ޖަރުމަނު ލީގުގައިި އޮގްސްބާގާ ދެކޮޅަށް ކުޅުނު މެޗުން، ފަހު ވަގުތު މޮޅުވެ ބަޔާ ލެވަކޫސަން އިން އެއް ވަނައިގައި ލީޑު ފުޅާ ކޮށްފި އެވެ.

ލީގުގައި ހޮނިހިރު ދުވަހުގެ ރޭ އޮގްސްބާގުގެ ދަނޑުގައި ކުޅުނު މެޗު، ލެވަކޫސަން އިން ކާމިޔާބު ކުރީ 1-0 އިންނެވެ. މެޗުގެ ފުރަތަމަ ހާފުގައި ވެސް ލެވަކޫސަން އިން ވަނީ ލަނޑު ޖަހާނެ ފުރުސަތުތައް ތަނަވަސްކޮށްފަ އެވެ. މެޗުގެ ފުރަތަމަ ހާފުގައި އެ ޓީމަށް ލީޑު ނަގައިދޭން އެންމެ ތަނަވަސް ފުރުސަތެއް ލިބުނީ، ފޯވާޑް ޕެޓްރިކް ޝިކް އެވެ. އަނެއްކޮޅުން އޮގްސްބާގަށް ވެސް ވަނީ ލަނޑު ޖަހާނެ ފުރުސަތު ލިބި، ބޭކާރުވެފަ އެވެ.

މެޗުން ލެވަކޫސަން މޮޅުވީ، ފުރިހަމަ ވަގުތު ހަމަވެ އިތުރަށް ދެއްކި ވަގުތުގަ އެވެ. އެލެކްސް ގްރިމާލްޑޯ ތަނަވަސްކޮށްދިން ފުރުސަތެއްގައި، ލެވަކޫސަން އަށް މުހިންމު ތިން ޕޮއިންޓު ހޯދައިދިނީ އެކްސެކިއުލް ޕަލަސިއޯސް އެވެ.

މޮޅާއެކު ލެވަކޫސަން އިން ވަނީ އެއް ވަނައިގައި ހަތަރު ޕޮއިންޓުގެ ލީޑެއް ނަގައިފަ އެވެ. މި ސީޒަންގެ ޖަރުމަނު ލީގުގައި މޮޅަށް ކުޅެމުން އަންނަ ލެވަކޫސަން އިން އެއް ވަނައިގައި އޮތީ، މިހާތަނަށް ކުޅުނު 17 މެޗުން 45 ޕޮއިންޓު ހޯދައިގެންނެވެ. ލެވަކޫސަން އަށް ވުރެ އެއް މެޗު މަދުން ކުޅެގެން ދެ ވަނައިގައި އޮތީ އެންމެ ފަހުގެ ޗެމްޕިއަން ބަޔާން މިއުނިކް އެވެ. ދެ ވަނައިގައި އެ ޓީމު އޮތީ 16 މެޗުން 41 ޕޮއިންޓު ހޯދައިގެންނެވެ.