުވެފައި ނުވާއިރު، ދެބައިކުޅަ އެއްބަޔަށްވުރެ ގިނަ މީހުން އަދިވެސް ތިބީ ބަންދުގައި ކަމަށް ބެލެވެއެވެ.

އާދީއްތަ ދުވަހަކީ ޣައްޒާ ހަނގުރާމައަށް 100 ދުވަސް ފުރޭ ދުވަހެވެ.