އެމްޑީޕީ ސަރުކާރުން ރައްޔިތުންނަށް ދިން ގޯތިތައް ހޯދައިދިނުމަށް ކޯޓަށް ދާން ޖެހިއްޖެނަމަ ކޯޓަށްވެސް ދާނަން: އާޒިމް
އާޒިމް ވިދާޅުވީ، މޭޔަރުކަމުގެ މަޤާމުގައި ކުރައްވަން ހުރި ކަންކަން ނުހަނު ގިނަ ކަމަށް
މާލޭ ސިޓީ މޭޔަރުކަމުގެ އިންތިޚާބު ކާމިޔާބު ކުރެއްވި އާދަމް އާޒިމް
އެމްޑީޕީ ސަރުކާރުން މާލޭގެ ރައްޔިތުންނަށް ދިން ގޯތިތައް ކަށަވަރުކުރުމަށް ކޯޓަށް ވަޑައިގަންނަވަން ވެސް ތައްޔާރުކަމަށް މާލޭ ސިޓީ މޭޔަރުކަމުގެ އިންތިޚާބު ކާމިޔާބު ކުރެއްވި އާދަމް އާޒިމް ވިދާޅުވެއްޖެއެވެ.
އާޒިމް ވިދާޅުވީ، މޭޔަރުކަމުގެ މަޤާމުގައި ކުރައްވަން ހުރި ކަންކަން ނުހަނު ގިނަ ކަމަށެވެ. އެގޮތުން މާލޭގެ ރައްޔިތުންނަށް ދިމާވެފައިވާ މައްސަލަތަކުން ސަލާމަތްވުމަށް ރައްޔިތުން ވެސް ތިބީ ކެތްމަދުވެފައިކަމަށް އާޒިމް ވިދާޅުވިއެވެ.
އާޒިމް ވިދާޅުވީ، މިސްކިތްތައް ސާފުތާހިރު ކުރުމާއި، މާލެ ސާފު ތާހިރު ކުރުމާއި، ޕާކިންގ މައްސަލަ ޙައްލު ކުރުން ފަދަ ކަންކަމަކީ ބޮޑު އަހައްމިއްޔަތުކަމެއް ދެއްވައިގެން ކުރައްވާނެ ކަމެއް ކަމަށެވެ.
މި ކަންކަމުގެ ތެރެއިން ވެސް އެންމެ ބޮޑު ކަމަކީ ގެދޮރުވެރިކަމުގެ މައްސަލަކަން އާޒިމް ފާހަގަ ކުރެއްވިއެވެ.
އާޒިމް ވިދާޅުވީ، ފްލެޓުތައް ހައްޤުވެރިންނަށް ހޯދައިދީ، ދަފްތަރުގައި ޖެހިފައިވާ މީހުންގެ ޙައްޤުތައް ހޯދައިދިނުމަށް ވެސް މަސައްކަތް ކޮށްދެއްވާނެކަމަށެވެ.
ކުރިއަށް އޮތް މަޖިލިސް އިންތިޚާބަކީ އެ މަސައްކަތަށް ނުހަނު މުހިއްމު އިންތިޚާބަކަށް ވެގެންދާނެކަމަށް އާޒިމް ވިދާޅުވިއެވެ.
އާޒިމް ވިދާޅުވީ އެމްޑީޕީއަކީ އަބަދުވެސް ޤާނޫނީ އިމުގެ ތެރެއިން ކަންކަން ކުރުމަށް އިސްކަންދޭ ޕާޓީއެއްކަމަށެވެ. ޤާނޫނީ އިމުގެ ތެރެއިން ކުރަންޖެހޭ ކަންކަން ކުރުމަށް މަޖިލިސް އިންތިޚާބުވެސް މުހިއްމުކަން އާޒިމް ފާހަގަ ކުރެއްވިއެވެ.
އޭގެ އިތުރުން، ގޯއްޗާއި ފްލެޓު ދިނުމުގެ ކަންކަމުގައި ކޯޓަށް ދާން ޖެހިއްޖެނަމަ އެކަން ވެސް ކުރައްވާނެކަމަށް އާޒިމް ވިދާޅުވިއެވެ.
އާޒިމް ވިދާޅުވީ އަބަދުވެސް އެންމެ އިސްކަމެއް ދެއްވާނީ އެންމެ އަވަހަށް ބޯހިޔާވަހިކަމުގެ މައްސަލަތައް ޙައްލު ކުރެވޭނެ ގޮތެއް ހޯދައިދިނުމަށްކަމަށެވެ.
އާޒިމް ވަނީ އެމްޑީޕީ ސަރުކާރުން ގޯއްޗާއި ފްލެޓް ދިނުމަށް ކަނޑައަޅާފައިވާ ތަންތަނުން މިސަރުކާރުން ގޯއްޗާއި ފްލެޓް ދިނުމަށް ގޮވާލައްވާފައެވެ. އަދި އެކަން އެމަގުން ކުރުމަށް ކުރެވެން ހުރިހުރިހާ މަސައްކަތެއް ކުރައްވާނެކަމަށް އާޒިމް ވިދާޅުވިއެވެ.
