ފިޔާޒުގެ ޝަރީއަތް: ހުލާސާ ބަޔާން ހުށަހެޅުން މާދާމާ!
30 ޖުލައި 2017 | އާދީއްތަ 10:23ޝަރީއަތް މެދުކެނޑިފައި އޮންނަތާ ފަސް މަހަށް ވުރެ ގިނަ ދުވަސް
ރާއްޖެޓީވީގެ ޗީފް އޮޕަރޭޓިންގ އޮފިސަރ ހުސެއިން ފިޔާޒް މޫސާ
ރާއްޖެޓީވީގެ ޗީފް އޮޕަރޭޓިންގ އޮފިސަރ ހުސެއިން ފިޔާޒް މޫސާގެ މައްޗަށް ދައުލަތުން އުފުލާފައިވާ އަތްލުމުގެ ކުށުގެ ދައުވާގެ ޝަރީއަތުގެ އަޑުއެހުމެއް ހޯމަ ދުވަހަށް ތާވަލުކޮށްފި އެވެ.
ފިޔާޒުގެ ޝަރީއަތުގެ އަޑުއެހުމެއް މެއި މަހުގެ 31 ވަނަ ދުވަހަށް ތާވަލުކުރި އެވެ. ނަމަވެސް، ފަހުން އެ އަޑުއެހުން ވަނީ ކެންސަލް ކޮށްފަ އެވެ. ފިޔާޒުގެ ޝަރީއަތުގައި އެންމެ ފަހުން އަޑުއެހުމެއް ބާއްވާފައިވަނީ ފެބްރުއަރީ 2 ވަނަ ދުވަހު އެވެ.
ފިޔާޒުގެ މައްޗަށް ހިންގާ ޝަރީއަތް މެދުކެނޑިފައި އޮންނަތާ ފަސް މަހަށް ވުރެ ގިނަ ދުވަސް ފަހުން ހޯމަ ދުވަހުގެ ހެނދުނު 11:00 ގައި ބާއްވާ އަޑުއެހުމުގައި އޮންނާނީ ހުލާސާ ބަޔާން ހުށަހެޅުމެވެ.
ފިޔާޒުގެ މައްޗަށް ކުރާ ދައުވާގައި ބުނެފައިވަނީ، މުލިއާގެ ކައިރިން ފެނުނު ބޮމެއް، މާފަންނު ސްޓޭޑިއަމް ސަރަހައްދުގައި ނައްތާލުމަށް ސަލާމަތީ ބާރުތަކުން ހަރަކާތްތެރިވަމުންދަނިކޮށް، އެ ސަރަހައްދުން ފިޔާޒު ނުގޮސް، ފުލުހެއްގެ މޭ މަތީގައި ޖަހާފައިވާ ކަމަށެވެ. އެ މައްސަލައިގައި ފިޔާޒުގެ މައްޗަށް ފުރަތަމަ ކުރީ ޖެހުމުގެ ކުށުގެ ދައުވާ އެވެ. ނަމަވެސް ފަހުން އެ ދައުވާ އަނބުރާ ގެންދިއުމަށް ފަހު، އަތްލުމުގެ ކުށުގެ ދައުވާ ވަނީ ކޮށްފަ އެވެ.
އަތްލުމުގެ ކުށަކީ ޖުނަހުގެ ތިން ވަނަ ދަރަޖައިގެ ކުށެކެވެ. އެ ކުށުގެ އަސާސީ އަދަބަކީ އެއް މަހާއި ހަ ދުވަހުގެ ޖަލު ހުކުމެކެވެ.
ފިޔާޒުގެ ޝަރީއަތުގައި، ދެ ފަރާތުގެ ހެކި ބަސް ނަގައި ނިމިފައިވާއިރު، މައްސަލަ ނުނިމި ލަސްވާތީ ފިޔާޒު ވަނީ ކަންބޮޑުވުން ފާޅުކުރައްވާފަ އެވެ.
